NA SAME 98 - Vakavakadewa Vou kei na iVola tale eso

¹ Dou seretaka e dua na sere vou vei Jiova; Sa cakava o koya na veika veivakurabuitaki! Na ligana i matau kei na ligana tabu Sa rawata kina na qaqa.

² Sa kacivaka o Jiova na nona qaqa; Ka sa vakaraitaka na nona kaukauwa ni veivakabulai ena matadra na veimatanitu.

³ Sa vakayacora na nona vosa ni yalayala vei ira na Isireli Kei na nona loloma tudei kei na yalodina vei ira. Era sa raica na tamata kecega ni sa qaqa na noda Kalou.

⁴ Dou sere ena marau vei Jiova na vuravura kecega; Dou vakacaucautaki koya ena sere kei na kaila ni marau.

⁵ Dou sere ni vakacaucautaki Jiova! Dou qiria na i vakatagi ena api,

⁶ Dou uvuca na davui kei na biukila, Ka kaila ena marau vei Jiova, na noda tui.

⁷ Me vadugu mai na wasawasa, kei na ka kece sa tu kina; Me sere na vuravura kei ira kecega era sa tiko kina!

⁸ Dou vakasausau na veiuciwai; Dou sere ena reki vei Jiova, oi kemudou na veidelana,

⁹ Baleta ni sa lako mai o koya me lewai vuravura. Ena liutaki ira na tamata kecega e vuravura Ena yalododonu kei na lewa savasava.