Niemaia 4 - Vakavakadewa Vou kei na iVola tale eso

Sasaga ni Vakalatilati i Sanivalati

¹ Ni sa rogoca o Sanivalati ni keimami sa viria vou tale tiko na bai o keimami na Jiu, a sa tubu na nona cudru katakata ka tekivu vakalialiai keimami.

² A qai kaya e matadra na kai nona kei na matadra na mataivalu ni Samaria, “Na cava sara mada era cakava tiko o ira na Jiu gogo oqo? Era sa nakita beka me ra tara cake tale na koro? Era nanuma li ni nodra vakacaboisoro ena vakavuna me ra na vakaotia kina na cakacaka ena duabulu ga na siga? E rawa beka ni ra bulia vou tale na vatu ni tara bai mai na i binibini vatu vakamai sa vorolaki vakamatailalai?

³ A tu volekati koya o Topaia na Amonaiti, ka mani tomani koya yani, ni sa kaya, “A mataqali bai vatu vakacava mada era rawa ni tara cake? E dua mada ga na fokisi e rawa ni na talaraka sobu!”

⁴ Ia au sa masu, ka kaya, “Kemuni na neimami Kalou, ni rogoci keimami mai, ni keimami sa beci ka vakalialiai. Ni vakalesuya vei ira na nodra vosa ca ka me tau ki uludra. Me kau laivi vei ira na veika kece era sa taukena, ka me ra kau yani vakabobula ki na dua na vanua tani.

⁵ Ni kakua sara ni vosota na cala era cakava, ka mo ni daunanuma tu ga e veigauna na nodra i valavala ca, baleta ni ra sa vakacudrui keimami na viria tiko na bai.”

⁶ A sa toso tikoga na cakacaka ni viri bai, ka sa yacova sara yani na veimama ni kena cere, baleta ni ra sa gumatua na tamata me ra ia na cakacaka.

⁷ Ia ni sa rogoca o Sanivalati kei Topaia, kei ira na kai Arapea, Amonaiti, kei Asitoti ni sa daumaka sara tiko na i tosotoso ni kena vakavoutaki na bai kei Jerusalemi, ka sa tekivu me viri vakavinaka na veitikina ka basuki, a sa ka levu sara na nodra cudru.

⁸ Era sa qai bukivere vata me ra valuti Jerusalemi me tubu cake kina na veilecayaki e loma ni koro.

⁹ Ia keimami sa qai masu vua na neimami Kalou ka vakarautaka na neimami yadra me yadravi ira ena siga kei na bogi.

¹⁰ A sa kaya o ira na Juta: “Keimami sa malumalumu mai ena cola i vua bibi; Sa ka levu na benu me vakasavasavataki. Ena rawa vakaevei me da viria na bai edaidai?

¹¹ Era sa kaya talega na keimami meca, “Ni bera ni ra qai kidava se raica, eda sa na tu e yasadra me da vakamatei ira ka muduka na nodra cakacaka.”

¹² Ia era sa qai lako wasoma mai na Jiu era sa tiko veitikivi kei ira na meca, ka mai vakasalataki keimami ena vuku ni nodra tuvatuva-ka na meca ena nodra sasaga me ra valuti keimami.

¹³ Au a qai veibiuyaki ira na tamata ena nodra veimataqali ena veivanua lolovira e yasa ni bai kei na veivanua lala tale eso, ka vakaiyaragitaki ira ena i seleiwau, na moto kei na dakaititi.

¹⁴ Au a raica rawa ni ra sa lomaleqa na tamata, ka'u mani kaya kina vakaoqo vei ira kei na nodra i liuliu vata kei ira na vakailesilesi, “Ni kakua ni rerevaki ira. Mo ni nanumi Jiova ga, ni sa levu ka rerevaki o koya, ia ni vala ena vukudra na wekamuni, na luvemuni, na watimuni, kei na nomuni vuvale.”

¹⁵ Era a qai rogoca na keimami meca ni keimami sa kila na nodra i naki, ka ra kila ni sa vakarusa na nodra i tuvatuva na Kalou. Keimami a qai lesu tale ka tomana na cakacaka ni viri bai.

¹⁶ Me tekivu mai na siga o ya ka lako yani, a sa wase rua na noqu dauveiqaravi ka dua na veimama era sa qarava na cakacaka ni viri bai ka ra sa ia na tauri moto, na i sasabai, na dakaititi kei na kote ni sasabai kaukamea na i karua ni veimama. Era sa duri mai dakudra o ira na neimami i liuliu ena veitokoni vei ira kecega na Juta,

¹⁷ o ira era sa viria tiko na bainikoro. O ira na tamata daucolacola era sa vakacolati ena dua na kena i walewale me rawa kina ni dua na ligadra e vakayagataki ena cakacaka, ka taura na ligadra kadua na i yaragi.

¹⁸ O ira yadua era viri bai era sa dui vakabeletitaka voli ga na nodra i seleiwau e yasadra ni ra viri bai tiko. Ia o koya na dau uvu davui a sa lako vata voli ga kei au.

¹⁹ Au a qai kaya vei ira na turaga, o ira na vakailesilesi kei ira na kena vo, “Sa vakaitamera na cakacaka oqo ka rui dui tutu; oi keda talega eda sa tatawasewase ena bai ka da sa rui veiyawaki.

²⁰ Ia mai na vanua ga e rogo mai kina na domo ni davui, mo ni vakatotolo sara yani kina. Ena vala ena vukuda na noda Kalou.”

²¹ Keimami a qai bunoca na cakacaka, ka veimama vei ira era sa tauri moto tu ga mai na kida ni mataka ka yacova na cila ni kalokalo.

²² Au a kaya talega vei ira na tamata ena gauna o ya, “Na tamata yadua kei na nona dauveiqaravi me rau dautiko ga e Jerusalemi ena bogi ka me rawa kina ni ra dau yadravi keda ena bogi ka rawa talega ni ra cakacaka ena siga.”

²³ Au a sega ni bau luvata na noqu i sulu, e segai mada ga ena bogi, ka sega talega ni kitaka vakakina e dua vei ira na kai noqu, se o ira era dauqaravi au, se o koya na noqu yadra. Ia keimami sa dui taura voli ga na neimami yaragi.