NA SAME 92 - Vakavakadewa Vou kei na iVola tale eso

¹ Sa ka talei dina me da ia na vakavinavinaka vei kemuni Jiova, Ka vakamolimoli ki na yacamuni, oi kemuni sa Cecere Sara;

² Me tusanaki na nomuni loloma tudei ena veimataka, Kei na nomuni yalodina ena veibogi,

³ Me vakarogoi ena domo ni vakatagi ni yaya ni qiriqiri vakawa, Kei na rogo kamica ni api.

⁴ Na nomuni cakacaka cecere, i Jiova, sa vakamarautaki au; Au sa laga sere ena marau ena vuku ni ka o ni sa cakava.

⁵ I Jiova, sa ka levu sara na nomuni cakacaka! Sa rui titobu na nanuma ni lomamuni!

⁶ Oqo na ka sa sega ni kila rawa na tamata lialia; Sa sega ga ni vakasamataka rawa na tamata yalowai;

⁷ Era na tubu na tamata ca me vaka na co, Ka toso cake na nodra rawa-ka na tamata i valavala ca; Ia era na qai vakarusai kece vakadua,

⁸ Baleta ni o ni sa qaqa tikoga Jiova ena veigauna taucoko.

⁹ Keimami sa kila ni ra na mate na nomuni meca, Ka ra na vakadrukai kece na tamata ca.

¹⁰ O ni sa vakaukauwataki au me vaka e dua na bulumakau kila, Ka vakalougatataki au ena marau.

¹¹ Au sa raica na nodra vakadrukai na kequ meca Ka rogoca na nodra tagi na i valavala ca.

¹² Era na bula cake na yalododonu me vaka na balabala; Era na tubu me vaka na sitari mai Lepanoni.

¹³ Era sa vaka na kau era tei ena vale i Jiova, Ka bula cake ena vale tabu ni noda Kalou,

¹⁴ Ka vuataka tikoga na vuana ni sa qase mai Ka drokadroka tu ga ka kaukauwa ena veigauna kece.

¹⁵ Oqo e vakaraitaka ni sa dodonu o Jiova; Sa sega ni cala vua na noqu dauveitaqomaki.