Niemaia 13 - Vakavakadewa Vou kei na iVola tale eso

Lawa ni Tiko Vakatamata

¹ Ena siga o ya, era sa vakarorogo kece na tamata ni sa wiliki na i vola i Mosese. A kunei ni volai tu kina ni sa tabu vakadua ni dua na kawa i Amoni se kawa i Moapi me curu ki na i soqosoqo ni Kalou.

² Oqo e baleta na nodra a sega ni tavaki ira na Isireli ena madrai kei na wai ena nodra a lako tani mai Ijipita, ka ra a qai saumi Balami tale me vorati ira ka tauca vei ira na vosa-ni-cudru — ia na noda Kalou ga sa qai vukica na vosa-ni-cudru oqori me ka ni veivakalougatataki.”

³ Ni ra rogoca na Isireli na kena wiliki na i vunau, era sa qai biuti ira vakatikitiki na kai tani kecega mai na nodra i tikotiko.

Na Cakacaka ni Veisau i Niemaia

⁴ Ni bera tiko ni wiliki na i vola i Mosese, e rau a veikilai vakavinaka tiko o Elaiasipi na bete, o koya a lesi me i liuliu ena nodra i tikotiko na bete ena Valenisoro, vata kei Topaia.

⁵ A vakarautaka o koya me i tikotiko i Topaia e dua na rumu levu ka dau maroroi tu kina e liu na i madrali kakana dina, na veika boi vinaka ni vakacaboisoro, na i yaya kecega ni vakacaboisoro, na i katini ni vua ni i teitei kakana dina, na waini kei na waiwai sa soli me nodra na Livai, o ira na daunisere, ira na i dauyadrava na valenisoro, vata kei na i solisoli me nodra na bete.

⁶ Au a yali tu mai Jerusalemi ni yaco na veisolisoli oqo, ka ni'u a lako tu vei Atakisekise na tui Papiloni ena i ka tolusagavulu karua ni nona yabaki vakatui, me'u la'ki soli tukutuku vua. Ia ni sa oti e dua na gauna, au a ciqoma na nona veivakadonui

⁷ ka'u lesu tale mai ki Jerusalemi. Au a qai kurabui ni'u sa mai kunea na i valavala ca levu sa cakava o Elaiasipi na bete ena nona vakatara vei Topaia me vakayagataka na rumu ena lomanibai ni Valenisoro.

⁸ Au a cudru sara vakalevu ka'u qai viriviritaka laivi kece ki tautuba na i yaya ni vale nei Topaia.

⁹ Au a qai vakarota me vakasavasavataki na rumu o ya ka'u a qai biuta lesu tale kina na i yaya kece sara ni Valenisoro, na i madrali laukana, kei na drega me vakamai na ferekiniseni.

¹⁰ Au a mai rogoca talega ni a sega tu ni dau soli vei ira na Livai na kedra i votavota ni kakana ka vakavuna me ra dui dro ki na nodra dui vanua ni teitei o ira era dau cakava na cakacaka ni Valenisoro - o ya o ira na Livai kei ira na dausere.

¹¹ Au a qai vunauci ira na vakailesilesi ka kaya, “Na cava sara mada a weletaki kina na cakacaka ni Valenisoro?” Au a qai vakalesui ira mai na Livai ka mai vakatikori ira tale ena nodra i tikotiko ni cakacaka.

¹² Era a qai tekivu kauta tale na lewe i Juta taucoko na i katini ni kakana, waini, kei na waiwai ki na valeniyau ni valenisoro.

¹³ Au a qai lesi iratou o Silimaia na bete, o Setoki na qasenivuli ni lawa kei Pitaia na Livai me ratou dauniyau ena valeniyau eso ka me nodratou i vukevuke o Anani na luve i Sakuri, na luve i Matanaia baleta ni ratou a bau wili tiko me ratou tamata dina. A nodratou i tavi me ratou veivotayaka na i yau kei na kakana vei ira na wekadratou.

¹⁴ Au a qai masu, ka vaka, “Kemuni na noqu Kalou, ni bau nanumi au ena ka oqo, ka kakua ni bokoca na noqu i valavala vinaka au a cakava me baleta na nomuni vale kei na nomuni qaravi na noqu Kalou.”

Veisau Vou me Baleta na Siga ni Vakacecegu

¹⁵ Ena gauna o ya au a raica mai Juta ni so na tamata era a loba waini ena Siga ni Vakacecegu ka ra vakavodoka mai na sila kei na witi vei ira na asa. Era kauta talega mai na waini, na qerepi, na lolo kei na veiusana kecega ki na loma i Jerusalemi ena Siga ni Vakacecegu; ka'u a qai vunauci ira ena Siga ni Vakacecegu era a mai volitaki kakana kina.

¹⁶ O ira talega na kai Taia era vakaitikotiko e Jerusalemi e ra a kau ika mai kei na veiyaya kecega me ra mai volitaka vei ira na kai Juta ka vakakina e Jerusalemi ena Siga ni Vakacecegu.

¹⁷ Au a qai tinimaka vei ira na turaga ni Juta ka kaya, “E sega li ni ka ca na ka o ni cakava tiko oqo ena Siga ni Vakacecegu, ni o ni sa vakacacana tiko?

¹⁸ Era a sega beka ni cakacaka vakaoqo o ira na nomuni qase, ka sega beka ni solia kina vei keda kei Jerusalemi na ka ca oqo na noda Kalou? Ia oqo, o ni sa qai vakuria ga na cudruvi nei Isireli ena nomuni vakacacana na Siga ni Vakacecegu.”

¹⁹ Au a qai vakarota me ra dau sogosogo na katuba ni veimatamata kei Jerusalemi ni sa roro mai na buto ena veimatamata ni koro ena veiyakavi ni Siga ni Vakacecegu ka me ra kakua sara ni dola me yacova ni sa oti na Siga ni Vakacecegu. Au a mani veibiuyaki ira sara ga na noqu dauveiqaravi me ra yadrava na veimatamata, ka me kakua sara ni dua na i usana me curutaki mai ki loma ena Siga ni Vakacecegu.

²⁰ Era a mani mai moce vakadua se vakarua ga ena taudaku ni bai na vakabisinisi kei ira na dauvolitaka na veimataqali i yaya kecega.

²¹ Au a qai vunauci ira ka kaya, “A cava na vu ni nomuni dau mai moce ena yasa ni bainikoro? Kevaka o ni cakava tale au na vesuki kemuni.” Mai na gauna o ya kei na veigauna e muri era a sega sara tale ni qai lako mai ena Siga ni Vakacecegu.

²² Au a qai vakaroti ira na Livai me ra vakasavasavataki ira ka me ra mai yadrava na veimatamata me karoni kina na tabu ni Siga ni Vakacecegu. Au a qai masu vakaoqo: Kemuni na noqu Kalou, mo ni nanuma talega me'u bau vinaka ena ka oqo, ka vosoti au ni sa ka levu na nomuni loloma tudei.

Muduki na Vakawati kei Ira na Kai Matanitu Tani

²³ Ena gauna talega o ya, au a raica kina ni vuqa vei ira na Jiu era sa vakawati tu kei ira na nodra yalewa na Asitoti, kei ira na Amoni, kei ira na Moapi.

²⁴ E rauta ni veimama na i wiliwili ni luvedra era sa vosataka na vosa vaka-Asitoti se nodra i vosavosa na vanua tale eso, ia era sa sega ni vosataka rawa na noda vosa.

²⁵ Au a qai veileti kei ira ka vakanakuitataka eso vei ira ka drutilaka na drau ni uludra. Au a qai vakasaurarataki ira me ra yalayala ena yaca ni Kalou, ka vaka, “Mo ni qai kakua sara ni vakawatitaki ira na luvemuni se o kemuni sara ga kei ira na luvedra.

²⁶ A sega beka ni valavala ca o Solomoni na tui kei Isireli baleti ira na yalewa vakaoqo? Oqo e dua na tamata sa uasivi cake sara mai vei ira na tui ni veimatanitu e vuqa. A sa lomani koya na Kalou ka buli koya me nodra tui na lewe i Isireli taucoko, ia sa bale sobu ga ena vuku ni valavala ca oqo.

²⁷ Sa dodonu beka kina me keimami vakadadamuri kemuni ka talaidredre vua na Kalou ni keimami sa vakawatitaki ira na yalewa tani?”

²⁸ Sa dua vei ira na luvei Jioiata tagane, ka makubui Elaiasipi na Bete Levu, a sa vakawatitaka na luve i Sanivalati yalewa, mai na koro o Peci Oroni. Au a qai vakasavi Jioiata tani mai Jerusalemi.

²⁹ Mo ni nanumi ira, kemuni na noqu Kalou, ni ra sa vakadukadukalitaka na i tutu vakabete kei na nomuni veiyalayalati kei ira na bete kei ira na Livai.

³⁰ Na veivakasavi oqo au sa vakasavasavataki ira kina mai na veika kecega e nodra na tani, ka'u a qai vakotora na nodra i tavi kecega na bete kei ira na Livai, o ira yadua ki na nodra dui cakacaka.

³¹ Au a veivosakitaka talega na kena kau mai ena kena gauna dodonu na buka ni vakacaboisoro, ka me ra kauta mai na tamata na i sevu ni nodra sila kei na vuata dreu ena kena veigauna lokuci. Mo ni qai nanuma na veika kece oqo, noqu Kalou, ka vakananumi au kina.