Sakaraia 11 - Vakavakadewa Vou kei na iVola tale eso

Bale o Ira na Dauveivakasaurarataki

¹ I Lepani, mo dolava na nomu katuba, Me vakamai rawa kina na nomu veivuni sitari!

² Mo tagi ka qoqolou, o iko na damanu - Era sa babale na veisitari; Na kau totoka ka taleitaki oqori era sa qeyavu vakadua! Mo tagi ka qoqolou, o iko na oki ni Pasani - Sa musulaki laivi na veikau loa!

³ Era sa tagi na tui ena nodra rarawa; Ka sa takali na nodra lagilagi! Ni rogoca mada na nodra tagi qoqolou na laione; Sa qeyavu na veikau loa ena nodra i tikotiko!

Vakatawa ni Sipi

⁴ Sa qai kaya vei au o Jiova na noqu Kalou, “Mo matanataka mada na i tavi ni dua na i vakatawanisipi ka sa kau tiko na nona qele ni sipi me la'ki vakamatei.

⁵ Era sa vakamatei ira ga o ira na kedra i taukei ka ra sa sega ni bau totogitaki. Era sa volitaka ga na lewe ni sipi ka ra kaya, “Me vakacaucautaki o Jiova! Eda sa vutuniyau! O ira sara mada ga na i vakatawanisipi era sa sega ni bau kauwaitaki ira.”

⁶ (A sa kaya o Jiova, “Sa oti na noqu kauwaitaki ira era sa tiko ena vanua oqo. Au na biuti ira ga na tamata yadua ena ruku ni nodra veiliutaki na nodra i liuliu. O ira na i liuliu oqo era na vakacacana na vanua, ka'u na sega ni vakabulai ira mai na ligadra.”)

⁷ Era vakacakacakataki au na dauvolia ka volitaka na sipi, ka'u sa qai tekivu me'u vakatawani ira na sipi era sa vakarau vakamatei tiko. Au a qai taura e rua na i titoko: e dua ka'u sa vakatoka o “Yalololoma”, kei na kena i karua e yacana o “Duavata”. Au a qai vakatawai ira na sipi.

⁸ E lewe tolu na i vakatawanisipi e ratou a besetaki au, ka'u mani biuti iratou tani kina ena loma ga ni dua na vula.

⁹ Au a qai kaya vei ira na sipi, “Au sa na sega tale ni nomuni i vakatawanisipi. O ira sa voleka ni mate, laiva ga me ra mate. O ira era vakarau vakarusai, laiva ga me ra rusa. O ira na kena vo era na qai veivakarusai ga vakai ira.”

¹⁰ Au sa qai taura na i titoko ka yacana o Yalololoma ka musuka, me bokoci kina na veiyalayalati au a cakava vata kei ira na veimatanitu kecega.

¹¹ A mani bokoci na veiyalayalati ena siga o ya. Era a vakaraici au toka yani o ira na dauvoli sipi ka dauvolitaka talega, ka ra kila ni sa vosa tiko mai o Jiova ena vuku ni ka au sa vakayacora.

¹² Au a qai kaya vei ira, “Ni saumi au kevaka sa dodonu vei kemuni. Ia kevaka e sega, ni maroroya ga na nomuni lavo.” Era a qai saumi au ena 30 na tiki ni siliva.

¹³ Sa qai kaya vei au o Jiova, “Biuta na i lavo ki na valeniyau ni Valenisoro.” Au sa qai taura na tolusagavulu na tiki ni siliva — na i sau vinaka duadua era sa nanuma ni sai kequ i voli kadina — ka biuta ki na valeniyau ni Valenisoro.

¹⁴ Au a qai musuka na i karua ni titoko ka yacana o “Duavata”, ka sa muduki laivi kina na nodrau veiwekani kei na duavata nei Juta kei Isireli.

¹⁵ A sa qai kaya tale vei au o Jiova, “Mo matanataka tale mada vakadua na i tavi ni vakatawanisipi, ia oqo mo na vaka e dua e rui torosobu sara.

¹⁶ Au sa lesia e dua na i vakatawanisipi me qaravi ira na noqu qele ni sipi, ia sa sega ga ni bau vukei ira sa voleka tu ni yacovi ira na rusa, se vakasaqarai ira sa yali, se qaravi ira era mavoa, se vakani ira na kena vo. Na ka ga e vakayacora voli sai koya me dau kania tiko na sipi urouro duadua ka basuraka laivi na nodra i taukuku.

¹⁷ Ena kalouca na i vakatawanisipi torosobu o ya! Sa biuti ira laivi tu ga mai na sipi! Ena vakarusa vakadua na nona kaukauwa na i valu. Ena malai na ligana, ka na mataboko na matana ena yasana i matau.”