Roma 12 - Vakavakadewa Vou kei na iVola tale eso

Bula ni Veiqaravi Vua na Kalou

¹ O koya oqo, ena vuku ni yaloveivosoti ni Kalou kivei keda, au sa vakamamasu kina vei kemuni na veiwekani mo ni cabora na yagomuni me i madrali bula, me savasava ka vinaka vua na Kalou. Sa i koya oqo na i soro vakayalo dina mo ni vakacabora.

² Ni kakua ni vakaitovotaki kemuni ena veimataqali i tovo ni vuravura oqo. Ia ni vakadonuya ga vua na Kalou me vakavouia taucoko sara na nomuni vakasama ka me veisautaki kina na nomuni bula e loma. O ni na qai kila rawa kina na loma ni Kalou, ka kila talega na ka yaga, ka vinaka, ka uasivi sara.

³ Ena vuku ni loloma-savu ni Kalou vei au, au sa kaya kina vei kemuni kece sara me kakua ni dua vei kemuni me raici koya cake vakasivia mai na kena e veiganiti kaya. Ia me yalomatua ga ena nona vakanananu, ka lewa vakavinaka na nona bula me veirauti kaya kei na i vakarau ni vakabauta sa vota vei kemuni yadudua na Kalou.

⁴ Sa vuqa na veitiki ni yagoda, ia sa duabau ga na yago; ia na veitiki ni yago kece oqo sa duidui na nodra i tavi.

⁵ Sa vakakina oi keda, e dina ga ni da sa lewe vuqa, eda sa lewe ni duabau ga na yago ena noda sa tu vata kei Karisito, ka da sa veisemati vata ni da sa veitiki ni yago duidui ni dua ga na yago.

⁶ O koya oqo eda sa vakayagataka kina na veisolisoli e duidui sa soli vei keda me vaka na loloma-savu ni Kalou sa soli vei keda. Kevaka e noda i solisoli me da vunautaka na vosa ni Kalou, me da vakayacora sara vakakina me vaka na i vakarau ni noda vakabauta.

⁷ Kevaka e noda i solisoli na dauveiqaravi, me da ia sara na veiqaravi; ke veivakavulici, me da ia sara na veivakavulici.

⁸ Kevaka me da veivakauqeti vei ira na kena vo ni vakabauta, me da kitaka sara vakakina. O koya sa dau solisoli me vakayacora vakakina ena yalovinaka; o koya sa dau veiliutaki sa dodonu me cakacaka vakaukauwa sara; o koya sa dauloloma me vakayacora oqo ena yalo marau.

⁹ Me dina ka maucokona vinaka na nomuni loloma. Mo ni cata na ca ka taura matua na ka vinaka.

¹⁰ Ni veilomani sara me vaka ni o ni sa veitacini ena vuku i Karisito; ka mo ni veiuasiviti ena veivakarokorokotaki.

¹¹ Ni cakacaka vakaukauwa, ka kakua ni vucesa. Ni qarava na Turaga ena yalodina.

¹² Mo ni reki tiko ena vuku ni vakanuinui sa tiko vei kemuni, ni dau vosota na veika rarawa, ka ia tikoga na masu ena veigauna kece.

¹³ Ni solia na veika e tu vei kemuni vei ira na wekamuni vakayalo era leqa tu, ka dau dolava na nomuni vale vei ira na vulagi.

¹⁴ Ni masulaka vua na Kalou me vakalougatataki ira era vakacacani kemuni — io, mo ni kerea vua me ia na veivakalougatataki, ka sega ni veicudruvi.

¹⁵ Ni marau vata kei ira era sa marau, ka tagi vata kei ira era sa tagi.

¹⁶ Ni veinanumi vakatautauvata. Ni kakua ni dau viavialevu, ia ni makututaka ga na veitokani kei ira sa vakaleqai ka malumalumu. Ni kakua ni nanuma ni o ni sa vuku.

¹⁷ Kevaka e dua sa cakava e dua na ka ca vei kemuni, ni kakua ni sauma lesu ena ca. Ni tovolea mo ni cakava na ka e vinaka ena matadra na tamata kecega.

¹⁸ Ni cakava na ka kecega o ni rawata mo ni veilomani tikoga kina kei ira na tamata kecega.

¹⁹ Ni kakua ni sauma na ca sa vakayacori vei kemuni. Laiva ga vua na Kalou me sauma. Ni sa volai tu ena i Vola Tabu: “Sa noqu i tavi me'u cudruvaka, au na sauma oi au, sa kaya na Turaga.” Ni sa kaya talega na i Vola Tabu:

²⁰ “Kevaka sa viakana na nomu meca, mo vakani koya; kevaka sa viagunu, mo vagunuvi koya; ni o sa cakava oqo, o na vakavuna me madua vakalevu sara kina.”

²¹ Ni kakua ni vakatara na ca me vakadrukai kemuni, ia mo ni valuta ga na ca ena vinaka.