Osea 8 - Vakavakadewa Vou kei na iVola tale eso

Sa Cudruvi Ira na Isireli o Jiova ena Vuku ni Qaravi Kalou Matakau

¹ A sa kaya o Jiova, “Ni uvuca na davui! Era sa vuka sobu mai oqo na meca ki na noqu vanua me vaka na ikeli! O ira na noqu tamata era sa voroka na noqu veiyalayalati kei ira ka talaidredre ki na noqu vunau.

² E dina ga ni ra sa vakatokai au me'u nodra Kalou, ka ra sa tukuna ni ra sa noqu tamata ka ra sa kilai au,

³ ia era sa cata ga na ka vinaka. Ena vuku na ka oqo, era na vakasasataki kina mai vei ira na kedra meca.

⁴ “Era sa bulia na nodra tui na noqu tamata, ia era sa sega ga ni qara na noqu veivakadonui. Era sa lesi ira na turaga, ia au a sega ni kila. Era sa cakava na nodra matakau ena siliva kei na koula, ia sa ka ni veivakarusai ga kivei ira.

⁵ Au sa cata oi au na bulumakau koula era sa qarava na lewe ni koro o Samaria. Sa waqa na noqu cudru me baleti ira. A cava na kena dede ni bera ni ra muduka na nodra qaravi kalou matakau?

⁶ A sa cakava na matai ni Isireli e dua na matakau, ia na ka oqo sa sega sara ni dua na kalou! Na bulumakau koula sa qaravi mai Samaria ena vorolaki vakalalai!

⁷ Ni ra sa kaburaka na cagi, era na tamusuka na covulaca! Na loga ni sila sa sega na vuana ena sega na buli rawa kina e dua na madrai. Ia kevaka mada ga e mani vua, era na kania ga na vuana na kai tani.

⁸ Sa yaco o Isireli me vakataki ira na vo ni matanitu tale eso, ka sa tawa yaga me vaka na kuro cicila.

⁹ Era sa dau vakau nodra mua ga na Isireli me vaka na nodra yalo-qa na asa kila. Era sa la'ki kere veivuke vei Asiria, ka saumi ira na veimatanitu tale eso me taqomaki ira.

¹⁰ Ia oqo ka'u na vakasoqoni ira vata mai ka totogitaki ira. E sega ni dede era sa na mosi vakalevu ena rarawa bibi ena gauna sa vakasosataki ira kina na tui Asiria.

¹¹ “Ni levu ga ni i cabocabonisoro era bulia na Isireli me bokoci kina na nodra i valavala ca, na levu talega ni nodra vanua me ia kina na i valavala ca!

¹² Au sa vola e vuqa sara na i vunau me nodra na tamata, ia era sa besetaka ga ni ra sa nanuma ni sa ka vakatani.

¹³ Era sa vakacaboisoro vei au ka ra sa kania na lewe ni manumanu sa vakacabori. Ia oi au, o Jiova, ka'u sa sega ni marautaki ira, ka'u na nanuma na nodra caka cala ka cudruvi ira kina; io au na vakauti ira lesu tale ki Ijipita!

¹⁴ O ira na Isireli era sa tara na valenitui eso, ia era sa guilecavi koya ga ka sa buli ira. O ira na Juta era sa tara na veikoro eso sa vakabainivalu. Ia au na tala ga na bukawaqa me vakama na nodra valenitui kei na nodra veikoro.