Osea 10 - Vakavakadewa Vou kei na iVola tale eso

¹ O ira na Isireli sa vaka na taba ni vaini sa levu sara kina na qerepi. Na levu ga ni nodra vuavuai vinaka, na levu talega ni cabocabonisoro era sa tara. Na vinaka cake ga ni nodra vanua, na levu cake talega ni nodra ukucavutaka na duru vatu tabu era sa dauqarava.

² Na tamata era sa dau veivakaisini sa dodonu oqo me ra vakararawataki ena vuku ni nodra i valavala ca.

³ Era na tekivu tukuna vakaoqo o ira oqo, “Sa sega na neimami tui baleta ni keimami sa sega ni rerevaka na Kalou. Ia na cava ena cakava rawa e dua na tui vei keimami?”

⁴ Sa ka wale ga na vosa era tukuna, era sa dau bubului vakailasu, ka vakayacora eso na veidinadinati tawayaga. Na lewa dodonu sa vukici me lewa vakatawadodonu, ka sa tubu voli me vaka na co rerevaki ena qele sa siviyarataki vinaka.

⁵ Era na rere ka osivaka na vakarusai ni bulumakau koula mai Peciaveni o ira na vakaitikotiko mai Samaria. Era na tagicaka o ira oqo kei ira na bete ni kalou matakau. Era na qolouvaka ena gauna sa luvati laivi kina na kena lagilagi.

⁶ Ena qai laveti yani ki Asiria na matakau oqo me i soro vua na tui levu. Era na vakalolomataki na Isireli ka vakamadualaki ena vuku ni veivakasalataki era sa muria.

⁷ Ena kau talega yani na nodra tui, me vaka e dua na tiki ni kau ena dela ni wai.

⁸ Ena vakarusai na veiburekalou i Aveni, na vanua era sa dausokalou kina o ira na Isireli ki na kalou matakau. Ena tubu cake mai na soni kei na kau votovotoa me vakaruguya vakadua na nodra i cabocabonisoro. Era na kaci yani vakaoqo ki na veiulunivanua na tamata, “Ni vunitaki keimami!” ka kacivaka ki na veidelana, “Ni ubi keimami!”

⁹ A sa kaya o Jiova, “O ira na Isireli era sa sega ga ni muduka na nodra caka cala vei au me vakatekivu mai na gauna era tekivu caka cala kina mai Qibea. Sa i koya oqori na vuna o ni na valuti kina mai Qibea.

¹⁰ Au na valuti ira ka totogitaki ira na tamata i valavala ca oqo. Era na duavata na veimatanitu me ra valuti ira, era na cudruvi ena vuku ni levu na cala era sa vakayacora.

¹¹ “O Isireli sa vaka e dua na bulumakau gone sa vakavulici vinaka, a sa vakarau tu ka nanamaki ki na cakacaka ni butu sila. Ia ka'u sa qai nanuma me'u biuta e dua na i vua ki na usouso ni domona rairai totoka ka vakarautaki koya me qarava na cakacaka sa bibi cake. Au a vakayacora me dreta na i siviyara o Juta ka me dreta na i vakamalumuniqele o Isireli.

¹² Au sa qai kaya, ‘Ni cukita na veivanua vovou me baleti kemuni, ni tea na valavala dodonu, ka tamusuka na kalougata o ni na rawata ena vuku ni nomuni yalodina vei au. Oqo na gauna mo ni vuki lesu mai kina kivei au na nomuni Turaga, ka'u na lako mai me'u vakatauca na veivakalougatataki vei kemuni.’

¹³ Ia o ni sa qai tea ga na i tovo vakasisila ka tamusuka kina na lewa tawadodonu. O ni sa kana ga mai na vua ni nomuni lasulasu. “Ni o ni sa vakanuinui ga ki na nomuni qiqinivalu kei na i wiliwili ni sotia levu sa tiko vei kemuni,

¹⁴ ena yacovi kemuni na i valu, ka na vakarusai taucoko na nomuni koro ni valu. Ena tautauvata kei na siga sa vakarusai Peciapeli kina o Salimoni na tui ena i valu, ka ra sa vakamatei kina o ira na marama tina kei na dui luvedra.

¹⁵ Oqo na ka ena yaco vei kemuni, oi kemuni sa tiko mai Peceli, ena vuku ni caka cala vakadomobula o ni sa vakayacora. Ena mate o tui Isireli ena gauna ga sa tekivu kina na i valu.