Sakaraia 10 - Vakavakadewa Vou kei na iVola tale eso

Vosa Yalayala ni Veivakabulai i Jiova

¹ Ni kerea vei Jiova me tau na uca ena vula i tubutubu. O Jiova ga sa dausolia mai na o loaloa ni uca ka vakatauca na uca me vakadrokadrokataka na veivanua ni teitei me baleta na tamata kecega.

² E ra sa dau kauta ga na tamata na nodra leqa vei ira na daurairai, ia na nodra i wali ni leqa sa tawayaga ga ka lasulasu. Eso era sa dautukuna na i balebale ni tadra, ia era sa vakacalai kemuni wale ga; na veivakacegui era solia sa sega ni yaga. O koya oqo era sa lako voli kina me vaka na sipi sa lako sese o ira na tamata. Era sa leqa sara baleta ni sa sega na nodra i liuliu.

³ Sa kaya o Jiova, “Sa waqa na noqu cudru vei ira na kai tani era lewai ira tiko na noqu tamata, ka'u na totogitaki ira. Era sa noqu tamata o ira na Juta, ka'u na maroroi ira oi au, o Jiova ni lewevuqa. Era na noqu ose kaukauwa ni vala.

⁴ Ena basika mai ena kedra maliwa o ira na turaga, kei ira na i liuliu eso, kei ira na komada me ra liutaki ira na noqu tamata.

⁵ Era na tamata qaqa na Juta me vakataki ira na sotia era buturaka sobu na nodra meca ena lolobo ni veigaunisala. Era na vala baleta ni sa tiko kei ira o Jiova, ka ra na rawai ira na meca ka vakakina na nodra mataivalu ose.

⁶ Au na vakaukauwataki ira na Juta; Ka'u na vueti ira cake na Isireli. Au na yalo loloma vei ira Ka kauti ira lesu kece tale mai ki na nodra vanua. Era na qai vaka ga ni'u a sega ni biuti ira laivi. Oi au o Jiova na nodra Kalou; Ka'u na sauma na nodra masu.

⁷ O ira na Isireli era na kaukauwa me vaka na sotia, Ka ra mamarau me vakataki ira era gunu waini tiko. Ena dau qai nanumi na qaqa oqo mai vei ira na nodra kawa e muri Ka ra mamarau kina, Ni ra sa mamarau baleta na ka sa cakava o Jiova.

⁸ “Au na kacivi ira na noqu tamata, Ka vakasoqoni ira vata mai. Au na la'ki vakabulai ira mai, Ka vakalewevuqataki ira me vaka na kedra i wiliwili eliu.

⁹ E dina ni'u a cakava me ra veiseyaki ki na veimatanitu, Ia era na la'ki nanumi au tikoga mai na veivanua yawa oqori. Era na la'ki bula tu ga vata kei ira na luvedra, Ka ra na lesu vata tale mai ki na nodra vanua.

¹⁰ Au na la'ki kauti ira mai Ijipita kei Asiria, Ka mai vakatikori ira sara ena nodra vanua. Au na vakatikori ira talega mai Kiliati kei Lepanoni; Ka na osodrigi sara na vanua taucoko ena tamata.

¹¹ Ni ra takosova mai na nodra wasawasa ni leqa, Oi au, o Jiova, ka'u na ravuta na kena veibiau Me di caracara sara na boto ni uciwai na Naile. Ena vakamaduataki o Asiria, Ka na yali na kaukauwa nei Ijipita.

¹² Au na vakaukauwataki ira na noqu tamata; Ka ra na dau masu ka talairawarawa vei au.”