NA SAME 88 - Vakavakadewa Vou kei na iVola tale eso

¹ I Jiova, na Kalou dauveivakabulai, au sa tagi voli ga ena siga taucoko, Ka'u sa lako yani e matamuni ena bogi.

² Ni vakarorogo ki na noqu masu; Ka rogoca na noqu tagi ni kere veivuke.

³ Sa levu sara na leqa sa yacovi au, ka'u sa voleka sara kina ni mate.

⁴ Au sa vakataki ira kecega na tani era sa vakarau mate; Sa oti na noqu kaukauwa taucoko.

⁵ Au sa biu tu yani ena kedra maliwa na mate; Au sa vakataki ira era sa moku ka davo koto ena i bulubulu, O ni sa guilecava sara ga vakadua, Ka sa sega ni rawa me ra vukei.

⁶ O ni sa kolotaki au ki na boto ni bulubulu, Ki na qara butobuto sara ka titobu duadua.

⁷ Sa bibi sara vei au na nomuni cudru, Ka sa luvuci au na nomuni biau kecega.

⁸ O ni sa vakavuna me ra biuti au na kemuni meca; Ka vakavuna me ra sevaki au. Au sa sogolati ka sega ni dro rawa.

⁹ Sa malumalumu mai na mataqu ena noqu rarawa, Kemuni Jiova, au sa masu yani vei kemuni ena veisiga kecega, Ka'u laveta cake yani na ligaqu vei kemuni ena masu.

¹⁰ O ni sa cakava li na cakacaka mana me baleti ira na mate? Era dau tucake li na mate me ra vakacaucautaki kemuni?

¹¹ Sa dau tukuni li na nomuni loloma tudei ena i bulubulu, Se na nomuni yalodina ena vanua ni veivakarusai?

¹² Ena laurai li na nomuni cakacaka mana ena vanua butobuto, Se na nomuni vinaka ena vanua ka dau guilecavi kina na ka?

¹³ Ia, oi au, i Jiova, ka'u sa tagi yani oqo vei kemuni; Sa voqa yani na domo ni noqu masu vei kemuni ena veimataka.

¹⁴ I Jiova, na cava beka o ni sa cati au kina? A cava beka o ni sa vuki tani kina vei au?

¹⁵ Au a sota kaya na veika rarawa me tekivu sara ni'u a sa gone ka vovoleka sara ni'u mate; Ka'u sa malumalumu mai na bibi ni totogi o ni dau solia vei au.

¹⁶ Sa ubi au na nomuni cudru waqawaqa Ka sa vakarusai au na nomuni ravuravu vakarerevaki.

¹⁷ Era sa wavoliti au ena veisiga kecega me vaka na waluvu; Era sa sogolati au mai na veiyasana kecega.

¹⁸ O ni sa vakavuna me ra biuti au na noqu i tokani dredre sara, Sa qai vo taudua ga na noqu i tokani o butobuto.