NA SAME 90 - Vakavakadewa Vou kei na iVola tale eso

Ai Kava ni i Vola ( Same 90–106 ) Na Kalou kei na Tamata

A Masu i Mosese na tamata ni Kalou.

¹ Turaga, sai kemuni ga na neimami i tikotiko ni veitabagauna.

² Ni o ni se bera ni bulia na veiulunivanua, Se vakayacora na vuravura me dua na ka, Sa i kemuni ga na Kalou sa sega ni mudu, Io, o ni na Kalou tikoga ka tawamudu.

³ O ni sa tukuna ki na tamata me suka tale ki na ka sa buli mai kina, O ni sa vukici ira me ra suka tale me kuvu ni soso.

⁴ E dua na udolu na yabaki sa vaka ga e dua na siga vei kemuni, Sa tautauvata ga kei na siga ena noa, ni sa oti yani, Me vaka ga e dua na gauna lekaleka ena bogi.

⁵ O ni sa kauti ira tani na tamata me vaka na waluvu Era sa vaka wale ga na tadra. Era sa vaka na co sa tubu ena mataka,

⁶ Sa tubu cake ka bulabula sara, Ia ena yakavi sa malai ka mate yani.

⁷ Keimami sa vakarusai ena nomuni cudru, Keimami sa vakarerei ena nomuni cudru waqawaqa.

⁸ O ni sa tuva na neimami i valavala ca e matamuni, Na neimami i valavala ca keimami vunitaka ena vanua o ni rawa ni raica kina.

⁹ Ni sa vakalekalekataki ga na neimami bula ena vuku ni nomuni cudru; Ka sa oti yani me vaka e dua na vakasolokakana.

¹⁰ Na dede ni neimami bula sa vitusagavulu wale ga na yabaki, Ka yacova na walusagavulu, kevaka keimami se kaukauwa voli; Ia, ke mani vakakina, sa kauta ga mai na oca kei na yalo rarawa; Ni sa oti na bula, keimami sa qai takali yani.

¹¹ O cei li e kila na kaukauwa kece ni nomuni cudru? O cei e rawa ni kila na rere cava e rawa ni kauta mai na nomuni cudru?

¹² Ni vakavulici keimami ena kena rui lekaleka na neimami bula, Me rawa ni keimami vuku kina.

¹³ A cava so na kena dede o ni na qai gole lesu mai? Ni lomani ira na nomuni dauveiqaravi!

¹⁴ Ni vakacegui keimami ena nomuni loloma tudei ena veimataka, Me keimami rawa ni sere ka marau kina ena neimami bula taucoko.

¹⁵ Ni vakamarautaki keimami me tautauvata ga kei na veisiga eso o ni a vakararawataki keimami kina, Ena veiyabaki kece keimami a sota kaya kina na leqa.

¹⁶ Ni vakaraitaka vei keimami na nomuni tamata na nomuni cakacaka veivakurabuitaki, Kei na nomuni lagilagi vei ira na neimami kawa.

¹⁷ I Jiova na neimami Kalou, mo ni qai sobuti keimami ena nomuni veivakalougatataki. Ni qai vakayacora me keimami rawata vakavinaka sara na veika kecega sa vakaitavi kina na liga i keimami!