NA SAME 80 - Vakavakadewa Vou kei na iVola tale eso

¹ Ni rogoci keimami mai, oi kemuni na nodra i vakatawa na Isireli; Ni vakatudaliga mai, na i liuliu ni nomuni qele ni sipi. O ni sa dabe tiko ena nomuni dabedabe vakatui ena dela ni jerupi,

² Ni vakatakilai kemuni vei ira na Ifereimi, na Penijamini kei na Manasa; Ni vakaraitaka mada vei keimami na nomuni kaukauwa; Mo ni lako ga mai ka mai vakabulai keimami!

³ Mo ni vakalesui keimami tale, na Kalou! Ni vakaraitaka mai na nomuni loloma, ka keimami na vakabulai kina!

⁴ I Jiova na Kalou ni lewevuqa E vakacava soti na kena dede ena nomuni cudruva na nodra masu na nomuni tamata?

⁵ O ni sa solia vei keimami me keimami kania Ka gunuva e dua na bilo levu na wai ni mata.

⁶ O ni sa laivi ira ga na veimatanitu voleka me ra veiletitaka na neimami vanua; Era sa vakalialiai keimami na neimami meca.

⁷ Ni kauti keimami lesu yani, na Kalou ni lewevuqa! Ni vakatakila vei keimami na nomuni yalololoma, ka keimami na qai vakabulai!

⁸ O ni a kauta mai e dua na vuni qerepivaini mai Ijipita; O ni sa vakasava tani na veimatanitu, ka qai tea kina.

⁹ O ni a vakasavasavataka e dua na vanua me bula kina A sa titobu sara na vanua e curuma na wakana, ka tete yani ki na vanua taucoko.

¹⁰ A sa vakaruguta na veidelana na kena rurugu Ka vakarugutaka na veisitari babalavu na tabana.

¹¹ Sa tete yani na tabana me yaco sara ki na Wasa Meditereni Ka yaco sara talega ki na uciwai na Uferetisi.

¹² Na cava o ni basuka kina na kena bai e wavokita. O ira kece era lako sivita era na sega ni butakoca.

¹³ Era sa buturaka sobu na vuaka kila, Ka ra kania na manumanu kila kecega.

¹⁴ Ni gole mai vei keimami na Kalou Kaukauwa. Ni raici keimami sobu mai lomalagi; Ni lako sobu mai ka mai vakabula na nomuni vunivaini.

¹⁵ Ni lako mai ka vakabula na vuni qerepivaini oqo o ni tea, Na vaini gone oqo o ni a vakatubura me bula qaqa sara!

¹⁶ Era sa vakama na keimami meca ka taya sobu; Ni raici ira ena cudru ka vakarusai ira!

¹⁷ Ni taqomaki ira ka maroroi ira na tamata o ni a digitaka, Na matanitu o ni a vakatubura me bula kaukauwa!

¹⁸ Keimami sa na sega ni gole tani tale mai vei kemuni; Ni vakabulai keimami, ka keimami na vakacaucautaki kemuni.

¹⁹ Ni kauti keimami lesu tale mai Jiova na Kalou Kaukauwa! Ni vakatakila mai na nomuni yalololoma, ka keimami na qai vakabulai. Vua na i liuliu ni sere: me vaka “Na Kitica.” A nei Esava.