Osea 1 - Vakavakadewa Vou kei na iVola tale eso

¹ A vosa i Jiova me vaka a yaco vei Osea na luve i Pieri ena gauna e ratou Tui Juta kina o Usaia, o Jocame, o Easi, Esekaia kei na gauna i Jeropoama na luve i Joasa na Tui Isireli.

Na Vuvale i Osea

² Ena i matai ni gauna sa vosa kina o Jiova vei Osea, ka kaya vua o Jiova, “Mo lako ka kauta me watimu e dua na yalewa dautagane, ka ra na luve ni veibutakoci na luvemu, ka ni sa dautagane vakalevu na vanua, ni ra sa vuki tani mai vei Jiova.”

³ A sa lako ka kauti Komera na luve i Tipileimi me watina: a sa kunekune ka vakasucuma e dua na gonetagane.

⁴ A sa kaya vua o Jiova, “Mo vakayacani koya o Jesireli, baleta ni na sega ga ni dede ka'u sa na cudruva kina na tui Isireli ena vuku ni veivakamatei sa vakayacora na nona qase o Jeu mai Jesireli. Au na qai vakawabokotaka vakadua na kawa vakatui i Jeu.

⁵ Au na qai vakarusa ena siga o ya na kaukauwa ni nodra i mataivalu na Isireli ena Buca o Jesireli.”

⁶ A sa kunekune tale o Komera ka vakasucuma e dua na luvena yalewa. A sa kaya vua na Kalou, “Mo vakayacani koya me o ‘Sega ni Lomani’, baleta ni'u na sega tale ni lomana na mataqali i Isireli, se me'u vosoti ira.

⁷ Ia ka'u na lomana ga na mataqali i Juta. Au na vakabulai ira, oi au o Jiova, ia ka'u na sega ni vakabulai ira ena dakai, se na i selewau, se na i valu, se na ose, se na mataivalu vodo ose.”

⁸ Ni sa kalia oti na luvena yalewa o Komera, a sa kunekune tale ka vakasucuma e dua na gonetagane.

⁹ A sa kaya vei Osea o Jiova, “Mo vakayacani koya me o ‘Sega ni Noqu Tamata’, baleta ni ra sa sega ni noqu tamata o ira na Isireli, ka'u sa sega ni nodra Kalou.”

Sa Vakalesui ka Vakacokotaki Tale o Isireli

¹⁰ Na kedra i wiliwili na Isireli ena vaka na mataninuku mai waitui, ena sega ni vakarautaki se wiliki rawa. Sa qai kaya vakaoqo vei ira na Kalou, “O ni sa sega ni noqu tamata,” ia sa roro tiko mai na gauna ena tukuna kina o koya vei ira, “O ni sa luve ni Kalou bula!”

¹¹ Era na qai vakaduavatataki tale o ira na Juta kei ira na Isireli. Era na digitaka vakai ira e dua me liutaki ira; era na qai tubu cake ka tiko vinaka tale ena nodra vanua. Io, na siga i Jesireli ena dua dina na siga lagilagi!