Sakaraia 5 - Vakavakadewa Vou kei na iVola tale eso

Ai Kaono ni Raivotu: Na i Vola Vivigi

¹ Au a qai rai tale, ka'u a qai raica e dua na i vola vivigi ni cagina tiko e maliwa lala.

² A qai taroga na agilosi na veika ka'u a raica. Au a kaya, “E dua na i vola vivigi sa cagina voli e macawa; sa 9 na mita na kena balavu ka 4.5 na mita na kena raba.”

³ A qai kaya vei au o koya, “Sa volai tu ena i vola vivigi na ka dauveisauti, ka sa vakauti tiko ki na vanua taucoko oqo. E tukuni ena dua na yasa ni vola vivigi ni ra na kau tani na tamata daubutako mai na vanua oqo; ia ena yasana kadua, e tukuni kina ni o ira kece sara na dau bubului lasu era na kau tani talega.

⁴ Au na vakatala yani na dauveivakarusai oqo, sa kaya o Jiova ni lewevuqa, ka na la'ki curu sara ki na vale ni tamata daubutako yadua kei na vale ni tamata daububului lasu yadua. Ena tiko sara ga na rusa ena loma ni nodra veivale me vakarusai ira vakadua.”

Ai Kavitu ni Raivotu: Na Yalewa ena Loma ni Basikete

⁵ A qai rairai tale mai na agilosi, ka kaya, “Raica mada na ka sa lako tiko mai oqo!”

⁶ Au qai taroga, ka'u kaya, “Na cava oqori?” A sauma o koya, ka kaya, “E dua na basikete, ka i vakaraitaki ni i valavala ca ni vanua taucoko oqo!”

⁷ Na i sogo ni basikete sa buli ena uma. E noqu sarava toka, a sa qai talave cake na i sogo uma ni basikete, ka mai dabe yani ki na loma ni basikete e dua na yalewa!

⁸ A qai kaya na agilosi, “Na yalewa oqo na i vakaraitaki ni veivalavala vakasisila!” A sa qai tabaki koya sobu ki na loma ni basikete ka sogota tale na sova.

⁹ Au qai rai cake ka'u raica e rua na yalewa e rau sa vuka vakadodonu tiko mai vei au ka rau vakatabana kaukauwa sara me vaka na belo. E rau a tomika na basikete ka vukataka yani ki macawa.

¹⁰ Au a qai taroga na agilosi, “E rau kauta tiko i vei na basikete?”

¹¹ A sauma na agilosi ka kaya, “Ki Papilonia, ena vanua era na tara kina na kena burekalou. Ni sa tara oti na burekalou, ena qai vakatikori e kea na basikete.”