Roma 10 - Vakavakadewa Vou kei na iVola tale eso

¹ Kemuni na veiwekani, au sa gadreva mai na vu ni yaloqu taucoko ka masulaka vua na Kalou me ra vakabulai kece na kai noqu.

² Au sa rawa ni vakadinadinataka ni ra sa dau gumatua dina sara ena nodra qarava na Kalou, ia sa sega ga ni yavutaki ena rarama dina na nodra veiqaravi vakayalo.

³ Era se sega ni kila na sala e vakadonui ira kina na tamata na Kalou, ia era sa dau qara ga na nodra sala vakai ira; ka ra sa mani sega kina ni vakamuria na sala sa dau veivakadonui kina na Kalou.

⁴ Ni sai cavacava ni Lawa na Karisito, me yaco rawa kina vei ira kecega sa vakabauta me ra vakadonui mai vua na Kalou.

Sa Baleti Keda Kece na Veivakabulai

⁵ Sa i koya oqo na ka sa vola o Mosese me baleta na nona veivakadonui na Kalou ena noda muria na Lawa: “Na tamata e vakayacora na ka sa vakarota na Lawa ena bula kina.”

⁶ Ia sai koya oqo na ka sa tukuna na i Vola Tabu me baleta na noda vakadonui mai vua na Kalou ena vuku ni vakabauta: “Kakua ni kaya e lomamu, O cei ena lako cake ki lomalagi?” (o ya, me kauti Karisito sobu mai).

⁷ “Kakua talega ni kaya, O cei ena lako sobu i bulu?” (o ya, me vakaturi Karisito cake tale mai na mate.)

⁸ Sa i koya ga oqo na ka e kaya, “Sa tu volekati iko na vosa ni Kalou, io sa tu ena gusumu kei na lomamu” — o ya, na i tukutuku ni vakabauta keitou sa vunautaka.

⁹ Kevaka o na vakatusa e gusumu, ni sa Turaga o Jisu, ka vakabauta e vu ni yalomu ni sa vakaturi koya cake tale mai na mate na Kalou, o na vakabulai.

¹⁰ Ni sa wilika na Kalou me dodonu na tamata ena vuku ni vakabauta ni yalona, ka sa vakabulai o koya ena vuku ni vakatutusa ni gusuna.

¹¹ Ni sa kaya na i Vola Tabu, “O koya sa vakabauti koya ena sega ni vakamaduataki.”

¹² Oqo eda sa okati kece kina na tamata, ka ni sega na kedra duidui na Jiu kei ira na kai matanitu tani. Sa dua ga na noda Turaga na tamata kecega ka sa vakalougatataki ira vakalevu era sa masu vua.

¹³ Me vaka sa kaya na i Vola Tabu, “O ira yadua era masuta na yaca ni Turaga era na vakabulai.”

¹⁴ Ia ena rawa beka vakacava me ra masu vua kevaka era sega ni vakabauta? Era na qai vakabauta rawa vakacava kevaka era se bera ni rogoca na i tukutuku? Era na rogoca rawa li vakacava kevaka e sega ni dua me la'ki vunautaka vei ira na i tukutuku?

¹⁵ Ena la'ki vunautaki rawa vakaevei na i tukutuku kevaka era sa sega ni talaki o ira na i talai? Me vaka sa volai, “Sa ka lagilagi dina na nodra yaco mai na i talai ni ra kauta voli mai na i Tukutuku Vinaka!”

¹⁶ Ia sa sega ga ni ciqoma na i Tukutuku Vinaka na tamata kece sara; ka ni a kaya kina vakaikoya o Aisea, “Kemuni na Turaga, o cei sa vakabauta na neitou i tukutuku?”

¹⁷ Eda sa kila kina ni sa rawa na vakabauta mai na veika sa rogoci, a veika sa rogoci oqo sa lako mai na vosa i Karisito.

¹⁸ Ia ka'u sa taroga: e dina beka li ni ra a sega ni rogoca na i tukutuku? Sega, e sega ni dina, ka ni ra a sa rogoca o ira me vaka ni a kaya na i Vola Tabu, “Na rorogo ni domodra sa yaco yani ki na veiyasa i vuravura kecega; Sa yaco na nodra vosa ki na i yalayala kei vuravura.”

¹⁹ Au sa qai taroga tale: Era a sega beka ni kila o ira na Isireli? A sa sauma taumada o Mosese vakaoqo ne, “Au na vakavuna mo ni vuvutaka ira era sa sega ni dua na matanitu; Ka'u na vakacudrui kemuni mai vua na dua na matanitu lialia.”

²⁰ Ia o Aisea sa doudou cake sara e nona kaya, “Era sa kunei au o ira era a sega ni vakasaqarai au; Ka'u sa rairai vei ira era a sega ni vakatarogi au.”

²¹ Ia me baleti Isireli, a sa kaya, “Au sa dodoka tu na ligaqu ruarua ena siga taucoko me'u kidavaka e dua na kawa tamata talaidredre ka dau vakayaco lomadra.”