Osea 12 - Vakavakadewa Vou kei na iVola tale eso

¹ Sa tawayaga ka ca wale ga na veika kecega era sa vakayacora na Isireli mai na mataka ki na yakavi. Sa levu ga ena kedra maliwa na veivakaisini kei na i tovo vakarerevaki eso. Era sa ia ga na veiyalayalati kei Asiria ka qaravi bisinisi vata kei Ijipita.”

² E dua na ka sa beitaki Juta kina o Jiova; ena cudruvi Isireli talega ena vuku ni nodra i valavala na lewenivanua. Ena sauma lesu vei ira na veika era sa cakava.

³ Na nodra qase o Jekope sa veimulomulo kei na tuakana o Iso ni rau se tikoga ena ketei tinadrau; ena gauna sa qase cake kina o Jekope, a sa veimulomulo kei na Kalou,

⁴ ni rau a veimulomulo kei na agilosi ka mani qaqa kina. A sa tagi ka kerea na veivakalougatataki. A sa qai lako mai na Kalou vua na noda qase o Jekope ka sa vosa vua mai Peceli.

⁵ Oqo ga o Jiova na Kalou ni lewevuqa — sai Jiova ga na yaca me na dau qaravi kina.

⁶ O koya oqo, oi kemuni na kawa i Jekope, mo ni lesu mai kina vua na nomuni Kalou ka dinati koya. Ni yalodina ka dau cakacaka vakadodonu, ka vosota voli ga ni o ni waraka na nomuni Kalou me cakacaka.

Na Veivosa Tale Eso ni Veilewai

⁷ A sa kaya o Jiova, “O ira na Isireli era sa sega ga ni tamata daucakacaka vakadodonu me vakataki ira ga na kai Kenani; era sa taleitaka ga me ra lawakitaki ira na dauveivoli ni ra sa dau vakayagataka na i vakarau ni bibi sa sega ni dodonu, ka ra sa dauguta me ra ia na veivakasaurarataki.

⁸ Era sa kaya, “Keimami sa vutuniyau. Sa ka levu sara na neimami i yau talei. Ena sega talega ni dua me na beitaki keimami ena kena rawati vakatawadodonu na neimami i yau.’

⁹ Ia oi au, o Jiova na nomuni Kalou ka sa liutaki kemuni tani mai na vanua o Ijipita, au na vakayacora mo ni vakaitikotiko tale ena veivalelaca, me vaka na gauna ka'u a lako yani kina vei kemuni ena vanua dravuisiga.

¹⁰ “Au a vosa vei ira na parofita ka solia vei ira e vuqa na raivotu, ka'u a soli i vakasala ka vunauci ira na tamata mai na gusudra na parofita.

¹¹ Ia sa qaravi ga na kalou matakau eso mai Kiliati, ka ra na mate vakaidina o ira sa sokalou vei ira. Era sa vakacabori na bulumakau tagane mai Kilikali, ka ra na talaraki sobu na i cabocabonisoro mai kea me ra i binibini vatu ena veivanua lala.

¹² A sa kilikili ga vua na noda qase o Jekope me dro ki Mesopotemia, na vanua ka sa cakacaka vakai vakatawanisipi voli kina o koya vua e dua tale na tamata me rawata kina na watina.

¹³ Ia o Jiova ga ka sa tala e dua na parofita me vueti ira na Isireli mai na nodra a vakabobulataki voli e Ijipita, ka me maroroi ira vinaka.

¹⁴ Era sa vakavuna na Isireli me tubu na cudru i Jiova; io, sa veiganiti ga kei ira me ra vakamatei ena vuku ni nodra cala. Na nodra Turaga ga ena qai totogitaki ira ena vuku ni veivakalolovirataki era sa kauta mai ki vua.