Niemaia 11 - Vakavakadewa Vou kei na iVola tale eso

O Ira ka Vakaitikotiko mai Jerusalemi

¹ Era sa la'ki vakoro tiko mai Jerusalemi o ira na nodra i liuliu na Isireli, ka ra sa vakawiri madigi na vo ni lewenivanua me digitaki kina e dua na vuvale mai na veiyatini na vuvale me la'ki tiko ena koro tabu o Jerusalemi, ia o ira na kena vo me ra tiko ga ena veikoro lelevu kei na veikoro lalai tale eso.

² O ira na lewenivanua era sa vakacaucautaki ira na tamata era bolea me ra sa toki ki Jerusalemi ka tiko kina.

³ Mai na veikoro lelevu kei na veikoro lalai tale eso, era sa tiko ga ena nodra veitikotiko e loma ni nodra veikoro vakaoqo o ira na Isireli, o ira na bete, o ira na Livai, o ira na dauveiqaravi ena vale tabu, kei ira na kawa ni tamata cakacaka i Solomoni. Oqo o ira mai na yasana o Juta ka ra vakaitikotiko e Jerusalemi:

⁴ Mai vei ira na yavusa o Juta: o Ataia na luve i Usaia ka makubui Sakaraia. O ira tale na vo ni nona qase o Amaraia, o Sefataia, kei Mealaleli, ka ra kawa i Peresi na luve i Juta tagane.

⁵ O Maseia, na luve i Baruki ka makubui Kolosea. O ira tale na nona qase o Asaraia, o Ataia, o Joaripi, kei Sakaraia, ka ra kawa i Sela na luve i Juta tagane.

⁶ Mai vei ira na kawa i Peresi, era sa lewe 468 taucoko na tagane qaqa era a vakaitikotiko e Jerusalemi.

⁷ Mai vei ira na yavusa o Penijamini: o Salu na luve i Mesulame ka makubui Joeti. O ira tale na vo ni nona qase o Petaia, o Kolaia, o Maaseia, o Eceli, kei Jesaia.

⁸ O Kapai kei Salai e rau veiwekani voleka sara kei Salu. Era sa lewe 928 taucoko na kawa i Penijamini era a vakaitikotiko e Jerusalemi.

⁹ A nodra i liuliu o Joeli na luve i Sikiri tagane, ka nona i vukevuke o Juta na luve i Asenua tagane.

¹⁰ Mai vei ira na bete: o Jitaia na luve i Joaripi tagane, kei Jakini.

¹¹ O Siraia, na luve i Ilikaia tagane ka makubui Mesulame. O ira na vo ni nona qase o Setoki, o Meraioci, kei Aitupi na Bete Levu.

¹² Era lewe 822 taucoko sara na i wiliwili ni yavusa oqo ka ra veiqaravi ena Valenisoro. O Ataia, na luve i Jiroame ka makubui Pilalaia. O ira na vo ni nona qase o Emasi, o Sakaraia, o Pasuri, kei Malikaia.

¹³ Era lewe 242 taucoko sara na i wiliwili ni yavusa oqo ka ra i liuliu ni nodra veivuvale. O Amasai, na luve i Esareli tagane ka makubui Asai. O ira na vo ni nona qase o Mesilemoce kei Ima.

¹⁴ Era lewe 128 taucoko na i wiliwili ni yavusa oqo ka ra sotia qaqa. A nodra i liuliu o Sapetieli na luve i Ekidolimi tagane.

¹⁵ Mai na yavusa i Livai: O Simaia, na luve i Asupi tagane ka makubui Asirikama. O ira na vo ni nona qase o Asapaia kei Puni.

¹⁶ O Sapetai kei Josapati, e rua na turaga dokai vei ira na Livai ka rau liutaka na cakacaka e tautuba ni Valenisoro.

¹⁷ O Matanaia, na luve i Maika tagane ka makubui Sapati, ka nona qase o Esava. A sa liutaka o koya na matasere ni Valenisoro ena kena lagati na masu ni vakavinavinaka. O Pakipukia, o koya ka i vukevuke i Matanaia. O Apita, na luve i Samua tagane ka makubui Kalali, ka nona qase o Jetucuni.

¹⁸ Era sa lewe 284 taucoko na kawa i Livai era vakoro ena koro tabu o Jerusalemi.

¹⁹ Mai vei ira na dauyadrava na Valenisoro: O Akupi, o Talimoni, kei ira na wekadrau era lewe 172 taucoko.

²⁰ O ira na vo ni Isireli, o ira na bete kei ira na Livai era a dui tiko ga ena veikoro e Juta ena nodra dui vanua a votai vei ira.

²¹ Ia o ira na dauveiqaravi e Valenisoro era a la'ki tiko mai na dela i Ofeli ka rau nodra i liuliu o Saia kei Kisipa.

²² E nodra i liuliu ni cakacaka e Jerusalemi na kawa i Livai o Usai, na luve i Bani, na luve i Asapaia, na luve i Matanaia, na luve i Maika mai na kawa i Esava, na kawa ka dau nodra i tavi na laga sere ena Valenisoro.

²³ Sa koto oti e dua na i vakaro vakatui ka vakaroti kina me dau liutaka na laga sere e Valenisoro e dua na vuvale ena veisiga yadua.

²⁴ Na veika kece e baleti ira na Isireli sa la'ki kena mata tiko mai vale ni Tui Perisia o Peceaia na luve i Mesesapeli mai na vuvale i Sira na luve i Juta.

Na Veikoro ena Taudaku i Jerusalemi

²⁵ Era a qai tiko na kai Juta ena nodra veikoro kei na nodra veivanua ni teitei. Era a vakatawana na veikoro lelevu vakataki Kiriaci Aripa, o Taiponi kei Jikapeseli kei na kedratou veikoro lalai;

²⁶ o Jesua, o Molata kei Pecipeleti,

²⁷ o Asarisuali, o Perisepa kei na kena veikoro lalai;

²⁸ o Sikilaki, o Mikona kei na kena veikoro lalai;

²⁹ o Enirimoni, o Sora, o Jarimuci,

³⁰ o Sanoa, o Atulama kei na kedratou veikoro lalai; o Lakisi kei na kena veivanua ni teitei; o Aseka kei na kena veikoro lalai. Na vanua era a tawana na kawa i Juta a tekivu mai Perisepa ena ceva ka kauta ki na buca o Inomi mai na vualiku.

³¹ Ia o ira na kawa i Penijamini era a tawana na veikoro tekivu e Kipa ka lako yani: o Mikimasi, o Aija, o Peceli kei na kena veikoro lalai;

³² o Anacoci, o Nopi, o Ananaia,

³³ o Asori, o Rama, o Kitaimi;

³⁴ o Atiti, o Sipoimi, o Nipalati;

³⁵ o Lota kei Ono, na nodra buca na matai liga maqosa.

³⁶ Ia vei ira na Livai, sa so na nodra i votavota e Juta mai Penijamini talega.