Sakaraia 6 - Vakavakadewa Vou kei na iVola tale eso

Ai Kawalu ni Raivotu: Na Qiqinivalu e Va

¹ Au a raica tale e dua na raivotu. Au raica kina e va na qiqinivalu ni ratou basika mai na tadrua ni rua na ulunivanua parasa.

² Na i matai ni qiqi e ratou a dreta tiko na ose damudamu, na i karua e ratou a dreta tiko na ose loa,

³ na i katolu o iratou na ose vulavula, ka ratou dreta tiko na i kava ni qiqi na ose tavutonotono.

⁴ Au a qai taroga na agilosi, “A cava saka beka na kedratou i balebale na qiqinivalu oqo?”

⁵ A sauma o koya, ka kaya, “Oqo na matanicagi e va. E ratou se qai lesu tikoga mai oqo ena mata ni Turaga ni vuravura kecega.”

⁶ Na qiqinivalu ka dreta tiko na ose loaloa sa lako ki na vualiku, ki Papiloni; o iratou na ose vula e ratou lako tiko ki na ra; ka ratou sa lako ki na vanua mai na ceva na ose tavutonotono, ia o iratou na ose damu e ratou gole tiko ki na tokalau.

⁷ Era a sega ni tu vakadua rawa na ose ena nodra gu me ra la'ki vakaraica na vuravura. A qai kaya na agilosi, “Ni lako ka la'ki vakadikeva mada na vuravura.” Era sa qai lako yani.

⁸ A sa qai kaci mai vei au na agilosi, ka kaya, “O iratou na ose ka lako ki na vualiku ki Papiloni e ratou sa vakamalumutaka na cudru i Jiova mai kea.”

Vakaisalataki Vakatui o Josua

⁹ Na i tukutuku oqo sa solia vei au o Jiova:

¹⁰ E a kaya o koya, “Mo taura na nodratou i loloma na i lawalawa sa lesu mai na tiko vakabobula — o Elitai, o Topaija kei Jitaia — ka ratou se qai lesu ga mai oqo mai Papilonia; ka lako vakatotolo sara yani ki na vale i Josaia na luve i Sefanaia ena siga vata ga.

¹¹ Mo vakayagataka na siliva kei na koula e ratou a solia ka cakava kina e dua na i sala koula, ka vakaisalataka kina na Bete Levu o Josua na luve i Josateki.

¹² Tukuna vei Josua ni sa kaya vakaoqo o Jiova ni lewevuqa, ‘Oqo na tamata sa vakatokai me yacana Na Tabana: ni na vakateteva na tabana (ni sa vuavuai) ena vanua sa vakatikori kina, ka na tara vou tale na Valenisoro i Jiova o koya.

¹³ O koya ga ena tara na vale i Jiova ka nona talega na vakarokoroko sa nona na tui. Ena qai dua na bete ni nona i tikotiko vakatui, ka rau na cakacaka vata ena veilomani kei na duavata.’

¹⁴ Na i sala koula ena dau i vakananumi ena Valenisoro me baleti iratou o Elitati, o Topaija, o Jitaia kei Josaia.”

¹⁵ Era na qai lako mai o ira era sa tu vakayawa me ra mai veivuke ena tara vou tale ni Valenisoro i Jiova. Ia ni sa tara oti, o ni sa na qai kila kina ni a talai au yani vei kemuni o Jiova ni lewevuqa Ena yaco dina na ka kecega oqo kevaka e taucoko sara ga na nomuni talairawarawa ki na i vakaro kecega i Jiova na nomuni Kalou.