Roma 6 - Vakavakadewa Vou kei na iVola tale eso

Mate ki na i Valavala Ca, Bula ena Vuku i Karisito

¹ Na cava tale beka me da qai kaya? Me da ia tikoga na i valavala ca me tubu vakalevu kina na loloma-savu ni Kalou?

² E segai sara! Eda sa mate oti ki na i valavala ca, ia e rawa vakacava me da se bula tiko ga ena i valavala ca?

³ O ni sega beka ni kila ni oi keda kece eda sa papitaisotaki vei Karisito Jisu eda sa papitaisotaki me da duavata kei koya ena nona mate?

⁴ Ena noda papitaiso, eda sa bulu vata kaya ka vakaivotavota vata kaya ena nona mate, ka me vaka ni a sa vakaturi cake tale mai na mate na Karisito ena kaukauwa levu nei Tamana, sa dodonu vakakina me da bulataka na bula vou.

⁵ Kevaka eda sa duavata kei koya ena mate me vaka sa vakayacora, eda na duavata talega vakakina ena noda tucake tale mai na mate me vakataki koya.

⁶ Ni da sa kila na ka oqo: na noda i tovo ni bula makawa sa vakamatei vata kei Karisito ena nona kauveilatai, me vakarusai kina na bula ni valavala ca, ka me da kakua tale kina ni bobula tiko ki na i valavala ca.

⁷ Ni sa mate e dua na tamata, sa sereki o koya mai na kaukauwa ni valavala ca.

⁸ Me vaka ni da sa mate vata kei Karisito, eda sa vakabauta ni da na bula vata kaya talega vakakina.

⁹ Ni da sa kila ni sa vakaturi cake tale mai na mate na Karisito ka na sega tale ni mate; ka sa sega vakadua tale ni qai rawai koya o mate.

¹⁰ O koya oqo, ena vuku ni nona a mate, a sa sega ni qai tiko tale e dua na kaukauwa vua na i valavala ca me lewai koya kina; ia na bula sa bulataka o koya, a sa bula ga vua na Kalou.

¹¹ Ena sala vata o ya, mo ni vakasamataki kemuni kina vakaoqo ni o ni sa mate tu, o ya ena vuku ni valavala ca, ia o ni sa bula voli ga ena veitokani kei na Kalou ena vuku i Karisito Jisu.

¹² Na i valavala ca me sa kakua tale ni vakatulewa tiko ena yagomuni sa mate rawa tu, ka mo ni kua ni muria tiko kina na gagadre ca ni yagomuni.

¹³ Ni kua talega ni solia e dua na tiki ni yagomuni ki na i valavala ca, me caka kina na ka ca. Ia mo ni soli kemuni ga vua na Kalou me vaka na tamata sa vakaturi mai na mate ki na bula, ka mo ni solia na nomuni bula taucoko vua na Kalou me vakayagataki ena veika dodonu ka savasava.

¹⁴ Ni sa sega ni dodonu me lewai kemuni tale na i valavala ca, ni o ni sa sega ni tiko ena ruku ni lawa, ia ena ruku ga ni loloma-savu ni Kalou.

Bobula ki na i Valavala Dodonu

¹⁵ Ia sa na qai vakaevei? Me da sai valavala ca tiko beka ga ni da sa sega ni tiko ena ruku ni lawa, ka da sa tiko ga ena ruku ni loloma-savu ni Kalou? E sega sara!

¹⁶ O ni sa kila vinaka ni kevaka o ni sa soli kemuni mo ni vakarorogo vua e dua na tamata, o ni sa yaco mo ni nona bobula na tamata o ya. Ni kevaka o ni sa soli kemuni ki na i valavala ca, ena kena i tinitini ga na mate; ia kevaka o ni sa soli kemuni vua na Kalou, ena vakadonui kemuni o koya.

¹⁷ Ia me vakavinavinakataki ga na Kalou! Ni o ni a bobula tu e liu ki na i valavala ca, ia oqo o ni sa muria ena yalomuni taucoko na dina eso sa basika mai na veivakavuvuli o ni sa vakatavulici kina.

¹⁸ O ni sa sereki mai na kaukauwa ni valavala ca, ka sa yaco mo ni bobula ki na i valavala dodonu.

¹⁹ (Au sa vakayagataka na vosa ga eda dau vakayagataka ena veisiga ena vuku ni malumalumu vakatamata sa tiko vei kemuni.) Ena dua na gauna, o ni a dau solia na veitikimuni taucoko me ra bobula ki na veika dukadukali me caka kina na i naki ca kecega. Ia oqo, mo ni qai solia vakakina na veitikimuni taucoko me ra bobula ki na veika dodonu me vakayacori kina na i naki savasava.

²⁰ Ena gauna o ni a bobula tu kina ki na i valavala ca, o ni a galala tu mai na i valavala dodonu.

²¹ A cava soti mada na veika vinaka o ni sa rawata mai na veika o ni sa qai madualaka tiko oqo? Na i tinitini ga ni veika kecega oqori na mate!

²² Ia oqo o ni sa qai sereki mai na i valavala ca ka sa yaco mo ni nona bobula na Kalou. Na kena yaga oqo vei kemuni sai koya na bula sa soli taucoko vua na Kalou, ka kena i tinitini na bula tawamudu.

²³ Ni sai sau ni valavala ca na mate, ia sai solisoli walega ni Kalou na bula tawamudu, ena vuku i Jisu Karisito na noda Turaga.