Sakaraia 4 - Vakavakadewa Vou kei na iVola tale eso

Ai Kalima ni Raivotu: Na i Tutu ni Cina kei na Vuni Olive

¹ A sa qai lesu tale mai na agilosi keirau a veivosaki tiko, ka mai vakayadrati au me vaka sara ga au a moce tu.

² A tarogi au o koya, “A cava o bau raica? Au a qai kaya vua, “E dua na i tutu ni cina koula. E toka e delana e dua na bilo ka dau tawa kina na waiwai, kei na vitu na cina, ka yavitu na matadratou na cina yadua.

³ E rau tiko ena yasa ni cina e rua na vuniolive, ka rau yadua tiko na yasana.”

⁴ Au a qai taroga na agilosi, “A cava saka na kedratou i balebale na ka oqo?”

⁵ A qai tarogi au lesu mai o koya, “O sega beka ni kila?” Au a kaya lesu, “E sega, e sega saka.”

⁶ Sa qai kaya vei au na agilosi me'u tukuna vei Serupepeli na vosa i Jiova oqo: ‘O na rawata, ka sega ena vuku ni kaukauwa vakaivalu, se na kaukauwa vakatamata, ia ena Yaloqu ga, sa kaya o Jiova ni lewevuqa.’

⁷ Na ka ni veivakataotaki levu duadua ena waicala ga e matamuni. O ni na tara vou tale na Valenisoro, kei na gauna e biu kina na i otioti ni vatu ni sa oti na kena cakacaka, era na qai kailavaka mai na tamata, “E totoka, e totoka!”

⁸ A qai yaco tale mai vei au e dua na i tukutuku i Jiova.

⁹ A sa kaya, “Sa tara oti o Serupepeli na yavu ni Valenisoro, ena vakaotia sara talega na vale taucoko. Ni sa yaco na ka oqo, era na qai kila kina na noqu tamata ni'u a talai iko yani kivei ira.

¹⁰ Era sa sega ni marautaka ga baleta ni rui bera tiko vakalevu na veika sa caka tiko. Ia era na qai marau ga ni ra sa raici Serupepeli ni sa liutaka tiko na tara ni Valenisoro.” A qai kaya vei au na agilosi, “Na cina e vitu sai iratou na mata i Jiova e vitu sa dauraica na veiyasa i vuravura kecega.”

¹¹ Au a qai tarogi koya, “A cava ga na kedrau i balebale na vuniolive e rau yadua tiko na yasa ni tutu ni cina?

¹² Na cava e kedrau i balebale na taba ni olive e rau tiko ena yasadrau na paipo koula ka drodro tiko mai kina na waiwai olive?”

¹³ A qai tarogi au tale mai na agilosi, ka kaya, “O sega li ni kila?” Au a sauma, “E sega, au sega saka ni kila.”

¹⁴ A sa qai kaya o koya, “Oqori oi rau na tamata sa digitaka ka lumuta na Kalou me rau dau qaravi koya, na tui ni vuravura taucoko.”