NA SAME 86 - Vakavakadewa Vou kei na iVola tale eso

¹ Ni rogoci au Jiova ka sauma mai na noqu masu Baleta ni'u sa dravudravua ka vakaloloma.

² Ni vakabulai au mai na mate baleta ni'u sa yalodina vei kemuni; Ni vakabulai au, ni'u sa nomuni tamata ka'u sa vakadinati kemuni.

³ Sa i kemuni na noqu Kalou, ni yalololoma vei au, Au sa masu vei kemuni ena veisiga taucoko.

⁴ Ni vakamarautaki au Turaga, Baleta ni sa lako cake yani na noqu masu vei kemuni.

⁵ O ni sa vinaka ka dau veivosoti Turaga, O ni sa sinai ena loloma tudei vei ira kece era masuti kemuni.

⁶ Ni vakarorogo Jiova ki na noqu masu; Ni rogoca na noqu kere veivuke.

⁷ Au masu yani vei kemuni ena gauna ni leqa Baleta ni o ni sauma mai na noqu masu.

⁸ Sa sega tale ni dua na kalou me vakataki kemuni Jiova, Ka sega e dua me cakava rawa na ka o ni sa vakayacora oti.

⁹ Na veimatanitu kece o ni a bulia Era na lako mai ka mai cuva vei kemuni. Era na vakacaucautaka na nomuni cecere,

¹⁰ Baleta ni sai kemuni taudua ga na Kalou, o ni sa qaqa; Sa i kemuni taudua ga o ni cakava na cakacaka veivakurabuitaki.

¹¹ Ni vakavulici au Jiova ena ka o ni vinakata me'u cakava, Au na qai talairawarawa vei kemuni ena yalodina, Ni vakavulici au me'u qaravi kemuni ena yaloqu taucoko.

¹² Au na vakacaucautaki kemuni, na Turaga na noqu Kalou ena yaloqu taucoko, Au na tusanaka na nomuni cecere ka sega ni mudu.

¹³ Sa ka vakaitamera ga na nomuni loloma tudei vei au; O ni sa qai vakabulai au mai na bati ni bulubulu.

¹⁴ Kemuni na Kalou era sa saqati au na tamata viavialevu, Era saga me ra vakamatei au e dua na i lala tamata i tovo kaukauwa, O ira na tamata era sega ni dau kauwaitaki kemuni.

¹⁵ Ia, oi kemuni na Turaga, o ni sa Kalou yalololoma ga ka dau yalololoma, O ni sa dau berabera ga ni cudru ka sa sinai sara ena loloma tudei kei na yalodina.

¹⁶ Ni vakanamata mai vei au, ka mataloloma vei au; Ni vakaukauwataki au ka vakabulai au, Baleta ni'u sa qaravi kemuni me vaka sa cakava o tinaqu.

¹⁷ Ni vakaraitaka na i vakadinadina ni nomuni vinaka Jiova, Era na qai madua kina o ira era cati au, Ni ra raica ni o ni solia vei au na vakacegu ka vukei au. A Nodra Same na luve i Kora. A Sere.