NA SAME 79 - Vakavakadewa Vou kei na iVola tale eso

¹ Kemuni na Kalou, Era sa curuma mai na nomuni vanua o ira na kai tani; Era sa vakadukadukalitaka na nomuni vale tabu Ka laivi Jerusalemi me rusa tu.

² Era sa laiva tu na yagodra na nomuni tamata me ra kania na manumanu vuka, Kei na yagodra na nomuni yalododonu ki na manumanu kila.

³ Era sa vakadavea na nodra dra na nomuni tamata Me vaka na wai wavokiti Jerusalemi, Ka sa sega ni dua me buluta na yagodra na mate.

⁴ O ira na matanitu wavoliti keimami era sa vakalialiai keimami, Era sa dredrevaki keimami ka vakalialiai keimami.

⁵ I Jiova, o ni na cudruvi keimami tikoga li ka sega ni mudu? Ena waqa tiko li na nomuni cudru me vaka na bukawaqa?

⁶ Ni sovaraka na nomuni cudru ena veivanua sa sega ni kilai kemuni, Kivei ira sa sega ni dau masu vei kemuni.

⁷ Era sa vakamatei ira na nomuni tamata Ka vakarusa na neimami vanua.

⁸ Ni kakua ni cudruvi keimami ena vuku ni nodra i valavala ca na neimami qase; Ia, ni lomani keimami mai oqo; Sa oti kece sara na neimami i nuinui.

⁹ Ni vukei keimami na Kalou na neimami vakabula me baleta na dokai ni yacamuni; Ni vakabulai keimami ka vosoti keimami, Me ra na vakacaucautaki kemuni kina na tamata.

¹⁰ Na cava me ra tarogi keimami kina na veimatanitu ka kaya, “E vei na nomuni Kalou?” Me keimami raica mada ni o ni sa totogitaki ira na veimatanitu Me baleta na nodra vakadavea na nodra dra na nomuni dauveiqaravi.

¹¹ Ni rogoca mada na nodra vutugu na tamata era sa vesu tu, Ka sereki ira sa lesi me ra vakamatei mai na nomuni kaukauwa levu.

¹² Turaga, ni sauma lesu vakavitu vei ira na veimatanitu, Ena vuku ni vosa ni veivakacacani era sa tauca vei kemuni.

¹³ Ia, oi keimami na nomuni tamata, na sipi ni nomuni vanua, Keimami na vakavinavinakataki kemuni ga ka sega ni mudu, Ka vakacaucautaki kemuni ena veigauna kecega. Vua na i liuliu ni sere. Me vaka na i lagalaga ni “Na Viavia ni Veiyalayalati.” A nei Esava. A Same.