Neumi 2 - Vakavakadewa Vou kei na iVola tale eso

Totogitaki o Ninive

¹ I Ninive, sa mai ravuti iko na dauveivakarusai. Vakatawa na bainikoro! Yadrava na kena gaunisala! Vakarautaki iko mo vala!

² (Ni sa vakarau vakasuka tale o Jiova na nodra lagilagi na Isireli, me vaka na lagilagi a tiko vei ira eliu ni se bera ni ra vakacacani mai vei ira na kedra meca.)

³ Era sa vakaisasabai damudamu na meca Ka vakaisulu damudamu talega. Era sa vakarau tu me ra kaba mai vakaivalu! Sa waqa vaka na yameyame ni bukawaqa na nodra qiqinivalu! Sa tatarovi dredre na nodra ose!

⁴ Era sa veiciciyaki na qiqinivalu ena veigaunisala, Era cici vaka ka vaka ena loma ni koro; Era sa waqa me vaka na cina, Ka ra veisiriyaki me vaka na tibi ni liva.

⁵ Era sa kacivi na vakailesilesi; Era tataraberabe ni ra sa toso i liu. O ira na meca sa ciciva na bainikoro, Ka vakaduria na tavata ni veitaqomaki.

⁶ Era sa qai tatadoladola na i soqo ni uciwai; Era sa domobula na lewe ni valenitui.

⁷ Sa kau vakavesu na ranadi; Era sa tagi vaka na ruve na nona tamata Ka tavitavia na lomaseredra ena rarawa.

⁸ Me vaka na drodro ni wai ni tani cicila Era sa veidroyaki vakaoqori mai Ninive! “Wawa! Wawa!” ni sa voqa na domo ni kaci — Ia sa sega sara ni dua me lesu tale.

⁹ Me da mai kau noda siliva! Me da mai kau noda koula! Sa sinai tu na koro oqo ena yau talei!

¹⁰ Sa rusa, sa laladidi, sa vakaloloma o Ninive! Sa waicala na yalo ena rere vakaitamera; Sa sautaninini na durudra, Sa takali na nodra kaukauwa; Sa vulaci na matadra kecega.

¹¹ Sa evei ena gauna oqo na koro Ka sa vaka tu eliu na qara ni laione, Na vanua ni vakana luve ni laione eliu, Ni ra sa dau lako wasoma kina na laione Ka taqomaki vinaka kina na luvedra?

¹² Sa vakamatea na kena kakana na laione Ka basuraka me kana o watina kei luvena; Sa vakasinaita na nona qara Ena lewe ni manumanu sa basubasuraki.

¹³ Sa qai kaya na Kalou o Jiova, “Oi au na kemu meca! Au na vakama vakadua na nomu qiqinivalu. Era na vakamatei na nomu sotia ena i valu, ka'u na kauta tani mai vei iko na veika kece o taura mai vei ira na tani. Ena sega tale vakadua ni qai rogoci na domodra na nomu i talaki.”