Roma 8 - Vakavakadewa Vou kei na iVola tale eso

Na Bula ena Kaukauwa ni Yalo Tabu

¹ O koya oqo sa sega kina ni wilika na Kalou na nodra cala o ira era sa tu vata kei Karisito Jisu.

² Ni sa sereki au mai na lawa ni valavala ca kei na mate na lawa ni Yalo Tabu, o koya sa kauta mai vei keda na bula ena noda tu vata kei Karisito Jisu.

³ Ia na ka e sega ni cakava rawa na Lawa ena vuku ni malumalumu ni vakarau ni bula vakatamata, sa cakava oti na Kalou. Sa vakaraitaka o koya ni sa vakacala na ca sa tu ena i tovo ni bula vakatamata ena nona tala mai na luvena, ena yago sa tautauvata kei na yagoda i valavala ca na tamata, me vaqeyavutaka kina na i valavala ca.

⁴ Sa cakava na ka oqo na Kalou me caka rawa kina na i valavala dodonu e vakarota na Lawa ena noda bula na tamata eda sa bula voli ena veiliutaki ni Yalo Tabu, ka sega ni vaka na i tovo e gadreva na yagoda.

⁵ O ira era bula voli me vaka na ka e vinakata na nodra i tovo vakayago era sa vakarorogo ki na ka e gadreva na yagodra, ia o ira era sa bula voli me vaka na ka e vinakata na Yalo Tabu era sa vakarorogo ki na veiliutaki ni Yalo Tabu.

⁶ Me lewai keda na noda i tovo vakayago sa kena i tinitini na mate; ia me lewai keda na Yalo Tabu sa kena i tinitini na bula kei na vakacegu.

⁷ O koya oqo, sa yaco kina me ra meca ni Kalou na tamata era sa lewai mai na i tovo vakayago; ni ra sa sega ni muria tiko na lawa ni Kalou, ka sa dredre sara me ra talairawarawa kina.

⁸ O ira era sa muria tikoga na i tovo vakayago era sa sega ni rawa ni vakalomavinakataka na Kalou.

⁹ Ia o ni sa sega ni bula voli me vaka na ka e gadreva na yagomuni, o ni sa bula voli ga me vaka na ka e gadreva na Yalo Tabu, kevaka e dina ni sa bula tiko na Yalo ni Kalou e lomamuni. Na tamata yadua e sega ni tiko vua na Yalo i Karisito e sega ni nona na Karisito o koya.

¹⁰ Ia kevaka sa tiko e lomamuni na Karisito, e dina ga ni sa mate na yagomuni ena vuku ni valavala ca, ia sa bula tiko na yalomuni ni sa vakadonui kemuni na Kalou.

¹¹ Ia kevaka sa tiko e lomamuni na Yalo ni Kalou, o koya sa vakaturi Jisu cake tale mai na mate, ena qai vakabula talega na yagomuni sa vakaiyalayala ga o koya sa vakaturi Karisito mai na mate ena vuku ni nona Yalo Tabu sa tiko e lomamuni.

¹² O koya oqo, oi kemuni na veiwekani, ni sa tiko na noda i tavi me da vakayacora, o ya me da kakua ni bulataka tiko na noda gagadre ni tovo vakayago.

¹³ Ni kevaka o ni sa bula voli ga me vaka na ka e gadreva na yagomuni, o ni na mate; ia kevaka o ni sa vakamatea na veika e gadreva na yagomuni ena Yalo Tabu, o ni na bula.

¹⁴ O ira sa liutaki ira na Yalo ni Kalou era sa luve ni Kalou.

¹⁵ Na Yalo Tabu e solia vei kemuni na Kalou sa sega ni yalo ni veivakabobulataki me vakavurea vei kemuni na rere, ia na Yalo Tabu ga sa vakayacori kemuni mo ni luve ni Kalou, o koya eda sa kaci kina ena kaukauwa ni Yalo Tabu vua na Kalou, “Apa! Tamaqu!”

¹⁶ Na Yalo ni Kalou sa semati koya ki na yaloda yadua me vakadinadinataki kina ni da sa luve ni Kalou.

¹⁷ Ni da sa luvena, eda na taukena na veivakalougatataki sa maroroya tu o koya me nodra na nona tamata, ka da na taukena vata talega kei Karisito na veika sa maroroya tu na Kalou me baleti koya; ni kevaka eda sa vakaivotavota ena nona vakararawataki na Karisito, eda na vakaivotavota talega ena nona lagilagi.

Na Lagilagi ena Gauna mai Muri

¹⁸ Au vakasamataka oqo ni veika rarawa eda sota kaya tiko edaidai ena sega ni rawa ni vakatauvatani kei na lagilagi ena qai vakaraitaki vei keda ena gauna mai muri.

¹⁹ Sa wawa tu ena nanamaki levu na veika buli me vakatakilai ira mai na luvena na Kalou.

²⁰ Ni a sa cudruvi tu o vuravura me vakayalia na nona i naki, ka sa sega ni yaco oqo me vaka na nona i naki vakaikoya ga o vuravura, ia sa nona i naki ga na Kalou me vakakina. Ia sa tikoga na i nuinui

²¹ ni na yaco mai na gauna me na sereki tale kina o vuravura mai na nona vakabobulataki ki na rusa ka me vakaivotavota ena bula galala uasivi sa nodra na luve ni Kalou.

²² Eda sa kila tu me yacova mai na gauna oqo ni ra sa vutugu kece tu na veika buli ena rarawa, io me vaka na rarawa ni vakasucu gone.

²³ Ia era sa sega ni vutugu walega na veika buli; eda sa vutugu talega e yaloda oi keda sa tu vei keda na i sevu ni nona i solisoli na Kalou o ya na Yalo Tabu, ni da sa waraka tiko me vakayacori keda na Kalou me da sa luvena ka sereka na noda bula taucoko me galala.

²⁴ Ni sai koya na noda vakanuinui oqo eda sa vakabulai kina. Ia kevaka eda sa raica rawa tiko na ka eda nuitaka tiko, sa qai sega tale ni okati oqori me i nuinui dina. Se o cei mada e dau nuitaka me yaco e dua na ka sa raica rawa tiko?

²⁵ Ia kevaka eda vakanuinui tiko ki na veika eda se sega mada ni raica, eda na waraka ga ena vosota.

²⁶ Sa vakakina na nona lako mai na Yalo Tabu me mai vukei keda ena noda malumalumu. Ni da sa sega ni kila na i vakarau ni masu e kilikili me da vakayacora. Sa vakamamasu tikoga na Yalo Tabu vua na Kalou ena vukuda ena vutugu sa sega na vosa me vakamacalataka rawa.

²⁷ Ia na Kalou, o koya sa raica na yalo ni tamata, sa kila na vakasama ni Yalo Tabu; ni sa dau masulaki keda na Yalo Tabu me vaka na ka e vinakata na Kalou.

²⁸ Eda sa kila ni sa cakacaka tiko na Kalou ena veika kecega me ra vinaka kina o ira era sa lomani koya, o ira sa kacivi ira o koya me vaka na lomana.

²⁹ O ira sa digitaka oti na Kalou sa lesi ira o koya me ra yaco me ra vakataka na Luvena, me yaco kina na Luvena me ulumatua ena kedra maliwa na tacina ena dua na matavuvale levu.

³⁰ A sa yaco kina me vakaoqo: o ira sa digitaki ira na Kalou, a sa kacivi ira; o ira sa kacivi ira o koya, a sa vakadonui ira; kei ira sa vakadonui ira o koya, a sa vota talega vei ira na nona lagilagi.

Sa Vakaraitaki Na Loloma ni Kalou ena Vuku i Karisito Jisu

³¹ Na cava tale me da qai kaya ena veika kece oqo? Kevaka sa noda i to na Kalou o cei ena qai noda meca?

³² O koya ka a sega ni bureitaka na Luvena dina, ka ni a soli koya ga ena vukuda kece, ena sega li ni solia walega vei keda na ka kecega?

³³ O cei ena beitaki ira na digitaki ni Kalou? Na Kalou sara ga vakaikoya e sa vakadonui ira ka sa okati ira me ra sai valavala dodonu!

³⁴ O cei tale ena rawa ni vakacalai ira? Sa i Jisu Karisito ga ka a mate; a sa vakaturi cake tale, sa tiko ena liga i matau ni Kalou edaidai ka sa dau vakamamasu tiko vua na Kalou o koya ena vukuda.

³⁵ O cei me na tawasei keda rawa mai na loloma i Karisito? Na ka rarawa li, se na yaluma, se na dauveivakacacani, se na dausiga, se na luvaiwale, se na dauveivakarerei se na i seleiwau?

³⁶ Ia me vaka sa volai: “Ena vukumuni, keitou sa vakamatei tiko kina ena siga taucoko; Keitou sa vakatautauvatani kei na sipi ena vakarau vakamatei.”

³⁷ Sega! Ena veika kece oqo eda na qaqa kina ena vuku i koya sa lomani keda.

³⁸ Ni'u sa vakadinata sara ni na sega tale ni dua na ka me na tawasei keda mai na loloma i Karisito; ena sega ni rawata na mate, se na bula, era na sega ni rawata na agilosi se o ira na daulewa mai lomalagi, se na veika e yaco edaidai se na veika ena yaco mai muri,

³⁹ se na vuravura e cake, se na vuravura e ra. Ena sega sara ni dua na ka me na rawa ni tawasei keda mai na loloma ni Kalou sa mai noda ena vuku i Jisu Karisito na noda Turaga.