Sakaraia 13 - Vakavakadewa Vou kei na iVola tale eso

¹ Sa qai kaya o Jiova ni lewevuqa, “Ni sa yaco mai na gauna o ya, sa na qai dolavi e dua na i vurevure ni wai me vakasavasavataki ira na kawa i Tevita kei ira na lewe i Jerusalemi mai na nodra i valavala ca kei na nodra qaravi kalou matakau.

² Ena gauna o ya, au na kauta laivi na yacadra na kalou matakau mai na vanua oqo, ka na sega sara ni dua na tamata ena qai nanumi ira tale. Au na kauti ira laivi talega na dau viavia parofita, ka kauta tani na gagadre ni qaravi kalou matakau.

³ Ia kevaka e dua e cikeva tikoga me parofisai, e rau na qai tukuna ga vua o tamana kei tinana ni sa dodonu ga me na vakamatei o koya, baleta ni la'ki tukuna voli ni vosa ni Kalou e tukuna tiko mai, ia na vosa lasu wale ga. Ena gauna e parofisai kina, e rau na qai suaki koya me mate o tamana kei tinana.

⁴ Ni sa yaco mai na gauna o ya, ena sega tale ni dua na parofita ena dokadokataka na nona raivotu, se me vakaisulu vakaparofita me vakacalai ira kina na tamata.

⁵ Na ka ga ena kaya oqo, ‘Au sega ni parofita oi au. Au dauteitei ga — au sa dau qarava na i teitei ena noqu bula taucoko.’

⁶ Kevaka e mani qai tarogi koya vakaoqo e dua na tamata, ‘Na i macamaca ni mavoa cava ga era tu oqori e seremu?’ Ena sauma o koya, ka kaya, ‘Au a mavoa ena nona vale e dua na noqu i tau.’ ”

Na i Vakaro me Ra Vakamatei na i Vakatawanisipi

⁷ A sa qai kaya o Jiova ni lewevuqa, “Mo yadra, o iko na i seleiwau, ka mokuta na i vakatawanisipi! Vakamatei koya sara, ka me ra dui talabusese na sipi. Au na valuti ira na noqu tamata,

⁸ era na mate ena vanua taucoko oqo e rua na i katolu ni wiliwili ni tamata.

⁹ Au na qai vakatovolei ira na dua na i katolu ni tamata sa vo, ka vakavoui ira me vaka na vakabutari ni siliva mai na bukawaqa. Au na vakatovolei ira me vaka na vakatovolei ni koula. Era na masu vei au ka'u na sauma na nodra masu. Au na tukuna vei ira ni ra sa noqu tamata, ka ra na vakadinadinataka ni'u sa nodra Kalou.”