NA SAME 78 - Vakavakadewa Vou kei na iVola tale eso

¹ Ni vakarorogo, na noqu tamata, ki na noqu i vakavuvuli, Ka rogoca na ka au sa kaya.

² Au na vakayagataka na veivosa ni vuku momona eso Me vakamacalataki kina na veika vuni ni gauna sa oti,

³ Na veika eda a rogoca ka kila, Na veika era a tukuna vei keda na noda qase.

⁴ Eda na sega ni vunitaka oqo vei ira na luveda; Eda na tukuna ga vei ira na i tabatamata ka tarava Na qaqa i Jiova kei na nona veicakacaka kaukauwa, Kei na nona cakacaka veivakurabuitaki sa vakayacora.

⁵ Sa solia na lawa vei ira na Isireli Kei na i vakaro vei ira na kawa i Jekope, Sa vakaroti ira na noda qase Me ra vakatavuvulitaka na nona lawa vei ira na luvedra,

⁶ Me ra na vulica kina na nona lawa na i tabatamata ka tarava, Ka me ra na qai tukuna talega vei ira na luvedra.

⁷ Ena ka oqo era na vakadinata talega kina na Kalou Ka sega ni guilecava na ka sa cakava, Ia, era na dautalairawarawa ga ki na nona i vakaro.

⁸ Me ra na kakua ni vakataki ira na nodra qase E dua na matatamata dauveisaqasaqa ka dautalaidredre, E sega ni dei na nodra vakabauta na Kalou Ka sega ni yalodina tikoga vua.

⁹ O ira na Ifereimi era vala ena dakaititi kei na kena gasau Era a dro ena siga ni valu.

¹⁰ Era sa sega ni vakayacora na nodra veiyalayalati kei na Kalou; Era sa bese ni muria na nona lawa.

¹¹ Era sa guilecava na ka sa cakava o koya, Kei na veika mana sa vakaraitaka vei ira.

¹² Ena gauna era a vakararai tu kina na nodra qase A sa qai cakava na Kalou na cakacaka mana Ena buca o Soani ena vanua o Ijipita.

¹³ A sa wasea rua na wasawasa ka liutaki ira yani, A sa cakava na wai me ra duri tu me vaka na bai.

¹⁴ Sa liutaki ira ena dua na o ena siga, Kei na veibogi kece na bukawaqa.

¹⁵ Sa voroka na vatu ena vanua dravuisiga, Ka vagunuvi ira ena wai mai na boto ni qele.

¹⁶ Sa cakava me drodro mai e dua na uciwai mai na vatu Ka vakavuna me drodro tu na wai me vaka na uciwai.

¹⁷ Ia, era sa qai valavala ca tikoga vua na Kalou, Ka veisaqasaqa kei koya sa Cecere Sara ena vanua dravuisiga.

¹⁸ Era sa nakita me ra vakatovolea na Kalou Ena nodra vinakata na kakana era via kania.

¹⁹ Era sa vosa vakacataka na Kalou ka kaya, “Sa rawata li na Kalou me solia vei keda na kakana ena vanua dravuisiga?

²⁰ E dina taucoko ni a mokuta na vatu Ka sa vure mai kina na wai, Ia e rawa li me na solia na keda madrai, Ka solia vei ira na nona tamata na lewe ni manumanu?”

²¹ Ia sa cudru sara na Kalou ni sa rogoci ira; Ka sa ravuti ira kina ena bukawaqa, Ka toro cake sara na nona cudruvi ira,

²² Baleta ni ra sa sega ga ni vakabauti koya Ka sega ni vakabauta ni sa rawa vua me vakabulai ira.

²³ Ia, sa qai vosa cake o koya ki na maliwa lala Ka vakarota na kena veikatuba me ra tadola;

²⁴ A sa solia vei ira o koya na sila mai lomalagi, Ena nona solia sobu mai na mana me ra kania.

²⁵ Era sa qai kania na kedra kakana na agilosi, A sa solia na Kalou na ka kece sara era sa gadreva.

²⁶ Ia, sa qai vakavuna me liwa e dua na cagi tokalau Ka sa vakavuna me liwa mai na ceva ena nona kaukauwa,

²⁷ Ka talai ira sobu mai na manumanu vuka me vaka na kuvu ni soso, Ka vuqa sara me vaka na mataninuku e matasawa.

²⁸ Era sa tau ena maliwa ni nodra keba, Ka ra vakavolivolita na nodra veivalelaca.

²⁹ Era sa kana na tamata ka ra mamau; Sa solia vei ira na Kalou na veika kece era gadreva.

³⁰ Ia, era se sega ga ni ra vakacegui Ka ra se ia ga na kana,

³¹ A sa qai cudruvi ira na Kalou, Ka vakamatei ira na nodra tamata qaqa, O ira na cauravou vinaka duadua ni Isireli.

³² E dina ga ni yaco oqo, era sa ia ga na i valavala ca na tamata; Ka sega ni via vakabauta.

³³ A sa muduka kina o koya na nodra siga me vaka na i cegu Kei na nodra bula ena leqa tubu koso.

³⁴ Ena gauna e vakamatea kina eso vei ira o koya Era na gole sara mai vua na kena vo, Era sa veivutuni sara ka masu vagumatua vua.

³⁵ Sa qai nanuma ni sa nodra dauveitaqomaki na Kalou, Ka sa nodra i Vakabula o koya sa Cecere Sara.

³⁶ Ia, sa lasu kecega na nodra vosa; Ka ra sa vosa ni veicavilaki wale ga.

³⁷ Era a sega ni yalodina vua, Ka ra sega ni yalodina ena nodra veiyalayalati kei koya.

³⁸ Ia, sa yalololoma ga na Kalou vei ira na nona tamata. A sa vosota na nodra i valavala ca, Ka sa sega ni vakarusai ira. Sa dau vakavuqa me tarovi koya me kakua ni cudru, Ka sa lewai koya vinaka me sega ni cudru vakalevu sara.

³⁹ Sa nanuma ni ra sa tamata ga, Ka vaka na cagi sa liwa mai ka takali sara yani.

⁴⁰ Era sa saqati koya vakavuqa ena vanua dravuisiga Ka ra sa vakararawataki koya vakalevu.

⁴¹ Era sa vakatovolea vakavuqa sara na Kalou, Ka vakacudruya na Lewe Dua Yalo Savasava ni Isireli.

⁴² Era sa guilecava na nona kaukauwa levu; Kei na gauna a vakabulai ira kina mai na kedra meca.

⁴³ Ka cakava na nona cakacaka kaukauwa kei na cakacaka mana, Ena buca o Soani ena vanua o Ijipita mai na nodra veiuciwai.

⁴⁴ A sa vukica na veiwai me dra; sa qai sega kina na medra Wai ni gunu na kai Ijipita.

⁴⁵ A sa tala na yavusa lago ena kedra maliwa me vakararawataki ira, Kei na boto me vakacacana na nodra vanua.

⁴⁶ A sa talai ira na nuve o koya me ra kania na nodra i teitei Kei na vodre me ra vakacacana na nodra vanua.

⁴⁷ Sa vakamatea na nodra veivaini o koya ena uca cevata Kei na nodra vunilolo ena tegu cevata.

⁴⁸ Sa vakamatea o koya na nodra bulumakau ena uca cevata Kei na nodra qele ni sipi ena yaseyase.

⁴⁹ Sa vakayacora vei ira na nona cudru waqawaqa. Ka sa vakavuna me ra rarawa sara vakalevu, Ena nona talai ira mai na agilosi dauveivakarusai.

⁵⁰ A sega ni tarova na nona cudru o koya Se vakavoca na nodra bula, Ia sa vakamatei ira ena dua na mate dewa.

⁵¹ A sa vakamatea o koya na ulumatua Ni veivuvale kecega e Ijipita.

⁵² Ia sa qai liutaki ira yani na nona tamata o koya me vaka e dua na i vakatawanisipi, Ka tuberi ira yani ena vanua dravuisiga.

⁵³ A sa kauti ira vakavinaka yani o koya ka ra sa sega ni rere Ia sa ubi ira na kedra meca na wasawasa.

⁵⁴ A sa kauti ira mai ki na nona vanua tabu ki na veiulunivanua, Sa vakamalumalumutaka o koya vakaikoya.

⁵⁵ A sa qai vakasavi ira yani na kena i taukei ni ra sa toso mai na nona tamata; Sa wasea o koya na vanua vei ira na veimataqali ni Isireli, Ka laiva me ra tiko e kea ena nodra valelaca.

⁵⁶ Ia era sa qai veisaqasaqa kei na Kalou Kaukauwa Ka vakatovolei koya. Era sega ni muria na nona i vakaro.

⁵⁷ Ia era sa dauveisaqasaqa ka sega ni yalodina me vakataki ira na nodra qase, Ka ra sa sega ni nuitaki me vaka na gasau ni dakaititi veve

⁵⁸ Era sa vakacudrui koya ena nodra veivanua ni qaravi kalou tani, Ka vakavuvutaki koya ena nodra matakau;

⁵⁹ Ka sa cudru vakalevu na Kalou ni raica na ka era cakava; Sa qai biuti ira tani na Isireli.

⁶⁰ A sa biuta na nona valelaca mai Sailo o koya Na vanua sa tiko kina ena kedra maliwa na tamata.

⁶¹ A sa solia na nona Kato ni Veiyalayalati me ra vesuka na meca, Na vanua e dau kune kina na nona kaukauwa kei na nona lagilagi.

⁶² A sa cudruvi ira na nona tamata o koya Ka solia me ra vakamatei ira o ira na kedra meca.

⁶³ Era sa mate na nodra cauravou ena i valu, Ka sa sega ni dua me ra vakawati kei ira na nodra goneyalewa.

⁶⁴ Era sa mate na bete ena i seleiwau, Ka ra sa sega ni rawa ni tagicaki ira na nodra vada.

⁶⁵ Sa qai yadra mai na Turaga me vaka e dua mai na moce; Sa vaka na tamata qaqa sa kaila ena vuku ni waini.

⁶⁶ Sa vakasavi ira lesu na kena meca o koya Ena druka veivakamaduataki e sega ni oti rawa.

⁶⁷ A sa cati ira na kawa i Iosefo o koya, Ka sega ni digitaka na mataqali i Ifereimi.

⁶⁸ Ia, a sa qai digitaka ga na yavusa o Juta, Io, na ulunivanua o Saioni ka sa daulomana.

⁶⁹ A sa tara mai kea na nona vale tabu me vaka na nona i tikotiko mai lomalagi, A sa vakadeitaka me vaka na vuravura, Ka taqomaki vinaka ena veigauna kecega.

⁷⁰ A sa digitaka na nona dauveiqaravi o Tevita Ka kauti koya mai na vanua ni vakatawa sipi.

⁷¹ A sa buli koya na Turaga me nodra tui na Isireli, Me nodra i vakatawa na tamata ni Kalou.

⁷² A sa qaravi ira o Tevita ena yalodina, Ka liutaki ira ena ligana maqosa. A Same i Esava.