NA SAME 9 - Vakavakadewa Vou kei na iVola tale eso

¹ Au na vakacaucautaki kemuni Jiova ena yaloqu taucoko, Ka'u na dau tukuna tikoga na nomuni cakacaka vinaka kecega.

² Au na sere ena marau ena vukumuni! Au na laga sere ni vakacaucautaki kemuni na Kalou Cecere sara.

³ Era sa dro na kequ meca ni o ni sa rairai mai Ka ra sa bale sobu ka mate.

⁴ O ni sa dabe tiko ena nomuni dabedabe vakatui me vaka ni o ni sa turaganilewa dodonu, Ka o ni sa vakatauca na lewa vinaka ena vukuqu.

⁵ O ni sa vakacacani ira na veimatanitu, Ka vakarusai ira na tamata i valavala ca, Ka ra sa na sega tale ni nomuni.

⁶ Era sa oti vakadua na keimami meca. O ni sa vakarusa na nodra veikoro, Ka ra sa guilecavi sara ga vakadua.

⁷ Ia, sa Tui ga o Jiova ka tawa mudu; Sa vakaduria cake na nona i dabedabe ni veilewai.

⁸ Sa lewa tiko na vuravura ena lewa vinaka Ka veilewaitaki ira na tamata ena lewa dodonu.

⁹ Sa i vakavakaruru o Jiova vei ira sa vakaleqai Ka sa vanua ni veitaqomaki ena gauna ni leqa.

¹⁰ Kemuni Jiova, o ira era kilai kemuni era na vakadinati kemuni; O ni sa sega ni laiva e dua na tamata sa lako mai vei kemuni.

¹¹ Ni sere ni vakavinavinaka vei Jiova, o koya sa tiko mai Saioni. Tukuna vei ira na veimatanitu kecega na veika sa cakava o koya.

¹² Sa dau nanumi ira era vakaleqai na Kalou, Ka sa sega ni guilecava na nodra tagi, Sa cudruvi ira ga era sa dau veivakacalai.

¹³ Ni yalololoma vei au Jiova, Ka raica na noqu vakacacani mai vei ira era cati au. Ni vakabulai au mai na mate na Turaga,

¹⁴ Ka me'u la'ki tu ena matadra na tamata mai Jerusalemi, Ka tukuna vei ira na ka kece sara au vakacaucautaki kemuni kina. Au reki baleta ni o ni sa vakabulai au.

¹⁵ Era sa bale na veimatanitu ena i keli ga era a kelia, A ra sa cakava e dua na dai ka ra sa coko tale kina.

¹⁶ Sa vakaraitaki koya vakaikoya o Jiova ena nona lewa dodonu, Ka ra sa coko tale na tamata ca ena ka ga era cakava.

¹⁷ Sa nodra i votavota kecega na tamata ca na mate, O ira kece era vakanadakuya na Kalou.

¹⁸ Era na sega ni guilecavi tikoga na tamata dravudravua; Ena sega ni tabaki sobu vakadua sara na nodra i nuinui na vakaloloma.

¹⁹ Ni lako mai Jiova, ni kakua ni laiva na tamata Me dokadokataka na nona kaukauwa. Ni kauti ira mai na veimatanitu me ra mai lewai ena matamuni.

²⁰ Kemuni Jiova ni cakava me ra rere, Me ra kila ni ra sa tamata ga.