Osea 11 - Vakavakadewa Vou kei na iVola tale eso

Na Loloma ni Kalou vei Ira na Nona Tamata Talaidredre

¹ A sa kaya o Jiova, “Ni a se gone o Isireli, au a lomani koya Ka'u a kacivi koya tani mai Ijipita ni sa luvequ

² Ia na levu ga ni noqu kacivi koya, Na levu talega ni nona vuki tani mai vei au. Na noqu tamata era sa vakacaboisoro vei Peali; Era sa vakama na ka boi vinaka ki na matakau eso.

³ Ia sai au ga ka vukei Isireli me vakavuvuli lako. Au a roqoti ira na noqu tamata e ligaqu, Ia era sega ga ni kauwaitaka na noqu vakabulai ira.

⁴ Au a tuberi ira ena loloma dina sara. Ka'u a keveti ira cake mai ki baluqu; Au a lolou sobu ena noqu a vakani ira.

⁵ “Era sa bese ga ni via lesu tale mai vei au, o koya oqo era na lesu ga kina ki Ijipita, ka na yaco me nodra tui o Asiria.

⁶ Ena curuma na nodra veikoro na veivaluvaluti ka vakarusa na nodra matamata ni koro. Era na vakaleqai kina na noqu tamata baleta ni ra sa vakayacora ga na ka era nanuma ni sa dodonu vei ira.

⁷ O ira na noqu tamata era sa nakita ga me ra vuki tani mai vei au. Era na tagi vakalevu ena vuku ni i vua sa vakataqari e domodra, ia ena sega ga ni dua ena laveta tani mai vei ira.

⁸ “I Isireli, me'u na laivi iko rawa vakacava? Me'u na biuti iko rawa vakaevei? Ena rawa beka me'u vakarusai iko me vakataki Atima, Se kitaka vei iko na ka au a cakava vei Sepoimi? Sa sega sara ni vakatara na yaloqu me'u kitaka! Na noqu lomani iko e sa rui cecere sara.

⁹ Au na sega ni totogitaki iko ena noqu cudru; Au sa sega tale vakadua ni vakarusai Isireli. Ni'u sa Kalou oi au, ka'u sa sega ni tamata. Oi au, o Koya na Yalosavasava, sa tiko vata kei iko. Au na sega ni torovi iko ena dela ni cudru.

¹⁰ “Era na muri au na noqu tamata ena gauna ka'u sa tagi kina vaka na laione vei ira kedra meca. Era na vakusakusa mai kivei au mai na yasana ki ra.

¹¹ Era na lako mai Ijipita me vaka na nodra vuka mai na manumanu vuka, ka ra lako mai Asiria me vaka na ruve. Au na qai vakalesui ira tale ki na nodra veivale. Sa i au ga o Jiova ka sa kaya na veika oqo.”

Sa Vakarusai o Isireli kei Juta

¹² A sa kaya vakaoqo o Jiova, “O ira na Isireli era sa tiko wavoliti au ena nodra vosa lasu kei na veivakaisini, ka ra se veisaqasaqa voli ga na Juta vaka kei au, na Kalou yalodina ka tabu.