NA SAME 91 - Vakavakadewa Vou kei na iVola tale eso

Na Kalou sa Veitaqomaki

¹ O koya sa tiko ena vale i Koya sa Cecere Sara, Sa tiko vakacegu ena i yaloyalo i Koya sa Kaukauwa.

² Au na tukuna ena vuku i Jiova, “Sa i kemuni na noqu i drodro kei na noqu bainivalu; Na noqu Kalou, o koya au sa dinata.”

³ Ena maroroi iko mai na leqa kece era tu vakavuni, Kei na veimate ca kecega.

⁴ Ia, ena ubi iko ga o koya ena ruku ni tabana; Ka maroroi iko vinaka ena nona loloma; Ena taqomaki iko ka totaki iko na nona yalodina.

⁵ O na sega ni rerevaka na ka e daurerevaki ena bogi, Se na gasau sa vuka voli ena siga,

⁶ Se na mate lelevu e dauveitauvi ena butobuto, Se na vere ca sa dau veivakamatei ena sigalevu tutu.

⁷ Era na bale na udolu e yasamu, Kei na tini na udolu ena ligamu i matau, Ia, ena sega ga ni yacovi iko e dua na ka ca.

⁸ O na raica votu ga e matamu, Na nodra totogitaki na tamata ca.

⁹ Me vaka ni o sa tauri Jiova me nomu i drodro, Ka nomu i sasabai o koya sa Cecere Sara,

¹⁰ Ena sega kina ni dua na leqa me na ravuti iko, Ka sega na i valavala kaukauwa me toro volekata na nomu vale.

¹¹ Ena vakaroti ira na nona agilosi na Kalou me ra vakatawani iko, Ka taqomaki iko ena vanua kecega o lakova.

¹² Era na keveti iko cake ena ligadra, Me kakua kina ni tavutu na yavamu ki na vatu.

¹³ O na butuki ira sobu na laione kei na gata, Io, na laione rerevaki kei na gata bati gaga.

¹⁴ Sa kaya na Kalou, “Au na vakabulai koya sa lomani au; Ka taqomaki koya e vakatusa ni sai au o Jiova.

¹⁵ Ni kaci mai vei au, au na rogo yani vua; Au na tiko vata kei koya ena gauna e leqa kina. Au na vakabulai koya ka rokovi koya.

¹⁶ Au na vakacegui koya me na bula balavu; Ka vakatakila vua na noqu veivakabulai.” A Same. A Sere me baleta na Siga ni Vakacecegu.