Ruci 3 - Vakavakadewa Vou kei na iVola tale eso

Sa Kunea na Watina o Ruci

¹ A sa kaya vei Ruci o Neomai, “Na luvequ, au sa na vakasaqara e dua na watimu me vakavaletaki iko ka mo tiko vinaka kina.

² Mo nanuma tiko ni wekadatou dina o Poasa na turaga ka taukeni ira na goneyalewa o cakacaka vata tiko kei ira. Ena qaqi barile tiko o koya ena yakavi edaidai.

³ Mo sisili mada, lumulumu vinaka, tokara na nomu i sulu digitaki, ka lako ki na nona rara ni samu witi, mo kakua sara ni vakatakilai iko vua me yacova ni sa kana ka gunu oti.

⁴ Ia ni sa koto sobu me moce, mo raica na vanua e davo kina; mo qai la'ki cega na i tutuvi e yavana ka koto sobu e kea. Ena qai kaya vei iko o koya na ka mo cakava.”

⁵ Sa qai sauma o Ruci ka kaya, “Au sa na vakayacora kece na veika o kaya vei au.”

⁶ A sa lako yani ki na rara ni samu witi o Ruci, ka la'ki vakayacora na veika kece sa vakarota vua na vugona.

⁷ Ia ni a kana ka gunu oti o Poasa, a mamarau sara na yalona, ka la'ki moce ena yasa ni binibini witi. A qai curu vakamalua yani o Ruci, cega na i tutuvi e yavana, ka davo sobu.

⁸ Ena lomaloma ni bogi, e qai yadra cake vakasauri o Poasa me vuki, ka kurabui ni raica ni a koto e yavana e dua na yalewa.

⁹ A taroga sara o koya ka kaya, “O cei o iko?” A sauma o koya ka kaya, “Oi au o Ruci na nomuni vada. Me vaka ni daru veiwekani voleka, sa nomuni tavi mo ni qaravi au, ka mo ni tauri au me'u watimuni.”

¹⁰ A sa kaya o koya, “Noqu lewa, me vakalougatataki iko o Jiova. O sa vakaraitaka ni levu cake na nomu yalodina ki na nodatou matavuvale ena nomu vakayacora na ka oqo, ka lailai cake mai na kena o a vakayacora vua na vugomu; me vaka ni o sega ni lakovi ira na cauravou, era vutuniyau, se ra dravudravua.

¹¹ Mo kakua ni rere noqu lewa; ni ra sa kila kece na tamata mai na koro ni o sa yalewa vinaka. Au sa na vakayacora na veika kece o kaya.

¹² Sa dina ni'u sa wekamu dina, sa noqu i tavi talega me'u maroroi iko; ia e tiko tale e dua na wekamu sa voleka cake mai vei au.

¹³ Mo tiko mada e ke ena vo ni bogi oqo, ka me qai kilai ni mataka se sa na rawa ni qaravi iko na wekamu voleka o ya se sega, ia kevaka e vaka kina, sa daumaka; ia ke mani sega, au sa na bubuluitaka ena mata i Jiova na Kalou bula ni sa noqu i tavi me'u qaravi iko: ia mo tei moce tale mada.”

¹⁴ A mani koto sobu yani e yavana o Ruci ka moce me yacova na mataka, ia sa yadra cake ga ni se buto tu ga na vanua, baleta ni sega ni vinakata o Poasa me dua e kila ni sa tiko e kea o koya.

¹⁵ A sa qai kaya vua o Poasa, “Kauta mai na i sulu o a tutuvi kina ka tevuka e mataqu.” A vakayacora vakakina o Ruci, ka sova yani kina o Poasa e volekata e 20 na kilokaramu na barile, a sa qai vukei koya me colata yani e tabana. A sa lesu tale ki na koro o koya kei na ka oqo.

¹⁶ Ia ni yaco yani, a sa tarogi koya sara mai o na vugona, “Sa mani vakaevei na nomu i lakolako, na vugoqu?” A sa tukuna vua o Ruci na veika kece sara a vakayacora vua o Poasa.

¹⁷ A sa kaya tale, “E a solia talega vei au o koya na i binibini barile taucoko oqo, me vaka ni a kaya vei au me'u kakua ni lesu lala vua na vugoqu.”

¹⁸ A sa kaya vua o Neomai, “I Ruci, mo vosota tale mada vakalailai, me yacova sara na i tinitini ni veika kece oqo; ni na sega ni yalo vakacegu o Poasa me yacova ni sa vakayacora na lomana ena siga edaidai.”