Niemaia 9 - Vakavakadewa Vou kei na iVola tale eso

Era Vakatusa na Nodra Cala na Tamata

¹ Ena i ka 24 ni siga ni vula oqo, era a soqoni vata na Isireli me ra lolo, ka ra a vakaisulu taga ka biuta na soso ki na uludra me vakatakila na levu ni nodra rarawa.

² Era a wasei ira tani na Isireli mai vei ira na kai veimatanitu tani, era a tucake tu ka vakatusa na nodra i valavala ca kei na nodra caka cala na nodra qase.

³ Era a tu ga ena vanua era a dui tucake tu kina ka sa wiliki mai na i vola ni Lawa i Jiova na nodra Kalou, a sa tolu na auwa na kena dede. Ia ena tolu tale na auwa ka tarava, era sa ia na vakatutusa i valavala ca kei na masu vei Jiova na nodra Kalou.

⁴ E ratou a tucake tu ena nodra vatavata na Livai o Jesua, o Bani, o Katimieli, o Sipanaia, o Puni, o Siripaia, o Bani kei Kinani ka ra tagi vakadomoilevu vua na nodra Kalou.

⁵ E ratou a qai kaya mai na Livai, o ya o Jesua, o Katimieli, o Bani, o Asapinaia, o Siripaia, o Otaia, o Sipanaia kei Peceaia, ‘Mo ni tucake ka vakavinavinaka vei Jiova na nomuni Kalou,’ ka kaya, ‘Me vakavinavinakataki na yacamuni lagilagi sa uasivi cake na kena rokovi mai na vakavinavinaka kei na vakacaucau kecega, ka tawa mudu.’

Na Masu ni Vakatutusa

⁶ A qai masu o Esera: “Sa i kemuni duadua ga o Jiova; o ni sa bulia na lomalagi kei na veikalokalo ni lomalagi. O ni sa bulia na vuravura, na wasawasa, kei na ka kecega; o ni sa solia na bula ki na veika kecega. Sa cuva sobu ka sokalou vei kemuni na kaukauwa vakalomalagi eso.

⁷ Sa i kemuni ga o Jiova na Kalou ka a digitaki Eparama, ka kauti koya tani mai na vanua o Uri mai Papilonia; ka veisautaka na yacana me o Epara-ama.

⁸ O ni a raica na lomana ni a dina e matamuni, ka cakava e dua na veiyalayalati vata kei koya. O ni a yalataka mo ni solia vua na nodra vanua na kai Kenani, na nodra vanua na Itaiti kei na Amoraiti, na nodra vanua na Perisaiti, na Jepusaiti, kei na Kirikasaiti, me yaco me dua na vanua me ra bula kina na nona kawa. O ni a dinata na nomuni vosa ni yalayala, ni kemuni sa yalododonu.

⁹ “O ni a raica na veika rarawa era a sota kaya mai Ijipita na neimami qase; ka rogoca na nodra tagi ena wasa Damudamu.

¹⁰ O ni a vakaraitaka na i vakatakilakila levu eso e mata i tui Ijipita, e matadra talega na nona dauveiqaravi kei ira na qase ni nona vanua, baleta ni o ni kila vinaka na nodra vakalolomataki ira na nomuni tamata. O ni a qaqa kina ka vakarogoya na yacamuni me yacova na siga oqo.

¹¹ O ni a tawasea rua na wasawasa e matadra na nomuni tamata, ka liutaki ira yani ena dela ni qele mamaca. O ira era cici muri mai sa vakaluvuci ena wasa titobu, me vaka sa lutu dromu na vatu ena wasa voravora.

¹² A liutaki ira na nomuni duru o ena siga, ka vakararamataka na nodra sala na nomuni duru bukawaqa ena bogi.

¹³ O ni a siro sobu mai lomalagi ena Ulunivanua o Saineai; o ni a vosa vei ira na nomuni tamata ka solia vei ira na i vunau vinaka kei na i vakavuvuli dodonu.

¹⁴ O ni a vakavulici ira me ra vakatabuya na nomuni Siga ni Vakacecegu, ka solia vei ira na nomuni i vunau ena liga i Mosese na nomuni tamata.

¹⁵ “Ni ra sa viakana, o ni a solia vei ira na madrai mai lomalagi, kei na wai mai na vatu ni ra sa viagunu. O ni a vakaroti ira me ra taukena ka liutaka na vanua o ni sa yalataka oti mo ni solia vei ira.

¹⁶ Ia sa tubu cake ga na nodra dokadoka kei na qaciqacia na neimami qase ka ra sega ni vakarorogo ki na nomuni i vakaro.

¹⁷ Era a bese ni talairawarawa; era sa guilecava na veika kece sara o ni a vakayacora; era sa guilecava na veika veivakurabuitaki o ni a cakava e matadra. Ena dela ni nodra dokadoka, era sa lesia kina e dua me liutaki ira; ka me kauti ira lesu tale ki na vanua ni veivakabobulataki mai Ijipita. Ia sai kemuni na Kalou sa dauvosota na i valavala ca; o ni sa dauloloma ka dauveikauwaitaki, ka cudrucudru malua. Sa ka levu sara na nomuni loloma; ka o ni a sega ni biuti ira laivi.

¹⁸ Era a cakava e dua na kalou matakau e bulicaki vaka na luve ni bulumakau tagane ka tukuna ni oqo na kalou ka kauti ira tani mai Ijipita! Oqo sa dua dina na veivakacudrui levu vei kemuni!

¹⁹ Ia o ni a sega ni biuti ira laivi tu yani ena vanua lala ka dravuisiga, baleta ni sa rui ka levu sara na nomuni loloma. O ni a sega ni kauta laivi na duru o me liutaki ira ena siga se na duru bukawaqa me vakararamataki ira ena bogi.

²⁰ Ena dela ni nomuni yalovinaka o ni sa vakasalataki ira kina ena veika me ra cakava; o ni a vakani ira ena mana ka vagunuvi ira ena wai.

²¹ Ena loma ni vasagavulu na yabaki mai na vanua lala o ni a vakarautaka na veika kece sara era gadreva; a sa sega ni vuca rawa na nodra i sulu, ka sa sega ni vuvuce na yavadra.

²² “O ni a vakatara me ra valu ka rawai ira na veimatanitu kei ira na kena matatamata, ena veitiki ni vanua e veiyala kina kei na nodra vanua. Era sa rawai ira na lewe ni vanua o Esiponi, ka tui kina o Esiponi, kei na vanua o Pasani, ka tui kina o Oki.

²³ O ni sa vakalevutaka na luvedra me vaka na kalokalo ni lomalagi, me ra valu vakaukauwa ka vakaitikotiko ena kena vanua o ni sa yalataka oti me soli vei ira na nodra qase.

²⁴ Era a qai lako yani na nodra kawa ka taura na vanua me nodra, o ya ni o ni a vakamalumalumutaki ira taumada na i taukei ni vanua - o ya o ira na kai Kenani, o ira o ni a soli ira sara ga ki ligadra, vata kei ira na nodra tui kei ira na lewe ni vanua, ka me ra vakayagataki ira me vaka ga na ka era vinakata.

²⁵ Era a rawa na veikoro lelevu ka vakabai ni valu ena dua na vanua vutuniyau, ka kovea na nodra veivale era sisinai tu ena veika vinaka, na veitobu-vatu ni wai, na veiloga vaini, veiolive kei na veikau vuata e levu sara. Era a qai kana ka mamau, ka ra sa urouro mai, ka marautaka na nomuni yalovinaka.

²⁶ Ia era sa talaidredre ga ka vuki tani mai vei kemuni. Era sa vakanadakuya na nomuni Lawa ka vakamatei ira na nomuni parofita - o ira era a vakasalataki ira me ra lesu yani vei kemuni; ia, era cakava ga na veika ni veivakacudrui lelevu.

²⁷ O koya oqo o ni a qai soli ira kina ki na ligadra na kedra meca me ra vakararawataki kina. Ni ra a rarawa, era a qai tagi vei kemuni, ka o ni a rogoci ira mai lomalagi. Ia me vaka ga na nomuni dauveivosoti levu, o ni a qai solia vei ira eso na i liuliu me vakabulai ira mai vei ira na kedra meca.

²⁸ Ena gauna ni sautu era a qai valavala ca tale e matamuni. Ia o ni a soli ira tale ki na ligadra na kedra meca me ra lewai mai vei ira. Ni ra sa veivutuni ga ka tagi vei kemuni, o ni a qai rogoci ira tale mai lomalagi, ka sa vuqa na nomuni dau vakabulai ira ena vuku ni nomuni dau yalololoma.

²⁹ O ni a qai vakasalataki ira tale me rawa kina ni ra vakalesui ki na nomuni Lawa. Ia era a viavialevu ga ka sega ni talairawarawa ki na nomuni vakaro ka ra i valavala ca tikoga ki na nomuni lawa - o koya ena bula kina na tamata ke muria vakadodonu. Era a vakaduduile tikoga ka vakadomoqataki ira ka sega sara ni bau talairawarawa.

³⁰ O ni a vosoti ira tikoga ka vuqa na yabaki ka vakasalataki ira na Yalomuni ka tiko vei ira na nomuni parofita, ia era a sega ga ni via rogoca. O koya o ni a soli ira tale kina ki na ligadra na lewe ni vanua.

³¹ Ia sa ka levu ga na nomuni veivosoti, ka sega kina ni o ni vakawabokotaki ira, se biuti ira laivi vakadua; ka ni oi kemuni o ni sa Kalou yalololoma ga ka dauveivosoti.

³² ‘O koya oqo, kemuni na neimami Kalou, na Kalou levu, qaqa ka rerevaki, o koya sa vakayacora na nona yalayala kei na nona loloma tudei, me kakua mada ni rairai lailai vei kemuni na veika rarawa sa yacovi keimami oti, kei ira na neimami tui, na neimami turaga, na neimami bete, na neimami parofita, na neimami qase kei ira kecega na nomuni tamata, me tekivu mai na nodra gauna na tui Asiria ka yacova na siga oqo.

³³ O ni sa dodonu ena veika kece sara a yaco oti vei keimami baleta ni o ni a vakayaco ka ena yalodina; ia o keimami ga keimami sai valavala dukadukali.

³⁴ O ira na neimami tui, na neimami turaga, na neimami bete kei ira na neimami qase era a sega sara ni bau muria na nomuni lawa se kauwaitaka na nomuni vakasala kei na nomuni i vakaro o ni a solia vei ira.

³⁵ Ena nodra matanitu sara mada ga kei na nomuni yalo vinaka levu o ni a solia vei ira kei na vanua vakaitamera ka qai bula o ni a vakarautaka me nodra, era a sega sara ga ni qaravi kemuni kina ka sega ni saumaki mai na nodra cakacaka dukadukali.

³⁶ Ni raica mada, keimami a bobula ena gauna oqo; io, ena vanua o ni a solia vei ira na neimami qase me ra vakayagataka na vuana kei na veika ni loloma vinaka kecega a tu kina; ia, ka raica, keimami a bobula tikoga.

³⁷ Na vua ni qele vivinaka kecega a kau yani vei ira na tui, o ira o ni a soli keimami vei ira baleta na neimami i valavala ca. Era a lewa na yago i keimami kei na neimami manumanu ka ra kitaka kina na ka ga era vinakata, ia oi keimami, keimami sa vakaloloma sara vakaca.’

³⁸ Ena vuku ni veika kecega oqo, keimami a cakava kina ka vola sara e dua na yalayala tudei o koya era a sainitaka ka tukidregata o ira na neimami turaga, o ira na neimami Livai kei ira na neimami bete.