Roma 16 - Vakavakadewa Vou kei na iVola tale eso

Na Veitataunaki kei na Vakanuinui Vinaka

¹ Au sa tataunaki Vive yani vei kemuni, na wekada ka sa veiqaravi tiko ena i soqosoqo lotu mai Kenikiria.

² Ni ciqomi koya ena yaca ni Turaga, me vaka na kena i valavala vei ira sa lotu. Ni qai vukei koya ena vuku ni veika sa gadreva, ka ni sa dua na i tokani vinaka o koya vei ira na lewe vuqa ka vakakina vei au.

³ Au sa loloma yani vei Virisila kei Akuila, oi rau na noqu i tokani vinaka ena cakacaka i Jisu Karisito,

⁴ ka rau a bolea na mate ena vukuqu. Au sa vakavinavinaka vei rau, ka sega ni oi au taudua ga, era sa vakavinavinaka talega vei rau o ira na lewe ni veisoqosoqo lotu kece vei ira na veimatanitu tani.

⁵ Au sa loloma talega ki na i soqosoqo lotu era sa dau soqoni tiko ena nodrau vale. Au sa loloma yani vua na noqu i tokani dredre o Avenito, o koya na i matai ni tamata me vakabauti Karisito ena yasana o Esia.

⁶ Au sa loloma vei Maria, o koya sa cakacaka vakaukauwa sara tiko ena vukumuni.

⁷ Au sa loloma vei Adroniko kei Junia, oi rau na wekaqu Jiu keitou a biu vata ki na valeniveivesu; e ratou kilai rau vinaka na i apositolo, ka rau a lotu Vakarisito e liu ni bera oi au.

⁸ Au sa loloma yani vei Abilia, na noqu i tokani vinaka ena vuku ni Turaga.

⁹ Au loloma yani vei Urubeni na noqu i tokani ena vuku ni cakacaka ni Turaga, ka vakakina na noqu i tokani vinaka o Sateki.

¹⁰ Au sa loloma vei Apeli, o koya sa vakadinadinataki na nona yalodina vei Karisito. Au sa loloma yani vei ira na lewe ni matavuvale i Arisitopulo.

¹¹ Au loloma yani vei Erotiani e dua na noqu i tokani Jiu, kei ira na noqu i tokani vakarisito ena vuvale i Narikiso.

¹² Au sa loloma yani vei Taraivini kei Taraivosa, e rau sa cakacaka ena cakacaka ni Turaga; kei na noqu i tokani o Perisi, o koya sa levu sara na nona cakacaka ena vuku ni Turaga.

¹³ Au sa loloma talega yani vei Rufu, e dua na daucakacaka yalodina ena cakacaka ni Turaga, kei na tinana, o koya sa dau okati au me vaka e dua na luvena.

¹⁴ Au loloma yani vei Asinikirito, Felekoni, Erimi, Patiropa, Emasi kei ira era sa lotu era tiko vata kei iratou.

¹⁵ Au loloma yani vei Filoloko kei Tulia, vei Neresi kei na ganena, vei Olimipia kei ira kece na tamata lotu era tiko vata kei iratou.

¹⁶ Ni veikidavaki vakai kemuni ena i regu savasava vakaveitacini. Era sa loloma kece tu yani na veisoqosoqo lotu kece i Karisito.

Na i Tinitini ni Vakasala

¹⁷ Au sa vakamasuti kemuni na veiwekani mo ni qarauni kemuni mai vei ira era dau vakavuna na veisei ka vakacacana na nodra vakabauta na tamata; o ira era dau saqata na i vakavuvuli o ni sa ciqoma oti. Ni tawasei kemuni tani mai vei ira.

¹⁸ Ni o ira era dau cakava na veika vaka o ya era sa sega ni qaravi Karisito tiko na noda Turaga, ia era sa vakalou ga ki na ketedra. Era sa vakacalai ira na tamata yalododonu ena nodra vosa vinaka kei na veicavilaki.

¹⁹ Ia era sa rogoca na tamata kece na nomuni yalodina ki na i Tukutuku Vinaka; o ya na vuna au sa rekitaki kemuni tiko kina. Au vinakata mo ni yalomatua ena ka vinaka, ia mo ni yalowai ena ka e ca.

²⁰ Ia na Kalou, na vu ni noda vakacegu, ena butuqaqi Setani ena ruku ni yavamuni. Me tiko vata kei kemuni na loloma-savu ni noda Turaga o Jisu Karisito.

²¹ Sa loloma yani vei kemuni o Timoci, na noqu i tokani vakacakacaka, ka vakakina o iratou na wekaqu o Lusiu, kei Jesoni, vata kei Sosipeta.

²² Oi au o Teritui, o koya e vola na i vola oqo, au sa loloma talega yani vei kemuni.

²³ Sa loloma yani o Keio, o koya au mai tiko oqo vua ka dau qaravi talega na lotu ena nona vale. E rau sa loloma talega yani o Erasito, na dauniyau ni koro, kei na wekada o Kuaritu.

²⁴ Me tiko kei kemuni kece sara na loloma-savu ni noda Turaga o Jisu Karisito. Emeni.

Tini ena Masu ni Veivakacaucautaki

²⁵ Me da ia na vakalagilagia na Kalou! Sa rawa vua me vakadeitaki kemuni ena nomuni vakabauta, ena vuku ni Tukutuku Vinaka ka'u sa vunautaka me baleti Jisu Karisito, kei na vuku ni kena sa qai vakatakilai mai na ka vuni ka dina sa tabonaki tu ena dua na gauna balavu sara.

²⁶ Ia sa qai vakaraitaki mai na ka dina oqo ena nodra volavola na parofita; ka sa vakatakilai ki na veimatanitu kecega mai na lewa ni Kalou tawamudu, me rawa ni ra vakabauta ka talairawarawa kina na tamata kecega.

²⁷ Ki vua na Kalou duabau, o koya sa tu duadua ga vua na vuku kecega, me ia na vakarokoroko ena vuku i Jisu Karisito ka sega ni mudu! Emeni.