NA SAME 89 - Vakavakadewa Vou kei na iVola tale eso

Sa Yalodina na Kalou ki na Nona Yalayala

A Masikili i Icani na Eseraaiti

¹ Kemuni Jiova, au na dau seretaka tikoga na nomuni loloma tudei, Ka'u na tusanaka na nomuni yalodina ki na veitabatamata kecega.

² Au sa kila ni sa tudei ga na nomuni loloma ka sega ni mudu; Ka sa dei vakavatu na nomuni yalodina me vaka na lomalagi.

³ O ni a kaya, “Au sa veiyalayalati kei na tamata au sa digitaka; Au a yalataka ga vua na noqu tamata o Tevita.

⁴ Ena tui tikoga e dua na nomuni kawa; Au na maroroya na nomu matanitu ka sega ni mudu!”

⁵ Era seretaka na veika talei o ni sa cakava o ira mai lomalagi Era seretaka na nomuni yalodina, Jiova

⁶ E sega ni dua mai lomalagi me vakataki kemuni Jiova Ka sega talega ni dua vei ira na kalou me vakataki kemuni.

⁷ O ni sa dokai ena nodra matabose na yalododonu Ka rerevaki vakalevu sara mai vei ira kece era wavoliti kemuni

⁸ I Jiova na Kalou ni lewevuqa, Sa sega e dua me kaukauwa me vakataki kemuni; O ni sa yalodina ena ka kecega i Jiova.

⁹ O ni sa lewa na wasawasa cudrucudru; O ni sa vakamaravutaka na kena ua.

¹⁰ O ni sa vakarusai Reapi ka vakamatea, Ka vakadrukai ira na nomuni meca ena ligamuni kaukauwa.

¹¹ Sa nomuni o lomalagi, sa nomuni talega o vuravura; O ni sa bulia na vuravura kei na veika kecega sa tu kina.

¹² O ni a cakava na vualiku kei na ceva Ka rau sere ena reki vei kemuni o Ului Tapori kei Ului Eremoni.

¹³ Sa ka levu sara na nomuni kaukauwa! Sa ka vakaitamera na nomuni qaqa!

¹⁴ Sa yavutaki na nomuni matanitu ena yalosavasava kei na lewa dodonu. Ka sa laurai na loloma tudei kei na yalodina ena ka kecega o ni cakava.

¹⁵ Era sa kalougata na tamata era sa qaravi kemuni ena nodra laga sere, O ira era tiko ena rarama ni nomuni yalovinaka.

¹⁶ Era sa marau ena siga taucoko ena vukumuni Ka vakacaucautaki kemuni ena vuku ni nomuni vinaka.

¹⁷ O ni sa solia vei keimami na qaqa ena nomuni yalovinaka.

¹⁸ Oi kemuni, i Jiova, o ni sa digitaka na neimami dauveitaqomaki, Oi kemuni ga, na Kalou Yalosavasava i Isireli, sa solia na neimami tui.

Na Yalayala ni Kalou vei Tevita

¹⁹ Ena dua na raivotu ena dua na gauna makawa sara, o ni a kaya kina vua na nomuni dauveiqaravi yalodina, “Au sa vakatokara na i sala vakatui vua e dua na sotia rogo: Au sa solia na i dabedabe vakatui vua e dua era sa digitaka na tamata.

²⁰ Au a sa digitaka na noqu tamata o Tevita; Ka'u sa lumuti ena noqu i lumu tabu me nomuni tui.

²¹ Ena tiko ga vua na noqu kaukauwa, Ena vakaukauwataki koya na ligaqu.

²² Era sa sega ni qaqa vua na kena meca, Ka ra na sega ni vakadrukai koya na tamata ca.

²³ Au na mokuti ira na kena meca Ka vakamatei ira kece era cati koya.

²⁴ Au na dau lomani koya tikoga ka yalodina vua; Ka solia tikoga vua na qaqa.

²⁵ Au na vakalevutaka na nona matanitu Me tekivu mai na Wasa Meditereni ka yacova na uciwai na Uferetisi.

²⁶ Ena kaya vei au o koya, Sa i kemuni na tamaqu ka noqu Kalou! Sa i kemuni o ni sa dau taqomaki au ka noqu i Vakabula!

²⁷ Au na lesi koya me noqu ulumatua tagane Ka tui cecere duadua.

²⁸ Au na dau vakayacora tikoga na noqu veiyalayalati vua Ka na tudei tikoga na neirau veiyalayalati ka sega ni mudu.

²⁹ Ena tui tikoga e dua na nona kawa, Ka na tudei tikoga na nona matanitu, me vaka na maliwa lala.

³⁰ Ia kevaka era na talaidredre na nona kawa ki na noqu lewa Ka sega ni vakayacora na noqu i vakaro,

³¹ Kevaka era na beca na noqu i vakavuvuli Ka sega ni vakayacora na noqu i vakaro,

³² Au sa na totogitaki ira ena vuku ni nodra i valavala ca, Ka'u na vakanakuitataki ira ena vuku ni nodra caka cala.

³³ Ia ena sega ni mudu na noqu lomani Tevita Se me'u na sega ni cakava na noqu vosa ni yalayala vua.

³⁴ Au na sega ni voroka na noqu veiyalayalati vata kei koya, Se me'u vakasuka wale ga e dua na ka au a yalataka.

³⁵ Au sa dau bubului vakadua ga ena vuku ni yacaqu tabu; Au na sega sara ni lasu vei Tevita!

³⁶ Ena sega sara ni kawaboko na nona kawa Ka na vaka na matanisiga na nona i dabedabe vakatui e mataqu.

³⁷ Ena tudei tikoga me vaka na vula Me vaka na i vakadinadina yalodina ena maliwa lala.”

Na Tagicaki ni Nona Vakadrukai na Tui

³⁸ Ia o ni sa cudruva na nomuni tui digitaki; O ni sa biuti koya ka cata.

³⁹ O ni sa voroka na nomuni veiyalayalati kei na nomuni tamata; Ka viritaka na nona i sala vakatui ki na soso.

⁴⁰ O ni sa vorolaka sobu na bainikoro; Ka laiva tu me rusa na nona bainivalu.

⁴¹ O ira kece era lako kina era sa butakoca na nona i yau; Ka ra sa vakalialiai koya kecega na wekana.

⁴² O ni sa solia na qaqa vei ira na kena meca; Ka vakavuna me ra marau kecega.

⁴³ O ni sa vakatawayagataka na nona i yaragi; Ka laiva me vakadrukai ena i valu.

⁴⁴ O ni sa kauta tani na nona i titoko vakatui; Ka kolotaka na nona i dabedabe vakatui ki na qele.

⁴⁵ O ni sa vakavuna me qase ni se bera na kena gauna; Ka solegi koya ena madua.

A Masu ni Veisereki

⁴⁶ I Jiova, O ni na vunitaki kemuni tikoga li ka tawamudu? A cava na dede ni nomuni na cudru kaukauwa tikoga me vaka na buka?

⁴⁷ Ni nanuma na kena rui lekaleka ga na noqu bula; Ni nanuma ni o ni sa bulia na tamata kecega me ra bula vakaiyalayala ga!

⁴⁸ O cei ena rawa ni bula tikoga ka sega vakadua ni mate? Ena tarova rawa vakacava na tamata me kakua ni lako ki na i bulubulu?

⁴⁹ Kemuni na Turaga, sa evei na i vakadinadina ni nomuni loloma? Sa evei na nomuni vosa ni yalayala o ni a cakava vei Tevita?

⁵⁰ Ni kakua ni guilecava na noqu vakacacani, oi au na nomuni tamata; Na noqu vosota na nodra veivakacacani kece o ira era sa sega ni kilai kemuni.

⁵¹ I Jiova, era sa vosavakacacataki koya na nomuni tui digitaki o ira na kemuni meca! Era sa vosa vakacacani koya ena vanua kecega sa lako kina.

⁵² Me vakacaucautaki o Jiova ka sega ni mudu! Emeni! Emeni!