NA SAME 96 - Vakavakadewa Vou kei na iVola tale eso

Sa Tui Qaqa na Kalou

¹ Ni seretaka e dua na sere vou vei Jiova! Ni sere vei Jiova na vuravura taucoko!

² Ni sere vei Jiova ka vakacaucautaki koya! Ni tukuna tikoga ena veisiga kece na i tukutuku vinaka ni sa vakabulai keda o koya!

³ Ni tukuna yani na nona lagilagi ki na veimatanitu, Kei na nona cakacaka veivakurabuitaki vei ira na tamata kecega.

⁴ Sa cecere o Jiova ka sa dodonu me vakacaucautaki vakalevu; Sa dodonu me rerevaki vakalevu mai vei ira na kalou kecega.

⁵ Na nodra kalou na veimatanitu tani kece era sa matakau ga, Ia, o Jiova ga sa bulia na lomalagi.

⁶ Sa wavoliti koya na lagilagi kei na i ukuuku; Sa cecere ka rairai vinaka na nona vale tabu.

⁷ Ni vakacaucautaki Jiova na tamata e vuravura kecega! Ni vakacaucautaka na nona lagilagi kei na nona qaqa!

⁸ Ni vakacaucautaka na yacana dokai; Ni kauta mai na i soro ka lako mai ki na nona vale tabu.

⁹ Ni cuva sobu ena mata i Jiova ni sa rairai mai; Ni sautaninini e matana na vuravura kecega!

¹⁰ Ni tukuna yani ki na veimatanitu kecega, “O Jiova na tui! Sa vakataudeitaki o vuravura ka sa sega ni yavalati rawa; Ena lewai ira na tamata o koya ena lewa dodonu.”

¹¹ Me reki o vuravura kei lomalagi! Me vadugu mai na wasawasa kei na ka kecega sa tu kina;

¹² Me marau na veibuca kei na ka kecega sa tu kina. Era na qai kaila ena reki na kau kecega mai veikau

¹³ Ni sa lako mai o Jiova me vakatulewa e vuravura. Ena lewai ira na tamata kecega e vuravura Ena lewa dodonu ka vinaka.