Osea 14 - Vakavakadewa Vou kei na iVola tale eso

Na Vakamamasu i Osea vei Isireli

¹ Oi kemuni na Isireli, mo ni lesu tale mai vei Jiova na nomuni Kalou. Na nomuni i valavala ca sa vakavuna mo ni sikalutu ka bale sobu.

² Ni lesu ga vei Jiova, ka mo ni taura na masu oqo me nomuni i madrali vua: “Ni bokoca mada na neimami caka cala kece sara ka ciqoma na neimami masu, io keimami na qai vakacaucautaki kemuni me vaka na neimami vosa ni yalayala.

³ Ena sega ni vakabulai keimami rawa o Asiria, ka sa sega ni taqomaki keimami rawa na ose ni valu. Keimami na sega tale vakadua ni tukuna vakaoqo vei ira na neimami kalou matakau ni ra sa neimami Kalou. I Jiova, ni vakatakila mada na nomuni yalololoma vei ira sa luveniyali, ni sa sega e dua me vukei ira.”

Sa Yalataka o Jiova na Bula Vou vei Isireli

⁴ A sa kaya o Jiova, “Au na vakalesui ira tale mai vei au na noqu tamata. Au na lomani ira ena vu-ni-yaloqu taucoko sara; Sa muduki vakadua na noqu cudruvi ira.

⁵ Au na vaka na tegu vei ira na Isireli; Era na se me vaka na lili. Ena dei sara na wakadra Me vaka na veivunikau ni Lepanoni.

⁶ Na kena tubucoke sa tete yani, Ka sa totoka me vaka na vuniolive. Na kena i boi ena boi yawa Me vaka na kau sitari ni Lepanoni.

⁷ Era na bula ga ena ruku ni noqu veitaqomaki. Era na vakatubura na sila Ka vuavuai me vaka na loganivaini. Era na kilai levu sara me vaka na waini ni Lepanoni.

⁸ Era na sega ni cakava e dua na ka me baleta na kalou matakau o ira na Isireli; Au na rogoca na nodra masu ka maroroi ira; Au na vakarurugi ira me vaka na vunikau drokadroka vinaka; Ni sai au ga na vurevure ni nodra kalougata kece sara.”

Na Kena i Tinitini

⁹ Me ra qai kila o ira sa yalomatua na veika sa volai eke, ka me ra tugana sara ki lomadra. Ni sa dodonu ga na sala i Jiova, ka sa bula o ira na yalododonu ni ra sa muria, ia era sa tarabe ga ka bale sobu o ira na tamata i valavala ca baleta ni ra sa sega ni kauwaitaki ira.