Opetaia 1 - Vakavakadewa Vou kei na iVola tale eso

Ena Cudruvi Itomi o Jiova

¹ Oqo na raivotu i Opetaia. Sa kaya vakaoqo o Jiova ni lewevuqa Me baleta na vanua o Itomi: Sa tala oti na nona i talai o Jiova Ki na veivanua kecega; Keimami sa rogoca Ni sa vakaoqo na nona i tukutuku: “Ni vakarau! Me da la'ki vala vata kei Itomi!”

² Sa kaya vakaoqo o Jiova vei Itomi, “Au na cakava mo malumalumu; Era na beci iko na tamata kecega.

³ Sa vakacalai iko na nomu dokadoka. Na nomu koro turaga e koronivalu veivatu; O sa tiko sara mai na veiulunivanua; O sa qai kaya tale e lomamu, ‘O cei e rawa ni talaraki au sobu?’

⁴ E dina ga ni o sa la'ki vakaitikotiko Ena vanua cere me vaka na sova ni ikeli, Ka sa vaka o sa tiko maliwai ira na veikalokalo, Ia ka'u na qai talaraki iko sobu.

⁵ “Ni ra lako mai ena bogi na daubutako, Era na kauta ga na ka era vinakata. Ni ra veti qerepi na tamata, Era na dau vakavoca tu ga eso. Ia o ira na kemu meca Era sa vaqeyavutaki iko vakadua.

⁶ Era sa kunea na nomu i yau, Isoa, Ka ra sa yauta tani kece yani.

⁷ Era sa vakacalai iko na nomu i to; Ka ra sa vakasavi iko tani mai na nomu vanua. O ira o ni a dau veisaututaki tu eliu Era sa rawai iko tale. Na nomu i tokani o ni a daukana vata eliu Era sa cakava tale na kemu i cori; Ka ra sa kaya, ‘Sa evei na kila-ka Sa dau tiko vua?’”

⁸ Sa vosa na Turaga, ka kaya, “Ena siga ni noqu totogitaki Itomi, Au na vakarusai ira kecega na nona tamata vuku; Ka vaqeyavutaka vakadua na vuku Mai na Ulunivanua o Isoa.

⁹ Era na rere na tamata ni valu ni Temani, Ka vakamatei na sotia kece mai Itomi.

Na Vuna e Totogitaki kina o Itomi

¹⁰ Ena vuku ni vakarau kaukauwa Kei na veivakamatei vua na wekamu o Jekope, O na luvuci sara ena madua, Ka muduki laivi ka tawamudu.

¹¹ O a duri vakatikitiki tu ena siga o ya Ni ra sa basu bai na meca. O sa vakataki ira ga na kai tani Era sa kovea na i yau nei Jerusalemi Ka wasewasea ena kedra maliwa.

¹² A sega ni dodonu mo a rekitaka Na nodra vakaleqai na wekamu mai Juta. A sega ni dodonu mo a marautaka Na siga ni nodra a vakarusai. A sega ni dodonu mo a dredrevaki ira Ena gauna ni nodra rarawa.

¹³ A sega ni dodonu mo a curu Ki na nodra koro na noqu tamata Ka rekitaka na nodra vakararawataki Ka kovea na nodra i yau Ena siga ni nodra vakarusai.

¹⁴ A sega ni dodonu mo a la'ki tu e basoga ni sala ka sogota na sala vei ira e ra via dro bula. A sega talega ni dodonu Mo a soli ira oqo vei ira na meca Ena siga ni nodra rarawa.”

Nodra Veilewaitaki na Veivanua

¹⁵ “Oi au na Turaga, ka sa roro mai na gauna Me'u veilewaitaki ira kina na veivanua kecega. Ia o iko, Itomi, na ka sara ga o a cakava Ena caka tale vei iko. Na ka sara ga o a solia ena soli tale vei iko.

¹⁶ O ira na noqu tamata Era sa gunuva oti ena noqu delana tabu. E dua na bilo gaga ni veitotogitaki. Ia o ira na veivanua wavokita era na gunuva Na bilo gaga vakalevu cake ni veitotogitaki; Era na gunuva ka ra yali sara yani.”

Na Nodra Qaqa na Isireli

¹⁷ “Ia eso ga ena Ulu i Saioni era na dro bula, Ka yaco me vanua tabu na ulunivanua o ya. Era na taukena na kawa i Jekope Na vanua e dodonu me nodra.

¹⁸ Na nodrau kawa o Jekope kei Iosefo Era na vaka na bukawaqa; Era na vakarusai ira na kawa i Isoa Me vaka sa vakamai na vu ni sila. Ena sega sara ni vo e dua na kawa i Isoa; Ni sai au o Jiova ka'u sa tukuna oqo.

¹⁹ “Era na taukeni Itomi na lewenivanua Mai na ceva kei Juta; Kei ira mai na mua-i-ra ni veidelana Era na taukena na vanua o Filisitia. O ira na Isireli era na taukena Na vanua o Ifereimi kei Samaria; Ka ra na taukeni Kiliati o ira na Penijamini.

²⁰ O ira na i lawalawa sotia tiko vakabobula Mai na vualiku kei Isireli Era na qai lesu tale mai ka rawai Fonisia Ka yaco sara ki Sarifaci ena vualiku. Ia o ira mai Jerusalemi ka kau vakavesu ki Satisi Era na rawa na veikoro ni ceva kei Juta.

²¹ O ira sa vakabulai era na cabe cake Ki na Ulunivanua o Saioni Me ra valuti Itomi ka lewa. Ena qai Tui ga vakai koya o Jiova.”