Niemaia 8 - Vakavakadewa Vou kei na iVola tale eso

Wilika o Esera na i Vola ni Lawa

¹ Ena i kavitu ni vula, era sa dui la'ki vakaitikotiko mai na nodra veikoro na Isireli. Era a qai soqoni vata taucoko yani ena i matai ni siga ni vula o ya ena rara sa volekata na Matamata ni Wai. Era a qai kerei Esera, o koya na bete ka qasenivuli talega ni Lawa sa solia o Jiova vei ira na Isireli, me kauta mai na i vola ni Lawa.

² A sa qai kauta mai o Esera na i vola ni Lawa vei ira na tamata era sa soqoni vata mai — na tagane, na yalewa, kei ira kece na gone sa yalomatua ena kena kilai na veika sa rogoci.

³ Sa qai vakanamata yani o Esera ki na rara volekata na Matamata ni Wai, ka wilika na Lawa kivei ira sa soqoni vata tu me tekivu mai na mataka lailai ka yacova na siga levu tutu, ka ra sa vakarorogo vakavinaka sara na tamata kecega.

⁴ A sa tucake tu o Esera ena dua na vatavata kau era a cakava me baleta sara ga na soqoni o ya. E ratou a tu voleka ena yasa i Esera i matau o Matitaia, o Sima, o Anaia, o Uraia, o Ilikaia kei Malakaia, o Asumu, o Asipatana, o Sakaraia kei Mesulame.

⁵ Ni sa tucake tu ena vatavata o Esera, a sa cecere cake tu vei ira na tamata ka ra sa vakaraici koya matua sara na tamata. Ena gauna ga sa cega kina o koya na i vola, era sa tucake na tamata kecega.

⁶ A qai vakavinavinaka vei Jiova na Kalou levu o Esera, ka ra sa qai sauma vata kece mai na tamata ka kaya, “Emeni, Emeni,” ka ra sa laveta cake na ligadra. Era sa qai tekiduru ena vakarokoroko ka vakacuva mata ki na qele ena sokalou vei Jiova.

⁷ Era a qai tucake tale na tamata ena veivanua era sa dui tu kina, ka ratou vukei ira yani me ra kila na Lawa o iratou na Livai oqo: o Jesua, o Bani, o Siripaia, o Yamini, o Akupi, o Sepataia, o Otaia, o Maseia, o Kilaita, o Asaraia, o Josapati, o Anani kei Pilaia.

⁸ E ratou a vakadewataka vakavosa na Lawa ni Kalou ka qai vakamacalataka me ra kila kina na kena i balebale.

⁹ Era a qai kaya vei ira kecega na tamata o iratou o Niemaia na kovana, o Esera na bete ka qasenivuli ni lawa, kei iratou na Livai e ratou a vakatavulici ira tiko na tamata, “Sa vakatabui me nei Jiova na nomuni Kalou na siga oqo. Mo ni kakua ni vakaloloku se tagi kina!” Oqo e baleta ni ra a tagi na tamata kecega ni ra a rogoca na veivosa ni Lawa.

¹⁰ A qai kaya vei ira o Niemaia, “Ni dui lesu ki na nomuni veivale ka ia na solevu. Ni wasea na kemuni kakana kei na memuni waini vata kei ira e lailai na kedra kei na medra. Na siga oqo sa tabu vua na noda Turaga, ka mo ni kakua ni rarawa kina. Na marau ena solia vei kemuni o Jiova ena vakaukauwataki kemuni.

¹¹ Era a lako yani na Livai me ra vakayalovinakataki ira na tamata, ka ra kaya vei ira me ra kakua ni rarawataka na siga sa vakatabui oqo.

¹² Era sa qai dui lesu na tamata ki na nodra vale me ra la'ki kana ka gunu ena marau, ka wasea talega vei ira eso tale, baleta ni ra sa kila na veika sa wiliki oqo vei ira.

Na Solevu ni Valetabanikau

¹³ Ena i karua ni siga era a qai lako mai vei Esera na qasenivuli ni lawa o ira kecega na qase ni veivuvale, na bete kei ira na Livai me ra mai vulica na veika a volai tu ena Lawa.

¹⁴ Era sa qai kunea ni a volai tu ena Lawa ni a vakaroti Mosese o Jiova ni dodonu me ra dau tiko ena veivale tabanikau o ira na Isireli ena Solevu ni Valetabanikau ena i kavitu ni vula.

¹⁵ A dodonu vei ira me ra vakarogoya ka kacivaka ena nodra veikoro kecega, ka vakakina e Jerusalemi, vakaoqo, ‘Mo ni lako yani ki na veidelana ka la'ki kauta mai na taba ni olive, na olive era tubu tu ga vakaveitalia, na mateli, na drau ni niusawa kei na tabanikau drau i lelevu tale eso ka mai tara kina na vale tabanikau me vaka sa volai tu ena Lawa.’

¹⁶ Era a qai lako yani ki veikau ka la'ki kauta mai na veika oqo ka dui mai tara sara na nodra vale tabanikau ena dela ni nodra veivale, ena nodra veiloma ni bai, ena lomanibai ni Vale ni Kalou, na loma ni rara levu ena Matamata ni Wai kei na rara ena Matamata i Ifereimi.

¹⁷ Era a dui tara vale tabanikau kece sara ga o ira era a lesu mai na kau vakavesu, ka ra dui tawana. Era a sega tu ni bau cakava na ka oqo me tekivu sara mai na gauna i Josua na luve i Nuni ka yacova na siga o ya. A levu vakaidina sara na nodra mamarau.

¹⁸ Ena veisiga yadua, mai na i matai ni siga ka yacova na i otioti ni siga, a dau wilivola mai na i vola ni Kalou o Esera. E ra a kana magiti ka siga vitu; ena i kawalu ni siga a qai caka e dua na soqoni dokai vakalotu, me vaka na kena lawa.