NA SAME 95 - Vakavakadewa Vou kei na iVola tale eso

A Sere ni Vakacaucau

¹ Ni toro mai, me da vakacaucautaki Jiova! Me da laga sere ena marau vua na uluvatu ni noda bula.

² Me da tiko e matana ena vakavinavinaka, Ka vakamolimoli ena sere ni reki kei na same.

³ Ni sa Kalou qaqa ga o Jiova, Ka sa Tui kaukauwa vei ira na veikalou kece sara.

⁴ Sa lewa na vuravura taucoko, Me tekivu mai na veiqara vatu titobu ka yaco ki na veidelana cecere.

⁵ Sa lewa na wasawasa sa bulia, Kei na vanua mamaca talega sa cakava.

⁶ Ni toro mai, ka me da mai sokalou ka cuva sobu vua, Me da tekiduru ena mata i Jiova, na dauveibuli!

⁷ Sa noda Kalou ga o koya; Oi keda na tamata ni nona vanua, Kei na sipi sa tubera o koya e ligana. Ni rogoca mada edaidai na ka e tukuna:

⁸ Ni kakua ni vakaukauwataka na yalomuni, me vakataki ira na nomuni qase mai Meripa, Me vaka na siga o ya mai Masa ena vanua lala.

⁹ Era a vakatovolei au ka temaki au, Dina ga ni ra a raica na ka au a cakava e vukudra.

¹⁰ E vasagavulu na yabaki au a rarawataki ira voli kina Na tamata oqo; ka kaya, “Sa so na tamata sega ni yalodina! Era sa bese ga ni muria na noqu i vakaro.

¹¹ Au a qai cudru ka yalataka vei ira vakaoqo: O ni na sega ni yaco ki na vanua me'u na solia kina vei kemuni na vakacegu.”