Roma 15 - Vakavakadewa Vou kei na iVola tale eso

Vakalomavinakataki Ira na Tani, ka Segai Kivei Iko ga

¹ Sa dodonu vakaidina vei keda sa kaukauwa na noda vakabauta me da vukei ira na malumalumu ena kena colati na nodra i colacola. Sa sega sara ni kilikili me da vakalomavinakataki keda ga vakai keda.

² Ia me da vakalomavinakataki ira ga na wekada me ra vinaka kina, ka me tarai cake kina na nodra vakabauta.

³ Ni sa sega ni vakalomavinakataki koya vakaikoya na Karisito; ia, me vaka ga ni sa volai ena i Vola Tabu: “Na nodra vosa ni veivakacacani eso me baleti iko e sa tau vei au.”

⁴ Ni veika kece sara sa volai ena i Vola Tabu ena gauna e liu era sa volai me da vakatavulici kina, ka me noda kina na i nuinui sa basika mai na vosota kei na veivakayaloqaqataki e solia vei keda na i Vola Tabu.

⁵ Ia me qai vukei kemuni na Kalou, o koya na i vurevure ni vosota kei na yaloqaqa, mo ni lomavata kina vakai kemuni ena nomuni muria na i vakarau i Karisito Jisu,

⁶ ka mo ni duavata ka domodua ena vakacaucautaka na Kalou, na Tama ni noda Turaga o Jisu Karisito.

Na i Tukutuku Vinaka vei Ira na Kai Matanitu Tani

⁷ O koya oqo mo ni qai veivakadonui vakai kemuni kina, me vaka sa vakadonui kemuni ka ciqomi kemuni na Karisito; ni kitaka oqo me vakalagilagi kina na Kalou.

⁸ Au via tukuna vei kemuni ni a mai dua na dauveiqaravi vei ira na Jiu o Karisito me vakaraitaka na yalodina ni Kalou, me vakayacori kina na vosa ni yalayala ni Kalou vei ira na nodra qase,

⁹ me rawa talega kina ni ra vakacaucautaka na Kalou na kai matanitu tani ena vuku ni nona yalololoma levu. Me vaka sa kaya na i Vola Tabu: “Au na vakarokorokotaki kemuni ena kedra maliwa na kai matanitu tani; Ka'u na vakacaucautaki kemuni ena sere.”

¹⁰ Sa kaya talega: “Mo ni reki, na kai matanitu tani, kei ira na tamata ni Kalou!”

¹¹ Sa kaya tale, “Ni vakarokorokotaka na Turaga, na veimatanitu kecega; Me vakacaucautaki koya na tamata kecega.”

¹² E a kaya talega o Aisea: “Ena lako mai e dua na kawa i Jese; Ena vakaturi cake o koya me liutaki ira na kai matanitu tani, Ka ra na vakanuinui vua.”

¹³ Me qai vakasinaiti kemuni na Kalou, o koya na vu ni nuinui, ena marau kecega kei na vakacegu ena vuku ni nomuni vakabauti koya, me na tubu cake tikoga kina na nomuni vakanuinui ena kaukauwa ni Yalo Tabu.

Na Vu ni Volavola Doudou i Paula

¹⁴ Kemuni na wekaqu, oi au vakataki au sa vakabauta ni o ni sa sinai tu ena yalo vinaka, kei na kila-ka, ka sa rawa kina mo ni veivakavulici vakataki kemuni.

¹⁵ Ia ena i vola oqo au sa doudou sara me'u tukuna tale yani kina vei kemuni e vica na ka. Au sa doudou ena vuku ni loloma-savu sa solia vei au na Kalou,

¹⁶ me'u dua na tamata i Karisito ka me'u veiqaravi vei kemuni na kai matanitu tani. Au sa cakacaka me vaka e dua na bete ena noqu vunautaka na i Tukutuku Vinaka, mai vua na Kalou, me ra yaco kina na kai matanitu tani me ra i soro e vakabau ena mata ni Turaga, ni sa vakacabori ira vua na Yalo Tabu.

¹⁷ Sa qai rawa kina vei au, ena vuku ni noqu sa sema tu vei Karisito Jisu, me'u cibitaka na noqu veiqaravi ena cakacaka ni Kalou.

¹⁸ Au sa doudou me'u tukuna na veika ga sa vakayacora na Karisito ena noqu bula, me rawa kina vei ira kai matanitu tani me ra talairawarawa vua na Kalou. Sa vakayacori na veika oqo mai na nona vosa kei na veika sa cakava,

¹⁹ mai na kaukauwa ni cakacaka mana kei na veika veivakurabuitaki eso, ka vakakina ena kaukauwa ni Yalo Tabu. O koya oqo, ena noqu sa lako voli mai Jerusalemi ki Ilirikumi, au sa vunautaka kece kina na i Tukutuku Vinaka me baleti Karisito.

²⁰ Na gagadre ni yaloqu sai koya me'u vunautaka na i Tukutuku Vinaka ena veivanua e se sega ni bau rogoci vakadua kina na i tukutuku kei Karisito, me'u kakua kina ni la'ki cakacaka ena dua na yavu sa tara oti tu e dua tale na tamata.

²¹ Me vaka sa volai ena i Vola Tabu: “O ira ka se bera ni tukuni vei ira na veika me baleti koya era na rai, Kei ira ka se bera ni rogoca era na kila e vu-ni-yalodra.”

A i Naki ni Veisiko i Paula ki Roma

²² Sa i koya oqo na vuna ka'u sa tarovi kina vakavuqa me'u kakua ni lako yani kina vei kemuni.

²³ Ia oqo ni sa oti na noqu veiqaravi ena veiyasana oqo, ka sa balavu mai na gauna ka'u gadreva voli kina me'u mai raici kemuni,

²⁴ au sa nakita kina me'u sa lako yani oqo. Au sa gadreva me'u na sikovi kemuni ena noqu i lakolako ki Sipeini, ka mo ni qai vukei au talega me'u yaco rawa ki kea, ni sa na oti na noqu veisiko lekaleka vei kemuni.

²⁵ Ia ena gauna oqo, au se tei lako mada ki Jerusalemi me'u kauta na ka-ni-loloma vei ira na tamata ni Kalou maikea.

²⁶ Ni ra sa lomasoli na i soqosoqo lotu mai Masitonia kei Akaia me ra solia e dua na nodra i solisoli me vukei kina o ira na dravudravua ena kedra maliwa na tamata ni Kalou mai Jerusalemi.

²⁷ A sa nodra vakataki ira ga na vakatulewa oqo; ia sa nodra i tavi talega oqo, me ra vukei ira. Me vaka ni ra sa vota na Jiu na nodra veivakalougatataki vakayalo kivei ira na kai matanitu tani, sa dodonu vakakina vei ira na kai matanitu tani me ra vota na nodra veivakalougatataki vakayago mai na nodra i yau kivei ira na Jiu.

²⁸ Ena gauna ka'u na vakaotia kina na i tavi oqo ka solia vei ira na i lavo kece sara sa kumuni me baleti ira, au sa na qai gole ki Sipeini, ka la'ki sikovi kemuni yani ena noqu i lakolako ki kea.

²⁹ Ena noqu i lakolako yani, au kila ni'u sa na lako yani kei na veivakalougatataki taucoko i Karisito.

³⁰ Au sa vakamasuti kemuni na veiwekani, ena vuku ni noda Turaga o Jisu Karisito kei na loloma sa solia vei kemuni na Yalo Tabu: mo ni duavata kei au ena nomuni masu vagumatua vua na Kalou ena vukuqu.

³¹ Ni masulaka me'u na taqomaki mai na ligadra na tawa vakabauta mai Jutia, ka me ra ciqoma na noqu veiqaravi mai Jerusalemi o ira na tamata ni Kalou maikea.

³² Ni kevaka sa vakaoqo na lewa ni Kalou, au na lako sara yani vei kemuni ena reki, ka marautaka e dua na gauna vinaka ni noda sota vata.

³³ Me qai tiko vata kei kemuni yadudua kece sara na Kalou, o koya na vu ni vakacegu. Emeni.