NA SAME 81 - Vakavakadewa Vou kei na iVola tale eso

¹ Ni sere vakadomoilevu vua na Kalou na nodra i drodro, Ni sere ena veisere ni veivakacaucautaki vua na Kalou i Jekope.

² Ni laga sere ka qiria na tibereli. Qiria me rogo vinaka na api kei na soliteri,

³ Uvuca na davui ni solevu ni vula vou, Ni sa taucoko na vula, ena noda siga ni solevu.

⁴ Sa i koya oqo na lawa e Isireli, E dua na i vakaro mai vua na Kalou i Jekope.

⁵ Sa vakarota vei ira na Isireli, Ena gauna era sa lako tani kina mai Ijipita. Au a rogoca kina e dua na domo au a sega ni kila.

⁶ Au a laveta tani na i colacola e tabamuni, Ka taura na basikete ni cakacaka mai na ligamuni.

⁷ Ena gauna o ni a leqa kina o ni a tagi mai vei au, ka'u a qai vakabulai kemuni. Mai na noqu i vunivuni ena loma ni cava, au a vosa yani kina; Ka'u a vakatovolei kemuni mai na wai mai Meripa.

⁸ Ni rogoca mada na noqu tamata na noqu i vakasala vei kemuni. Kemuni na Isireli au diva mo ni a vakarorogo vei au!

⁹ Mo ni kakua sara ni qarava e dua na kalou tani Se cuva ki na dua tale, vei au ga.

¹⁰ Sa i au ga o Jiova na nomuni Kalou, O koya sa kauti kemuni mai na vanua o Ijipita. Ni dolava na gusumuni ka'u na vakani kemuni.

¹¹ Ia o ira na noqu tamata era sega ni via vakarorogo vei au; Era sa sega ni via talai rawarawa na Isireli.

¹² Ia au sa mani biuti ira me ra muria ga na yalodra kaukauwa Ka cakava ga na ka era vinakata.

¹³ Kevaka era a vakarorogo mada ga vei au na noqu tamata Au diva me ra talairawarawa vei au.

¹⁴ Au sa na vakadrukai ira vakatotolo sara na kedra meca Ka vakamalumalumutaki ira era veivala kei ira.

¹⁵ O ira era cati au era na cuva vei au ena rere Ka na sega ni mudu rawa na nodra i totogi.

¹⁶ Au na vakani kemuni ena witi vinaka sara Ka vakamamautaki kemuni ena oni ni veikau. A Same i Esava.