Ruci 1 - Vakavakadewa Vou kei na iVola tale eso

Lako o Ilimeleki kei na Nona Vuvale ki Moapi

¹ Ena gauna era a liutaki Isireli kina na dauveilewai, a yaco e dua na dausiga ena vanua o ya. A mani lako vakavulagi kina ki na vanua o Moapi e dua na kai Peceliema e Juta, vata kei na watina kei rau na luvena tagane.

² Na yaca ni tamata o ya o Ilimeleki, na watina o Neomai, kei rau na luvedrau, o Maloni kei Kilioni. E ratou kai Efiraca mai Peceliema e Juta. E ratou a lako ki na vanua o Moapi ka la'ki vakaitikotiko kina.

³ A mani mate o Ilimeleki, ka ratou a mai vo toka yani o Neomai kei rau na luvena tagane ruarua.

⁴ E rau a vakawati yalewa ni Moapi oi rau oqo: e dua vei rau na yalewa o Oripa, ka kena i karua o Ruci. E ratou a tiko mai kea ka voleka ni yabaki tini na kena dede.

⁵ E rau a mani mate ruarua talega o Maloni kei Kilioni ka mani vo duadua voli ga o Neomai; ka rau a yali na luvena tagane ruarua kei na watina.

Lesu Tale i Peceliema o Neomai kei Ruci

⁶ A sa qai rogoca o Neomai ni a la'ki vukei ira tale na nona tamata o Jiova ena nona solia na sautu ni kakana vei ira, ka mani vakarau sara o koya kei rau na vugona me ratou biuta na vanua o Moapi.

⁷ A cavutu sara o koya me lesu vata kei rau ki na vanua o Juta.

⁸ Ni ratou lako tiko e sala, a kaya sara o Neomai vei rau na vugona, “Mo drau dui lesu tale ki na vale i tinamudrau. Me vakalougatataki kemudrau o Jiova me vaka ni drau a caka vinaka vei au ka vakakina vei ira sa mate.

⁹ Me solia vei kemudrau o Jiova na vakacegu, ka mo drau la'ki vakawati tale ka tiko vinaka.” A sa qai reguci rau o koya, ka ratou qai mai tabalaka yani e dua na veitagicaki

¹⁰ ka rau a qai kaya vua, “Sega, keirau sa na lako vata ga kei iko vei ira na kai nomu.”

¹¹ Ia sa qai kaya o Neomai, “Mo drau lesu na vugoqu. A cava o drau via lako vata kina kei au? E se vo tiko li na luvequ tagane e ketequ me watimudrau?

¹² Mo drau lesu tale na vugoqu, ni'u sa rui qase ka sa sega ni rawa me'u vakawati tale. Kevaka ka'u na kaya ni'u sa vakanuinui tiko me'u vakawati tale, se kevaka me'u sa vakawati ena bogi e daidai ka vakasucuma tale eso na gonetagane,

¹³ o drau na waraka tiko li me ra cauravou sara? E rawa li vei kemudrau mo drau kakua ni vakawati koso? O drau sa kila sara na vugoqu ni sa sega ni rawa o ya. Au sa rui rarawa vakalevu kina ena vukumudrau, ni sa bikai au tu oqo na cudru i Jiova.”

¹⁴ A tubu cake tale na nodratou veitagicaki. Sa qai reguci Neomai o Oripa ka lesu tale ki na nona vale; ia o Ruci sa kabiti Neomai matua ga.

¹⁵ Sa qai kaya vua o Neomai, “I Ruci, raica sa lesu tale o karuamu vei ira na wekana kei na nona kalou. Mo lesu tale i vale vata kei koya.”

¹⁶ A sauma lesu o Ruci, ka kaya, “Yalovinaka sara mo kakua ni cikevi au me'u laivi iko, se me'u kakua ni muri iko. Na vanua cava ga o lako kina, au na lako talega kina. Se na vanua o tiko kina, au na tiko talega kina. O ira na nomu tamata era na noqu tamata, kei na nomu Kalou ena noqu Kalou talega.

¹⁷ Na vanua o na mate kina au na mate talega kina, ka oqori na vanua me'u bulu kina. Me qai cudruvi au o Jiova kevaka sa tawasei kedaru koso e dua tale na ka, ia me o mate duadua ga.”

¹⁸ Ni sa raica o Neomai na lomadei nei Ruci me rau salavata tikoga, a mani sega tale ni qai kaya e dua na ka.

¹⁹ E rau a mai lako yani ka yaco sara ki Peceliema. Ia ni rau tadu yani kina, era a yavala na lewe ni koro ena vukudrau, ka ra kaya na yalewa, “O Neomai dina li oqo?”

²⁰ A sa kaya vei ira o koya, “Ni kakua ni vakatokai au me o Neomai; ni vakatokai au ga me o Mara; baleta ni sa vaka me gaga tu na noqu bula mai na veivakararawataki ni Kalou Kaukauwa.

²¹ Na noqu a biuta na vanua oqo, a levu ka sinai tu na veika au taukena; ia sa vakalesui au lala mai o Jiova. A cava na vuna o ni kacivi au tikoga kina me o Neomai ni sa vakararawataki au o Jiova na Kalou Kaukauwa ka kauta mai na leqa ki na noqu bula?”

²² Sai koya o ya na i lakolako ni nodrau lesu mai o Neomai kei Ruci na vugona. E rau a tadu mai ki Peceliema ena gauna e tekivutaki kina na tatamusuki barile.