Niemaia 6 - Vakavakadewa Vou kei na iVola tale eso

Eso Tale na Sasaga ni Vakalatilati i Sanivalati

¹ Ni sa rogoca o Sanivalati, kei Topaia, kei Kesemi na kai Arapea, kei ira kece sara na vo ni keimami meca ni'u sa viria oti na bainikoro, ka sa sega ni vo tale e dua na tikina e kabasu, ka dina ga ni ra se bera tu ni vakaisogo na katuba ni veimatamata ena gauna o ya,

² e rau a qai sureti au mai o Sanivalati kei Kesemi, ka kaya mai vakaoqo, “Mo lako mada mai me datou mai bose vata ena dua vei ira na koro lalai ena buca o Ono.” Oqo e rau a nakicataki au ga mai.

³ Au a qai tala vei rau eso na noqu dauvakauitukutuku me ratou la'ki kaya vakaoqo, “Au cakava tiko oqo e dua na cakacaka levu ka vakatotolotaki, ka'u na sega ni rawa ni lako sobu yani. Na cava na vuna me mudu ka biu tu mai kina na cakacaka ka me'u lako sobu yani kina vei kemudrau?”

⁴ E rau a talatala mai vakava vei au me vakaoqo, ia sa tautauvata tikoga na kena i sau sa tukuni lesu vei rau.

⁵ A sa talatala tale mai vakaoqo o Sanivalati ena kena i kalima ni gauna; sa tala sara ga mai na nona dauveiqaravi, ia na i vola ka kauta voli mai e sa dola rawa tu ga.

⁶ Oqo na ka a volai koto mai ena i vola o ya: “Sa vakarogoi mai na veimatanitu ka sa bau kaya talega o Kesemi, ni o iko vata kei ira na Jiu o ni sa nakita tiko mo ni vuki tani mai na matanitu. Oqo na vu ni nomuni viria tiko na bai; kei iko talega, me vaka na i tukutuku oqo, ni o sa vinakata tiko mo nodra tui.

⁷ O iko talega o sa vakatura eso na parofita me ra kacivaki iko e Jerusalemi, me vakaoqo, ‘Sa tiko e Juta e dua na tui.’ Na i tukutuku ena la'ki rogo sara vua na tui; ka sa dodonu kina mo lako sara ga mai oqo me datou mai bose mada.”

⁸ Au a qai talatala lesu vua, ka vaka, ‘E sega sara ni dua na ka o kaya mai e sa yaco oti e ke, ka ni ka oqori e ka ga o bulia tikoga vakai iko ena nomu vakasama.’

⁹ Era a vakarerei keimami ga ni ra nanuma ni keimami na vakasavuligataka na cakacaka me na kakua kina ni caka vakaoti. Au a qai masu ka vaka, ‘Noqu Kalou, ni vakaukauwataka na ligaqu.’

¹⁰ Ia ni'u a lako ki na vale nei Simaia na luve i Tilaia, na luve i Metapeli, na tamata ka dautiko voli ga e vale, a mani kaya mai vei au o koya, “Me daru la'ki sota ena Tikina Tabu ni Valenisoro ka lokataka na kena katuba kece, baleta ni ra lako tiko mai me mai vakamatei iko. Era na mai vakamatei iko ena dua ga na bogi oqo.”

¹¹ Au a qai kaya vua, “E dodonu li me dro e dua na tamata vakataki au? O sa nanuma beka ni'u na tovolea me'u na vaqara bula ena noqu la'ki vunitaki au ena Valenisoro? Au na segasega sara ni cakava oqori.”

¹² A qai votu mai vei au ni a sega sara ga ni talai Simaia mai na Kalou, ia e rau a saumi koya o Topaia kei Sanivalati me mai vakasalataki au vakaoqo.

¹³ A i naki ni nona saumi me mai vakavuna me'u rere ka caka cala kina, me ratou vakarogocataka kina na yacaqu ka vakamadualaki au.

¹⁴ Au a qai masu, ka kaya, “Kemuni na Kalou, mo ni nanumi rau o Topaia kei Sanivalati ena vuku ni veika oqo e rau sa kitaka; na parofita yalewa o Noataia kei ira na vo ni parofita tale eso ena nodra vinakata me ra vakarerei au.”

Kena vakaoti na Cakacaka ni Tara Bai

¹⁵ Ni oti e 52 na siga ni cakacaka, a sa viri vakaoti na bai ena i ka 25 ni siga ni vula o Eluli.

¹⁶ Ia ni sa rogo yani na ka oqo vei ira na keimami meca, era sa rere kecega na veimatanitu era tu vakavolivoliti keimami. Era a qoroqoro talega ni ra a raica sa caka oti rawa na cakacaka levu oqo ena nona veivuke na neimami Kalou.

¹⁷ Ena gauna talega o ya era a dau volavola vakalevu vei Topaia o ira eso na turaga ni Juta ka vakakina o Topaia vei ira.

¹⁸ Oqo e baleta ni ra lewe vuqa e Juta era vauci tu ena nodra veidinadinati kei Topaia baleta ni vugoi Sekonaia na luve i Ara tagane, o koya. O Joanini talega na luve i Topaia tagane e watina na luve i Mesulame na luve i Berekaia.

¹⁹ Era a dau mai tukuna sara vei au na veika vinaka sa dau cakava o Topaia ka ra dau la'ki tukuna lesu vua na veika au dau kaya. A sa dau vakau i vola tiko mai o Topaia me vakarerei au.