Sakaraia 3 - Vakavakadewa Vou kei na iVola tale eso

Ai Kava ni Raivotu: O Josua kei Setani

¹ Ena dua tale na noqu raivotu, a sa vakaraitaki Josua na Bete Levu vei au o Jiova ni sa tucake tu ena mata ni agilosi i Jiova, ka tucake tu o Setani ena yasa i Josua me vakarau beitaki koya ena dua na ka.

² A qai kaya na agilosi i Jiova vei Setani, “I Setani, me cudruvi iko ga o Jiova! Io me vunauci iko o Jiova, o koya sa dau lomani Jerusalemi. Na tamata oqo e sa vaka e dua na mata ni buka sa yalaci tani mai na bukawaqa.”

³ E a tucake tu ena mata ni agilosi o Josua, ka daramaka tu na i sulu madra sa rairai duka.

⁴ Sa qai kaya na agilosi vei iratou na nona i vakatawa vakalomalagi, “Dou luvata tani na i sulu dukadukali ka daramaka tu na tamata oqo.” A qai kaya na agilosi vei Josua, “Au sa bokoca na nomu i valavala ca, ka'u na solia vei iko na i sulu vou mo daramaka.”

⁵ Sa qai vakaroti iratou na nona i vakatawa o koya na agilosi, ka kaya, “Dou vakaisalataki Josua ena sala vakabete sa savasava.” E ratou a vakayacora vakakina, ka qai vakasulumi koya ena i sulu vou ni a tucake tu e kea na agilosi.

⁶ A sa qai vakataudeitaki Josua na agilosi i Jiova ka kaya,

⁷ “Oqo na ka sa kaya o Jiova ni lewevuqa: ‘Kevaka o talairawarawa ki na noqu lawa ka vakayacora na cakacaka au a lesia vei iko, o na qai veiliutaki tikoga ena qaravi ni noqu Valenisoro kei na kena lomanibai, ka'u na rogoca na nomu masu, me vaka ga na noqu daurogoca na nodra masu na agilosi era tiko oqo e mataqu.

⁸ Mo vakarorogo vinaka kina, Josua, o iko o na Bete Levu. Ni vakarorogo talega, oi kemuni na nona matabete, oi kemuni na i dusidusi ni dua na gauna vinaka maimuri. Au na vakatakilai koya na noqu dauveiqaravi, a sa vakatokai, ‘O koya na Tabana!’

⁹ Au sa vakaduria ena mata i Josua e dua na vatu sa vitu na matana. Au na ceuta ena vatu e dua na i tukutuku, ka'u na kauta laivi na i valavala ca ni vanua oqo ena duabau ga na siga.

¹⁰ Ena siga o ya, o ni na dui sureti ira na wekamuni ka mai wasea vata na bula vakacegu kei na tiko sautu, ka vakawavoliti mai na nomuni veiloganivaini kei na lolo.”