Niemaia 5 - Vakavakadewa Vou kei na iVola tale eso

Vukei Ira na Dravudravua o Niemaia

¹ Ena dua na gauna e muri, a vakatekivu me ra kudru o ira na tamata kei ira na watidra ena vuku ni wekadra na Jiu.

² Eso vei ira era sa kaya, “Keimami sa rui lewe levu, oi keimami vata kei ira na luve i keimami tagane kei na yalewa; ka keimami sa gadreva na sila me keimami kania ka bula tiko.”

³ Eso tale era kaya mai, “Ena vuku ni dausiga, keimami sa la'ki kau kakana mai kina vakadinau ka solia na neimami vanua ni teitei, kei na neimami loganivaini, kei na neimami veivale me i vakadei ni veidinadinati.

⁴ A so talega era kaya mai, “Keimami sa la'ki dinau mai me saumi kina vua na tui na i vakacavacava ni neimami vanua ni teitei kei na loganivaini.

⁵ Keimami sa lewe ni dua ga na kawa tamata kei ira na weka i keimami na Jiu. Ia oqo keimami sa vakasaurarataki ira tiko na luve i keimami tagane kei na yalewa me ra la'ki bobula, ka so vei ira na luve i keimami yalewa era sa volitaki me ra bobula. Keimami sa vakaloloma baleta ni sa kau laivi mai na liga i keimami na neimami vanua ni teitei kei na loganivaini.”

⁶ Ia ni'u sa rogoca na nodra osi kei na vosa kudrukudru, a sa tuburi au na cudru

⁷ ka sa lomaqu me'u cakava kina e dua na ka. Au a qai beitaki ira na veiliutaki kei na i vakalesilesi ka vosataki ira ena noqu a kaya, “O ni sa vakalolomataki ira tikoga na wekamuni dina na Jiu!” Au sa qai kaciva e dua na vakasoqoni vata me wali kina na leqa oqo,

⁸ ka kaya, “Mai na veika eda sa rawata, eda sa voli ira lesu rawa tiko kina na wekada na Jiu era sa volitaki vei ira na tani. Ia oqo, o ni sa vakasaurarataki ira na wekamuni na Jiu me ra volitaki ira vei kemuni, oi kemuni na wekadra!” Era sa galu ga na i liuliu ka sega na ka me ra kaya rawa.

⁹ Au sa qai kaya, “Na ka o ni cakava tiko e sega ni vinaka! E sega beka ni vinaka mo ni lako voli ga ena rerevaka na Kalou, ka me tarovi kina na nodra veibeci na veimatanitu tani era keda meca tu?

¹⁰ O au talega oqo sa dau soli i lavo tiko kei na sila vei ira era kerekere mai vei au, ka vakakina o ira na kai noqu, kei ira na noqu dauveiqaravi, vata kei ira era cakacaka vei au. Ia oqo, me da sa kakua ni kauwaitaka tale na saumi lesu ni dinau.

¹¹ Me bokoci kece na dinau e dodonu me saumi lesu vei kemuni, o ya na dinau i lavo, se na sila, se na waiwai olive. Ka me soli lesu tale vei ira na nodra vanua ni teitei, kei na loganivaini, kei na loga ni veiolive, kei na nodra vale ena gauna sara ga oqo!”

¹² Era a qai kaya mai, “Keimami sa na vakayacora na ka o sa tukuna. Keimami na vakasuka lesu na veika oqo ka sega tale ni kumuna lesu na i sau ni nodra dinau.” Au sa qai kacivi ira mai na bete, ka cakava me ra bubului na i liuliu e matadra me ra vakayacora dina kina na veika era sa yalataka.

¹³ Au a qai ceburaka mai na taga ni noqu i sulu ka kaya vei ira, “Me qai ceburaka laivi mada na Kalou mai na nona vale kei na nona cakacaka o koya yadua sa sega ni vakayacora na yalayala oqo. Me qai ceburaki laivi sara ka me kakua tale ni vo vua e dua na ka.” Era sa qai kaya vata mai o ira era soqoni tiko, “Emeni!” ka vakavinavinaka vei Jiova. Era sa qai vakayacora na tamata na ka era sa yalayala kina.

Na Lomasoli i Niemaia

¹⁴ Mai na gauna talega au a lesi kina me'u nodra kovana na kai Juta, o ya mai na i ka 20 ki na i ka 32 ni yabaki i Atakisekise na tui, e tinikarua taucoko na yabaki, au a sega ni bau kania se me ra kania na wekaqu na i vakarau ni kakana e dodonu me dau vakarautaki vua e dua na kovana me vakataki au.

¹⁵ O ira era a kovana e liu vei au era sa dau vakacolati ira sara vakalevu na tamata, ka kau kakana kei na waini talega mai vei ira, ka lavaka me ra solia e 40 na tiki ni siliva ena veisiga yadua. O ira sara talega na nodra dauveiqaravi era sa dau vakasosataki ira na tamata. Ia o au, au a sega sara ni bau cakava na ka oqo, baleta ni'u sa rerevaka na Kalou.

¹⁶ Au sa solia kece na noqu i gu kei na dina ena cakacaka ni kena viri vou tale na bai, ka'u se sega ni bau taura e dua na ka me'u taukena. O ira kece na noqu tamata cakacaka era sa veivuke kece ena cakacaka ni viri bai.

¹⁷ Era sa lewe 150 na Jiu kei ira na nodra i vakalesilesi era sa dau kana vakawasoma tiko ena noqu teveli, ka sega ni wili kina o ira era lako mai vei au mai na veimatanitu era tiko vakavolivoliti keda.

¹⁸ Ena veisiga yadua, au dau vakarautaka me laukana e dua na bulumakau, e ono na sipi digitaki, kei na vuqa na toa, ka'u vakarautaka talega ena veiyatini na siga na i vakarau ni waini vou. Ia me vaka ni'u sa kila vinaka na bibi ni nodra i colacola na tamata, au sa sega kina ni dau taroga lesu na i lavo vakarautaki vei ira na kovana.

¹⁹ Kemuni na Kalou, sa noqu masu oqo mo ni qai nanuma na veika vinaka ka'u sa vakayacora oti vei ira na tamata oqo.”