Osea 6 - Vakavakadewa Vou kei na iVola tale eso

Na Nodra Sega ni Veivutuni Dina na Tamata

¹ Era sa kaya na tamata, “Me da mai lesu vei Jiova! A sa vakararawataki keda o koya, ia ena vakabulai keda sara vakaidina; a sa vakamavoataki keda, ia ena vauca talega na noda mavoa.

² Ena qai vakabulai keda ni oti e bogi rua, ena qai vakaturi keda cake tale ena i katolu ni siga, me da na qai bula vata kei koya.

³ Me da tovolea sara me da veikilai kei Jiova. Ena lako vakaidina mai kivei keda o koya me vaka na kida ni mataka; io, ena lako vakaidina mai vei keda me vaka na uca mirimiri ena vula i tubutubu ka dau vakasuasuataka na vuravura.”

⁴ Ia sa kaya ga o Jiova, “I Isireli kei Juta, na cava me'u na vakayacora vei kemudrau? Na nomudrau lomani au sa dau seavu tani vakatotolo sara me vaka na tegu ena kida ni mataka.

⁵ O ya na vuna ka'u a talai ira yani kina na parofita vei kemuni me ra tukuna na i tukutuku ni veilewai kei na veivakarusai. Na veika ga ka'u sa gadreva vakamatata mai vei kemuni oqo:

⁶ Au sa gadreva ga na nomuni yaloveivosoti, ka segai na i soro me vakacabori. Ena vinaka cake vei au me ra kilai au na noqu tamata mai na nodra ia na vakacaboisoro vei au.

⁷ “Ia ena gauna ga era sa curuma kina na vanua mai Atama, era a qai voroka tale na veiyalayalati ka'u a vakayacora kei ira mai kea.

⁸ O Kiliati na koro sa sinai kina na tamata i tovo vakasisila kei na vakadave dra.

⁹ O ira na bete era sa vaka na lawalawa daubutako sa waraka vakavuni e dua me ra mokuta. Era sa ia sara tale mada ga na veivakamatei ena gaunisala ki na vanua tabu mai Sikemi, ka ra sa nakita na nodra vakayacora na i tovo lolovira vakaoqo!

¹⁰ Au sa raica e dua na i valavala torosobu e Isireli; o ira na noqu tamata era sa vakadukadukalitaki ira mai na nodra qarava na kalou matakau eso.

¹¹ “Me baleti kemuni talega na Juta, au sa lokuca oti na gauna me'u totogitaki kemuni vakakina ena vuku ni veika o ni sa vakayacora tiko.