Niemaia 2 - Vakavakadewa Vou kei na iVola tale eso

Sa Lako ki Jerusalemi o Niemaia

¹ Ena dua na siga ni sa oti e va na vula, au a kauta vei Atakisekise na tui na mena waini ena gauna e kana tiko kina. A se sega mada ni bau dua na gauna me raica kina e mataqu na mata rarawa,

² ka mani tarogi au kina vakaoqo: “A cava o sa rui mata rarawa kina? O iko o sega ni tauvi mate, ka dusia oqori ni o sega ni marau tiko.” Au a kurabuitaka na ka oqo

³ ka'u mani kaya kina vua na tui, “Mo ni bula tawa yalani na tui! Me'u qai sega li ni mata rarawa vakaevei ni sa vakarusai tu na koro era sa bulu tu kina na noqu qase ka sa vakacacani ena kama na kedra matamata ni koro?”

⁴ Sa qai taroga na tui, “Ia na cava o sa vinakata?” Au a masuta na Kalou ni lomalagi,

⁵ ka'u sa qai kaya vua na tui, “Kevaka o ni yalololoma vei au na tui ka lomasoli me baleta na noqu kerekere, ia mo ni vagalalataki au mada me'u lako ki Juta, ki na koro era sa bulu tu kina na noqu qase me rawa ni'u tara vou tale na koro oqo.”

⁶ A sa vakadonuya na noqu kerekere na tui, ka dabe toka e yasana na nona ranadi. Sa qai taroga na balavu ni gauna me'u na lako kina kei na gauna me'u lesu tale mai kina, ka'u sa tukuna vua.

⁷ Au sa qai kerea vua na tui me yalovinaka ka solia vei au na i vola eso ni veivakadonui vei ira na kovana ni Ra ni Uferetisi me baleta na noqu i lakolako ki Juta.

⁸ Au a kerea talega e dua na i vola vei Esava, na i vakatawa ni nona veikau na tui, ka vakasalataki koya me solia vei au na kau me la'ki tara kina na matamata ni koro vakaivalu ka dau yadrava na Valenisoro, me tara kina na bainikoro, ka me tara talega kina na vale me'u qai la'ki tawana. A sa vakadonuya na tui na veika kecega au sa kerea, baleta ni sa tiko vata kei au na Kalou.

⁹ Au a yaco sara vei ira na kovana ni veivanua ena yasana ki na Ra ni Uferetisi ka solia vei ira na i vola ni tui. A tala talega mai na tui eso na turaganivalu kei na dua na i lawalawa mataivalu vodo ose me ra tomani au.

¹⁰ Ia o Sanivalati, mai na koro o Peci Oroni, vata kei Topaia, e dua na i vakalesilesi ni yasana o Amoni, a rau sa rogoca ni sa yaco yani e dua na tamata me la'ki sasagataka na nodra tiko vinaka na Isireli, ka rau sa yalo ca kina vakalevu.

¹¹ Au a lako ki Jerusalemi ka la'ki siga tolu tiko kina.

¹² Ia ka'u a qai lako yani ena bogi vata kei na lewe vica tale; ia, au a sega sara ni bau tukuna vua e dua tale na tamata na ka sa vakavotuya e lomaqu na Kalou me'u cakava ena vuku i Jerusalemi. Na manumanu duadua ga ka'u a kauta sai koya na kena au a vodoka voli.

¹³ Ena noqu biuta na koro ena loma ni bogi, au a curuma yani na Buca o Matamata mai na ra, ka qai gole vaka ki na ceva me sivita yani na Mataniwai ni Drakoni, ka qai lako sara yani ki na Matamata ni Benu. Ni'u sa lako voli, au a vakadikeva vakavinaka na bai kei Jerusalemi sa kabasu tu, kei na veimatamata ni koro era sa kama yavu.

¹⁴ Mai na yasana ki na tokalau ni koro, au a qai muria cake na vualiku ki na Matamata ni Waivure kei na i Silisili ni Tui. Ni sa sega na vanua e galala me rawa ni lakova yani na manumanu ka'u a vodoka tiko,

¹⁵ au a mani lako muria sobu kina na buca ni Kitironi, ka vakadikeva na bai. Au a qai muria lesu na vanua vata ga ka'u muria mai ke lesu ki na koro na sala vaka ki na Matamata ni Buca.

¹⁶ Era sa sega sara ni kila o ira na vakailesilesi na vanua ka'u a tiko mai kina se na veika ka'u a cakava voli. Au a sa bera talega ni tukuna e dua na ka vei ira na Jiu, o ya o ira na bete, kei ira na veiliutaki, kei ira na vakailesilesi, kei ira na kena vo era na vakaitavi ena cakacaka.

¹⁷ Ia ka'u sa qai kaya vei ira, “Mo ni raica na leqa eda sa tu kina oqo, ni sa rusa vakaca tu o Jerusalemi ka ra sa vakacacani na kena veimatamata! Me da ia ka viria vou tale na bai kei Jerusalemi, me da kakua ni madua kina.”

¹⁸ Au sa qai tukuna vei ira na veivuke ni Kalou vei au kei na nona sa tiko vata kei au, ka vakakina na veika sa tukuna vei au na tui. Era sa qai kaya mai, “Me da sa ia ka qarava na cakacaka oqo!” Era sa qai vakarautaki ira me tekivutaki na cakacaka.

¹⁹ Ia ni sa rogoca na i tuvatuva ni qaravi cakacaka oqo o iratou o Sanivalati, kei Topaia, kei na dua na kai Arapea o Kesemi, e ratou sa dredrevaki keimami ka kaya vakaoqo, “A cava o ni sa nanuma ni o ni sa cakava oqo? O ni sa via saqati koya beka na tui?”

²⁰ Au sa qai sauma vei iratou ka kaya, “Na Kalou ni lomalagi ena vukea na kena rawati na cakacaka oqo. Sa i keimami na nona tamata, ka keimami na ia ka tekivuna na cakacaka. Ia sa sega ni tu vei kemudou e dua na dodonu, se dua na nomudou i votavota e Jerusalemi.”