Osea 5 - Vakavakadewa Vou kei na iVola tale eso

¹ “Dou rogoca oqo, oi kemudou na bete! Dou vakarorogo, na mataqali i Isireli! Dou vakatudaliga, na nona mataqali na Tui — me rawa ni vakatauci na lewa ena vukumudou! O ni sa yaco mo ni ka ni veivakatarabetaki e Misipa, kei na lawa ni veicoriti sa tevuki ena dela i Tapori,

² kei na qara titobu mai na koro o Sitimi, ia ka'u na cudruvi kemuni kece sara.

³ Au sa kila na i tuvaki kei Isireli — ka sa sega ni rawa ni vunitaki au. Sa sega ni yalodina o koya ni sa ia tikoga na veibutakoci; sa dukadukali o Isireli.”

Sa Vunauca na Veibutakoci o Osea

⁴ Na nodra i valavala vakasisila na tamata sa tarova na nodra lesu tale vua na nodra Kalou. Ni sa sega ni yalodina o Isireli vua na watina ka sa tu ga e lomadra na tamata na yalo ni veibutakoci, ka ra sa lecava na Kalou.

⁵ Na viavialevu i Isireli sai vakadinadina ni nona sa beitaki. Na nodra i valavala ca sa vakavuna na nodra bale, ka ra na bale vata kaya o ira na Juta.

⁶ Era na kauta yani na nodra sipi kei na bulumakau me cabori vei Jiova, ia sa sega ga ni kauta mai vei ira e dua na ka vinaka. Era sa sega ni kunei koya rawa, ni sa gole tani mai vei ira o koya.

⁷ Era sa sega ni yalodina vei Jiova; era sa sega ni okata na luvedra me nona na Kalou. O koya oqo era na vakarusai kina vata kei na nodra vanua.

Na i Valu ena Kedrau Maliwa o Juta kei Isireli

⁸ Dou uvuca na davui mai Qibea! Dou vakatagica na alamu mai Rama! Dou tabalaka na kaila ni vakacibi i valu mai Peciaveni! Dou vakarau ki na i valu, oi kemudou na Penijamini!

⁹ Na siga ni veilewai sa voleka mai, ka na vakarusai kina o Isireli. Kemuni na Isireli, ena yaco vakaidina sara na ka oqo!

¹⁰ A sa kaya o Jiova, “Au sa cudru baleta ni ra sa vakataki ira na dau tosoya vakatawadodonu na i yalayala ni qele o ira na dauveiliutaki e Juta ena nodra curuma vakaukauwa na vanua o Isireli. O koya oqo ka'u na sovaraka kina vei ira na noqu cudru me vaka na waluvu.

¹¹ Sa vakararawataki o Isireli ena vuku ni veivakasaurarataki; sa vakayalia na tiki ni vanua sa nona vakai koya baleta ni sa la'ki kere veivuke tiko vei ira sa sega na ka me ra solia.

¹² Au na kauta mai na veivakacacani vei Isireli kei na leqa vei ira na Juta.

¹³ “Ena nona a qai liaca o Isireli na bibi ni nona tauvimate ka liaca o Juta na nona mavoa, era sa qai la'ki kere veivuke o ira na Isireli vei tui Asiria, ia sa sega ga ni vakabulai ira rawa vua se me vakamavotaka na nodra mavoa.

¹⁴ Au na vakasasataki ira na Isireli kei na Juta me vaka na laione. Au na basubasuraki ira ka qai laivi ira. Ni'u sa yarataki ira tani, ena sega ni dua me na vueti ira tale.

¹⁵ “Au na biuti ira vakatikitiki na noqu tamata me yacova na gauna sa veirauti vinaka kina na nodra vakararawataki ena vuku ni nodra i valavala ca ka vakasaqarai au tale mai. Ni ra na saga me ra kunei au ena gauna ni nodra rarawa.”