NA SAME 85 - Vakavakadewa Vou kei na iVola tale eso

A Masu me Baleta na Bula Sautu ni Vanua

¹ Kemuni Jiova, o ni sa yalovinaka ki na nomuni vanua; O ni sa vakavuna tale na bula sautu e Isireli.

² O ni sa bokoca na nodra i valavala ca na nomuni tamata Ka vosota na nodra caka cala kecega.

³ Sa oti na nomuni cudruvi ira, Ka vuki tani mai na nomuni cudru waqawaqa.

⁴ Ni vakalesui keimami tale, na Kalou ka neimami i Vakabula, Ka me oti na nomuni cudruvi keimami!

⁵ O ni na cudruvi keimami tiko li me na sega ni mudu? Ena sega li ni oti na nomuni cudru?

⁶ Ni yalovinaka ni vakaukauwataki keimami tale, Keimami na qai vakacaucautaki kemuni na nomuni tamata.

⁷ Ni vakaraitaka vei keimami, i Jiova, na nomuni loloma tudei, Ka solia vei keimami na bula.

⁸ Au sa vakarorogo ki na ka sa tukuna tiko na Kalou o Jiova; Ni sa yalataka na bula sautu vei keimami na nona tamata Kevaka keimami sega ni lesu tale ki na neimami i vakarau lialia.

⁹ Sa dina sara ni sa tu vakarau o koya me na vakabulai ira era sa rokovi koya, Ena tiko voli ga na nona veivakabulai ena noda vanua.

¹⁰ Erau na veisotari na loloma tudei kei na yalodina; Ka rau veimokoti na yalododonu kei na veivinakati.

¹¹ Ena kadre cake mai vuravura na yalodina ni tamata, Ka na rai sobu mai lomalagi na yalododonu ni Kalou.

¹² Ena vakasaututaki keda o Jiova, Ka vuavuai vinaka sara na noda vanua.

¹³ Ena liu yani na yalododonu ena mata i Jiova, Ka na vakarautaka e dua na sala ki vua. A Masu i Tevita.