Ruci 2 - Vakavakadewa Vou kei na iVola tale eso

Cakacaka o Ruci ena i Teitei nei Poasa

¹ A sa dua tiko na weka i Neomai na yacana o Poasa; a sa tamata vutuniyau sara ka semati ki na matavuvale nei watina o Ilimeleki.

² Ena dua na siga, a sa kaya vei Neomai o Ruci, “Yalovinaka me'u lako mada ki na veiloga ni teitei, ka me'u la'ki vakatomika mada na sila era biuta tu mai na dautatamusuki. Au nuitaka ni'u na sotava e dua me vakacakacakataki au.” A sa kaya o Neomai, “Io mo lako ga, na luvequ.”

³ A sa lako yani o Ruci ki na veiteitei ka muri ira voli na dautatamusuki, ka vakatomika na sila era biuta tu mai. A sega sara ni kila ni sa cakacaka voli tiko oqo ena veiteitei nei Poasa, o koya ka rau vuvale vata kei Ilimeleki.

⁴ Ena dua na gauna e muri, a sa qai lako mai Peceliema o Poasa, ka kaya vei ira na nona tamata cakacaka, “Me tiko vata kei kemuni o Jiova!” Era a qai sauma ka kaya, “Me vakalougatataki kemuni o Jiova!”

⁵ A sa qai vosa o Poasa vua na i liuliu ni nona tamata cakacaka, ka taroga, “O cei ga na goneyalewa o ya?”

⁶ A sa sauma na nodra i liuliu na dautatamusuki ka kaya, “Na goneyalewa o ya na kai Moapi, ka rau a lako vata mai kei Neomai mai Moapi.

⁷ A mai kerea vei au me la'ki vakamuri ira voli na dautatamusuki ka me dau vakatomika na sila era biu mai. E se cakacaka tiko mai o koya me tekivu mai na mataka lailai ka se qai cegu sara ga oqo me la'ki vakaruru mada.”

⁸ A qai kaya vei Ruci o Poasa, “Yalovinaka me'u vakasalataki iko mada. Mo kakua tale ni la'ki tomitomi ena duatani tale na i teitei, ia mo tiko vakadua ga eke. Mo cakacaka voli ga kei ira na noqu goneyalewa eke;

⁹ ka vakaraica matua tikoga na i teitei era sa tatamusuki kina, ka vakamuri ira voli ga. Au sa vakaroti ira na noqu tamata me kakua ni dua vei ira me vakasagai iko. Kevaka o sa viagunu, mo la'ki gunu mai na saqa ka ra sa takiva oti mai na cauravou.”

¹⁰ A vakacuvara sobu na uluna ki na qele o Ruci ka kaya vei Poasa, “A cava na vuna o ni sa rui lomani au kina ka kauwaitaki au vakalevu kina me vakaoqo, ni'u sa yalewa ni vanua tani?”

¹¹ A sauma o Poasa ka kaya, “Sa tukuni oti vei au na ka kece o a vakayacora vua na vugomu ena gauna sa mate kina na watimu; na nomu biuti rau na tamamu kei na tinamu kei na nomu biuta na vanua o a sucu kina, ka lako mai mo bula ena kedra maliwa na tamata o sega mada ni kilai ira e liu.

¹² Me qai sauma vei iko o Jiova na nomu caka vinaka. Me qai sauma vakavinaka sara vei iko o Jiova na Kalou i Isireli; o koya o sa mai vakarurugi kina oqo ena ruku ni tabana.”

¹³ A qai kaya vua o Ruci, “O ni sa rui yalovinaka noqu turaga. Me'u kune loloma tikoga e matamuni. Sa veivakacegui dina na i tautau ni nomuni vosa vei au, ka dina ga ni'u sega ni dua vei ira na nomuni dauveiqaravi.”

¹⁴ Ena gauna ni kana, a sa kaya vei Ruci o Poasa, “Lako mai me dua vei iko na tiki ni madrai, ka tonia ki na i saluwaki ni kakana.” A sa dabe o koya e tikidra na tamata cakacaka, ka solia yani vua o Poasa na i buli madrai tavu. A sa kana o Ruci me yacova ni sa mamau, ka la'ki vo tale na kena kakana.

¹⁵ Ia ni sa tucake o koya me tomi sila tale, a sa vakaroti ira na nona tamata o Poasa, ka kaya, “Dou laivi koya me tomi sila ena maliwa ni veivau sila, ka kakua ni tarovi koya.

¹⁶ Mo dou ucuna talega eso mai na veivau sila, ka vakalutuma me tomika o koya, ka mo dou kakua ni cudruvi koya.”

¹⁷ A sa tomana na nona tomi sila ena i teitei o Ruci me yacova sara na yakavi. A sa samuta talega na veika sa tomika rawa, ka sa volekata na 10 na kilokaramu na kena bibi.

¹⁸ A sa kauta lesu na sila ki na koro me vakaraitaka vua na vugona na levu ni ka e sa kumuna rawa. A sa solia talega vua na veika sa vo mai na kena kakana ni sa vakamamautaki oti.

¹⁹ Sa tarogi koya o Naomi, “O sa kumuna mai vei na veika kece oqo? Na i teitei i cei o cakacaka voli kina? Me vakalougatataka na Kalou na tagane sa kauwaitaki iko tiko oqo!” A sa tukuna vei Neomai o Ruci ni a cakacaka voli ena nona i teitei e dua na tamata e yacana o Poasa.

²⁰ A qai kaya vakaoqo o Neomai, “Me vakalougatataki Poasa o Jiova! Sa dau maroroya na nona vosa ni yalayala o Jiova vei ira sa bula kei ira sa mate.” A sa kaya tale vua o Neomai, “Na tamata oqori e wekadatou tiko, e dua sara ga vei ira na tiki ni yagodatou voleka.”

²¹ A qai kaya vua o Ruci, “E tukuna talega vei au o Poasa me'u cakacaka vata tiko kei ira na nona tamata me yacova sara ni sa cava na musuki witi.”

²² A sa kaya o Neomai vei Ruci, “Sa donu na luvequ, e vinaka oqori mo cakacaka tikoga kei ira na goneyalewa i Poasa ena nona i teitei. Ena rawa ni vakasagai iko e dua na tamata kevaka o lakova e duatani tale na i teitei.”

²³ A mani mai cakacaka tiko yani o Ruci kei ira na tamata nei Poasa, ka tomi sila tiko me yacova ni sa cava na kena tamusuki tiko na barile kei na witi. Ia ena gauna kece o ya, a sa bula voli ga kei na vugona.