Sakaraia 2 - Vakavakadewa Vou kei na iVola tale eso

Ai Katolu ni Raivotu: Na Wa ni Vakarau

¹ Ena dua tale na raivotu, au a raica kina e dua na tamata ni taura voli mai e dua na wa ni vakarau.

² Au a mani tarogi koya, “O lako tiko i vei?” A qai sauma o koya, ka kaya, “Au mai vakarautaki Jerusalemi me macala na kena balavu kei na kena raba.

³ Au a qai raica na agilosi keirau veivosaki tiko oqo ni sa kalawa ki liu, ka sa dua tale na agilosi e lako mai me mai tavaki koya.

⁴ Sa qai kaya na i matai ni agilosi vei koya ka dua, “Cici mada ka la'ki tukuna vua na cauravou ka taura voli na wa ni vakarau ni ra na lewe vuqa mai na tamata kei na manumanu e Jerusalemi, ena qai rui levu sara na koro ka dredre kina ni viribai.

⁵ A sa yalataka oti tu o Jiova ni sai koya ga ena bai bukawaqa wavokita na koro me taqomaka, ka tiko ga mai kea kei na nona lagilagi.”

Kacivi Lesu na Tiko Vakabobula

⁶ A sa qai kaya o Jiova vei ira na nona tamata, “Au a vakayacora mo ni veiseyaki ki na veivanua kecega.

⁷ Ni duri cake! Ni dro tani mai Papiloni ka lesu mai ki Jerusalemi.

⁸ Ni sa kaya vakaoqo o Jiova ni lewevuqa (ni sa talai au oti na nona lagilagi) me baleti ira na matanitu eso era sa kovea vakaukauwa na nodra i yau: ‘E dina sara, ni o koya sa tarai kemuni sa tara vakakina na loa ni mataqu.

⁹ Io, raica, ka'u na dulaka na ligaqu vei ira, era na qai kau me ra i toki ni valu vei ira ka ra a nodra bobula. O ni na qai kila kina ni sa talai au mai o Jiova ni lewevuqa.

¹⁰ A kaya o Jiova, “Kemuni na lewe i Jerusalemi, ni sere voli ena marau! Au sa lako tiko mai me'u mai tiko ena kemuni maliwa.”

¹¹ Era na qai lako mai vei Jiova na veimatanitu ena gauna o ya ka ra yaco me ra nona tamata. Ena bula o koya ena kemuni maliwa, ka o ni na kila ni sa talai au mai o koya kivei kemuni.

¹² Sa na qai yaco tale o Juta me i votavota ni vanua digitaki i Jiova mai na vanua tabu, ka yaco me nona koro lomani duadua vei ira na veikoro kecega o Jerusalemi.

¹³ Ni tiko vakanomodi ena mata i Jiova, na tamata kecega, ni sa lako mai o koya mai na nona tikotiko tabu.